កីឡាជាតិ
ជាតិ
Harvey Read អតីតកីឡាករយុវជន Stoke City ចូលរួមជាមួយព្រះខ័នរាជស្វាយរៀង
× ខ្សែការពារអង់គ្លេស Harvey Read បានក្លាយជាកីឡាករចំណូលថ្មីដំបូងរបស់ក្លិបព្រះខ័នរាជស្វាយរៀងសម្រាប់រដូវកាលខាងមុខ។ Read ជាអតីតកីឡាករយុវជនរបស់ក្លិប Stoke City
កើតនៅថ្ងៃទី២ ខែកញ្ញា ឆ្នាំ១៩៩៨ នៅ Lyndhurs, តំបន់ Hampshire ប្រទេសអង់គ្លេស Harvey ឆ្លងកាត់វគ្គបណ្តុះបណ្តាលបាល់ទាត់ថ្នាលនៅក្លិប Southampton មុននឹងទៅចូលរួមក្នុងក្រុមយុវជនអាយុក្រោម១៨ឆ្នាំ និងក្រោម២៣ឆ្នាំរបស់ Stoke City នាអំឡុងឆ្នាំ២០១៧។
Harvey បានស៊ុតបាល់បញ្ចូលទីមួយក្នុងជ័យជម្នះ ៤-១ លើ Nottingham Forest ដែលបាននាំឲ្យ U18-Stoke City ទទួលបានកៅអីនៅវគ្គ១៦ក្រុមចុងក្រោយនៃព្រឹត្តិការណ៍ FA Youth Cup រដូលកាល ២០១៦-១៧។ យុវជន Stoke បានជោគជ័យជាបន្តបន្ទាប់ មុននឹងចាញ់ យុវជន Manchester City ៩-២ នៅវគ្គពាក់កណ្តាលផ្តាច់ព្រ័ត្រ។
បន្ទាប់មក Harvey បានផ្ទេរទៅកាន់ក្លិប Eastleigh ដែលលេងនៅក្របខណ្ឌ National League ដែលស្ថិតនៅលំដាប់ទី៥នៃក្របខណ្ឌបាល់ទាត់អង់គ្លេស។ ក្រោយការបង្ហាញខ្លួនរយៈពេលខ្លី Harvey បានផ្ទេរទៅកាន់ក្លិប Heidleberg United នៃក្របខណ្ឌលំដាប់ទីពីរអូស្ត្រាលី National Premier Leagues Victoria។
ក្រោយបង្ហាញខ្លួនបាន៣លើកនៅទឹកដីអូស្ត្រាលី Harvey បានមកបន្តអាជីពជាក្លិបព្រះខ័នរាជស្វាយរៀង ដែលជាម្ចាស់ជើងឯកខេមបូឌានលីគឆ្នាំ២០១៣ ។ យោងតាមគេហទំព័ររបស់ព្រះខ័នរាជស្វាយរៀង កីឡាកររូបនេះ កាន់លិខិតឆ្លងដែនអូស្ត្រាលីផងដែរ។
Harvey ជាចំណូលថ្មីដំបូងរបស់ក្លិបព្រះខ័នរាជស្វាយរៀង បន្ទាប់ពីក្លិបដែលមានមូលដ្ឋាននៅខេត្តស្វាយរៀងផ្ទាល់មួយនេះ ប្រកាសពីការចាកចេញកីឡាករយុវជន៨នាក់ជាបន្តបន្ទាប់ ដែលក្នុងនោះមានលី សារ័ត្ន, ប្រាក់ សុវណ្ណពិសិដ្ឋ, ម៉ន កក្កដា, អ៊ឹម រិទ្ធា, ផួង សុខរក្សា, កែវ សារ៉េត, ផក សីហា និង ទេព វាសនាកុមារពិទូរ្យ៕
Tag:
បាល់ទាត់
ព្រះខ័នរាជស្វាយរៀង
Harvey Read
© រក្សាសិទ្ធិដោយ thmeythmey.com