គំនូររបស់កំពូលអ្នកប្រាជ្ញចិន ស៊ូ តុងប៉ លក់ដាច់ក្នុងតម្លៃជិត៦០លានដុល្លារ

អន្តរជាតិ

គំនូររបស់កំពូលអ្នកប្រាជ្ញចិន ស៊ូ តុងប៉ លក់ដាច់ក្នុងតម្លៃជិត៦០លានដុល្លារ

27, Nov 2018 , 2:53 pm

រូបភាព

ដោយ:

គំនូរមួយផ្ទាំងមានអាយុកាលជិតមួយពាន់ឆ្នាំ ដែលជាស្នាដៃរបស់កំពូលអ្នកប្រាជ្ញចិន ស៊ូ ស៊ី (Su Shi) ឬស្គាល់ថា ស៊ូ តុងប៉ (Su Dongpo) នៅថ្ងៃទី២៦ ខែវិច្ឆិកា ត្រូវបានលក់ដាច់ក្នុងតម្លៃ ៥៩,៥លានដុល្លារ នៅឯទីតាំងដាក់លក់ដេញថ្លៃមួយកន្លែង ក្នុងទីក្រុងហុងកុង។

ការិយាល័យដាក់លក់ដេញថ្លៃឈ្មោះថា Christie's Asia បានពណ៌នាសិល្បៈគំនូរដ៏អស្ចារ្យក្នុងសម័យរាជវង្សសុងមួយនេះថា «ជាគំនូរបុរាណចិន ដ៏កម្របំផុតមួយ នៅក្នុងពិភពលោក»។ គំនូរបុរាណមួយផ្ទាំងនេះ មានឈ្មោះថា «ថ្ម និងឈើ»។

យោងតាមទីភ្នាក់ងារព័ត៌មាន AFP គំនូរដ៏កម្ររបស់ចិននេះ គឺជារបស់ដែលលក់ដាច់ក្នុងតម្លៃខ្ពស់ជាងគេបំផុតមួយ ក្នុងការិយាល័យ Christie's Asia។ ហើយគំនូរមួយផ្ទាំងនេះដែរ បានបង្ហាញពីទិដ្ឋភាពនៃដើមឈើគ្មានស្លឹកមួយដើម ដែលមើលទៅស្រដៀងនឹងសត្វនាគ ជាមួយនឹងថ្មដ៏រឹងមួយសំដិលនៅក្បែរនោះ។

ជាមួយគ្នានេះ គំនូរដែលមានប្រវែងជាង ១៨៥,៥សង់ទីម៉ែត្រនេះ ក៏មានភ្ជាប់ជាមួយនឹងការរចនាអក្សរដោយដៃផ្ទាល់របស់អ្នកប្រាជ្ញដ៏ល្បីឈ្មោះស៊ូ តុងប៉ និងអមទៅដោយកំណាព្យនាសម័យសតវត្សរ៍ទី១១ ក្នុងប្រទេសចិនផងដែរ។

គួរបញ្ជាក់ផងដែរថា អ្នកប្រាជ្ញចិន ស៊ូ ស៊ី ឬត្រូវបានគេស្គាល់ម្យ៉ាងទៀតថា ស៊ូ តុងប៊ (Su Dongpo) គឺជាបុគ្គលដ៏សំខាន់បំផុតមួយរូបក្នុងប្រវត្តិសាស្ត្រចិន។ ស៊ូ តង់ប៊នេះ មិនត្រឹមតែជាអ្នកសរសេរកំណាព្យ និងជាងគំនូរប៉ុណ្ណោះទេ ប៉ុន្តែថែមទាំងជាអ្នកអក្សរសាស្ត្រដ៏ពូកែ និងអ្នកនយោបាយល្បីឈ្មោះថែមទៀតផង៕