រដ្ឋមន្ត្រីហិរញ្ញវត្ថុម៉ាល់ឌីវថ្មី បាននិយាយនៅថ្ងៃ២៦ ខែវិច្ឆិកាថា ចិនកំពុងអនុវត្តគម្រោងហេដ្ឋារចនាសម្ព័ន្ធនៅក្នុងតម្លៃខ្ពស់ បើធៀបទៅនឹងតម្លៃដែលខ្លួនបានដាក់ស្នើកាលពីដំបូងឡើយ។ យ៉ាងណាមិញ លោកក៏បានគូសបញ្ជាក់ថា រដ្ឋកោះនៅក្នុងមហាសមុទ្រឥណ្ឌានេះ ពុំមានលទ្ធភាពចរចាឡើងវិញឬលុបចោលកិច្ចព្រមព្រៀងនេះឡើយដ្បិតវាត្រូវបានសងសង់រួចរាល់ទៅហើយនោះ។ ប៉ុន្តែខ្លួនត្រឹមសង្ឃឹមនឹងអាចកាត់បន្ថយតម្លៃនោះខ្លះ។
ក្នុងដំណើរទស្សនកិច្ចទៅកាន់ប្រទេសឥណ្ឌា រដ្ឋមន្ត្រីហិរញ្ញវត្ថុម៉ាល់ឌីវលោក Ibrahim Ameer បញ្ជាក់ថា រដ្ឋាភិបាលថ្មីរបស់ប្រធានាធិបតី Ibrahim Mohamed Solih ទើបចូលកាន់អំណាចនៅក្នុងខែវិច្ឆិកានេះ កំពុងសើរើកិច្ចសន្យាសាងសង់ហេដ្ឋារចនាសម្ព័ន្ធក្រោមអាណត្តិរបស់រដ្ឋាភិបាលមុនដឹកនាំដោយលោក Abdulla Yameen។ ភាគច្រើននៃកិច្ចសន្យាទាំងនោះ គឺជាមួយក្រុមហ៊ុនចិនតែម្តង
យោងតាមទីភ្នាក់ងារព័ត៌មាន Reuters ស្ថិតក្នុងទីក្រុងញូវដេលី លោក Ameer បានប្រាប់អ្នកកាសែតថា ក្រុមមន្ត្រីរបស់លោកបានចំណាយពេលពេញមួយសប្តាហ៍ក្នុងការិយាល័យ ព្យាយាមទូទាត់ថ្លៃបំណុល ដែលរដ្ឋាភិបាលមុនបានទទួលយកគម្រោងហេដ្ឋារចនាសម្ព័ន្ធរបស់ចិន។
លោក Ameer បានគូសបញ្ជាក់ថា លោកជឿជាក់ថា គម្រោងហេដ្ឋារចនាសម្ព័ន្ធស្ទើរតែទាំងអស់ ដែលមានជាមួយក្រុមហ៊ុនចិន គឺស្ថិតក្នុងតម្លៃខ្ពស់ជាងតម្លៃដើមដែលបានកំណត់ទុក ហើយក្រុមរបស់លោកកំពុងពិនិត្យលើបញ្ហានេះ។ ទោះបីជាយ៉ាងនេះក្តី រដ្ឋមន្ត្រីរូបនេះបានសារភាព រដ្ឋាភិបាលម៉ាឌីវពុំអាចលុបចោលកិច្ចសន្យាទាំងនោះបានឡើយ ដ្បិតថាគម្រោងភាគច្រើនត្រូវបានបញ្ចប់ការសាងសង់រួចបាត់ទៅហើយនោះ។
ត្រង់ចំណុចនេះ លោក Ameer បានលើកឡើងបែបនេះ៖ «យើងមិនអាចធ្វើអ្វីបានច្រើនទេ ទាក់ទងនឹងការចរចាឡើងវិញនោះ ប៉ុន្តែគោលដៅទៅមុខទៀតរបស់យើងគឺចង់បាន ឲ្យមានការកាត់បន្ថយតម្លៃនៃគម្រោងហេដ្ឋរចនាសម្ព័ន្ធនេះ»។
ជុំវិញការដំឡើងតម្លៃគម្រោងហេដ្ឋារចនាសម្ព័ន្ធដែលក្រុមហ៊ុនចិនម៉ៅការនេះ លោក Ameer បានលើកឡើងពីករណីសាងសង់មន្ទីរពេទ្យមួយកន្លែងនៅក្នុងរដ្ឋធានីម៉ាល់។ គិតមកត្រឹមពេលនេះ សម្រាប់ការសាងសង់នេះ គេបានចំណាយប្រាក់អស់ប្រមាណជាង ១៤០លានដុល្លារ។ ហើយចំនួននេះគឺមានតម្លៃខ្ពស់ជាងតម្លៃដើមដែលស្ថិតនៅត្រឹម ៥៤លានដុល្លារប៉ុណ្ណោះ។
សម្រាប់សមិទ្ធផលហេដ្ឋារចនាសម្ព័ន្ធអំឡុងពេល៥ឆ្នាំកន្លងទៅ ចិនបានសាងសង់ស្ពានឆ្លងកាត់សមុទ្រមួយ ដែលភ្ជាប់រដ្ឋធានីរបស់ម៉ាឌីវទៅកាន់អាកាសយានដ្ឋានសំខាន់មួយ នៅលើកោះផ្សេងមួយទៀត។ លើសពីនេះ ចិនក៏កំពុងអភិវឌ្ឍអាកាសយានដ្ឋាននៅលើដែនកោះនេះ ហើយថែមទាំងកំពុងសាងសង់សំណង់លំនៅដ្ឋានជាច្រើនផងដែរលើកោះដែលកើតឡើងតាមរយៈការចាក់ដីបំពេញសមុទ្រទៀតផង
ប៉ុន្មានឆ្នាំចុងក្រោយនេះ រដ្ឋាភិបាលចិនបានផ្តល់កម្ចីច្រើនពាន់លានដុល្លារដល់ប្រទេសជាច្រើននៅក្នុងជុំវិញមហាសមុទ្រឥណ្ឌាទាំងម៉ាល់ឌីវ នេប៉ាល់ និងស្រីលង្កាជាដើមក្រោមគំនិតផ្តួចផ្តើមខ្សែក្រវាត់មួយវិថីមួយដើម្បីអភិវឌ្ឍហេដ្ឋារចនាសម្ព័ន្ធតំបន់។ ប៉ុន្តែការផ្តល់កម្ចីនេះត្រូវបានគេរិះគន់និងចោទប្រកាន់ថា ចិនកំពុងប្រើប្រាស់គោលនយោបាយ អន្ទាក់បំណុលទៅវិញ។
ដោយឡែក កាលពីសប្តាហ៍មុននេះដែរ ម៉ាល់ឌីវបានប្រកាសផងដែរថា ខ្លួននឹងបញ្ជូនប្រមុខការទូតទៅកាន់ប្រទេសចិន។ បញ្ហានេះកើតឡើងក្រោយពេលដែលប្រធានាធិបតីម៉ាល់ឌីវថ្មីលោក Ibrahim Mohamed Solih លើកឡើងពីបំណងរបស់ខ្លួនក្នុងការពិនិត្យឡើងវិញនូវគម្រោងមួយចំនួនដែលអតីតប្រធានាធិបតីម៉ាល់ឌីវលោក Abdulla Yameen ចុះជាមួយចិនផង។
ចំណែក អតីតប្រធានាធិបតី Mohamed Nasheed ដែលបច្ចុប្បន្នជាទីប្រឹក្សាប្រធានាធិបតីបច្ចុប្បន្នលោក Mohamed Solih ក៏បន្តចោទប្រកាន់ចិនថា បានរំលោភបំពាន និងរឹបអូសដីធ្លីប្រជាជននៅក្នុងទឹកដីម៉ាល់ឌីវដែលជាកោះយុទ្ធសាស្ត្រមួយនៅក្នុងមហាសមុទ្រឥណ្ឌា។ លោកក៏ហៅកិច្ចព្រមព្រៀងពាណិជ្ជកម្មសេរីដែលម៉ាល់ឌីវចុះជាមួយចិនក្រោមអាណត្តិមេដឹកនាំស្និទ្ធក្រុងប៉េកាំងលោក Yameen ថាជាកិច្ចព្រមព្រៀងបម្រើប្រយោជន៍តែម្ខាងដែរ៕
ទោះបីមានការចោទប្រកាន់បែបនេះពីមុនមកក្តី ចិនបានទាត់ចោលរាល់ការចោទប្រកាន់ ហើយខ្លួនសង្ឃឹមថា រដ្ឋាភិបាលម៉ាឌីវថ្មីនឹងនៅតែបន្តរក្សាគោលនយោបាយ ទាក់ទាញការវិនិយោគទុនរបស់ខ្លួនដដែល៕