អន្តរជាតិ
នាយករដ្ឋមន្ត្រីសិង្ហបុរីថា កូនៗរបស់លោកពុំចាប់អារម្មណ៍កាន់តំណែងបន្តពីលោកឡើយ រូបភាព Channel NewAsia
× នាយករដ្ឋមន្ត្រីសិង្ហបុរី លី សៀនឡុង កាលពីថ្ងៃទី០៦ ខែវិច្ឆកា បាននិយាយថា កូនៗរបស់លោកពុំមានចំណាប់អារម្មណ៍ចូលប្រឡូកក្នុងឆាកនយោបាយដូចលោកឡើយ។ ការលើកឡើងរបស់មេដឹកនាំរូបនេះបែបនេះ គឺឆ្លើយតបនឹងសំនួររបស់និពន្ធនាយកសារព័ត៌មាន Bloomberg លោក John Micklethwait ដែលបានចោទជាសំនួរថា តើត្រកូលលីជំនាន់ថ្មីនឹងប្រឡូកចូលឆាកនយោបាយឬមួយក៏អត់នោះ។
ថ្លែងនៅឯកិច្ចសម្ភាសមួយជាមួយ លោក John Micklethwait ដែលធ្វើឡើងក្នុងវេទិកាសេដ្ឋកិច្ចថ្មី នាទីក្រុងសិង្ហបុរី លោក លី សៀនឡុង បានគូសបញ្ជាក់បែបនេះ៖ «ខ្ញុំមិនប្រាកដទេថា ពួកគេបង្ហាញចំណាប់អារម្មណ៍ចូលប្រឡូកក្នុងឆាកនយោបាយ។ ពួកគេមានសមត្ថភាពគ្រាប់គ្រាន់សម្រាប់ធ្វើរឿងនេះ ប៉ុន្តែខ្ញុំគិតថា ពួកគេមិនមានបំណងបន្តកាតព្វកិច្ច ដូចអ្វីដែលខ្ញុំកំពុងធ្វើនេះឡើយ»។
បន្ថែមពីនេះ លោក លី ដែលជាកូនប្រុសរបស់អតីតនាយករដ្ឋមន្ត្រីសិង្ហបុរី លី ក្វាន់យូ បិតាស្ថាបនិកសិង្ហបុរីនោះ បានលើកឡើងទៀតថា កូនៗរបស់លោកមានទំនួលខុសត្រូវចំពោះការងារផ្ទាល់ខ្លួនរបស់ពួកគេ។ ជាមួយគ្នានេះ លោក លី យល់ឃើញថា វាមិនមែនជារឿងល្អនោះទេដែលលោកដាក់បន្ទុកបន្ថែមទៀតលើកូនៗរបស់លោក។ ហើយម្យ៉ាងវិញទៀត វាមិនមែនជារឿងងាយស្រួលនោះឡើយសម្រាប់កូនៗរបស់លោក នៅពេលពួកគេមានឈ្មោះជាកូននាយករដ្ឋមន្ត្រីនោះ។
តាមពិតទៅ លោក លី ហាក់នៅខ្វាយខ្វល់ចំពោះរឿងអាស្រូវកាលពីឆ្នាំមុន ដែលលោក និងប្រពន្ធរបស់លោក ត្រូវបានសាច់ញាតិរបស់ពួកគេ ចោទប្រកាន់ជាសាធារណៈ ជុំវិញមហិច្ឆតាត្រួសត្រាយផ្លូវឲ្យកូនប្រុសវ័យ ៣១ឆ្នាំរបស់ពួកគេ គឺលោក Li Hongyi ចូលប្រឡូកក្នុងឆាកនយោបាយ។ ភ្លាមៗក្រោយផ្ទុះការចោទប្រកាន់បែបនេះ លោក លី បានចេញមុខទាត់ចោលបទចោទនេះ។ ហើយលោក Li Hongyi ដែលកំពុងបម្រើការជាមន្ត្រីផ្នែកសេវកម្មសាធារណៈ ក៏បានចេញមុខបកស្រាយផងដែរថា លោកពុំចាប់អារម្មណ៍នឹងរឿងនយោបាយនោះទេ។
គួរបញ្ជាក់ផងដែរថា លោក លី សៀនឡុង មានកូនចំនួន៤នាក់ ក្នុងនោះរួមមាន លោកស្រី Li Xiuqi វ័យ ៣៨ឆ្នាំ, លោក Li Hongyi វ័យ ៣១ឆ្នាំ, លោក Li Yipeng វ័យ ៣៦ឆ្នាំ និងលោក Li Haoyi វ័យ២៩ឆ្នាំ៕
Tag:
នាយករដ្ឋមន្ត្រីសិង្ហបុរី
លោកលី សៀនឡុង
© រក្សាសិទ្ធិដោយ thmeythmey.com