អន្តរជាតិ
អាមេរិកផ្អាកការហោះហើរយន្តហោះទម្លាក់គ្រាប់បែកនៅលើឧបទ្វីបកូរ៉េ
× សហរដ្ឋអាមេរិកបានសម្រេចផ្អាកប្រតិបត្តិការហោះហើរ យន្តហោះទម្លាក់គ្រាប់បែករបស់ខ្លួន នៅលើឧបទ្វីបកូរ៉េ ដ្បិតវាជាការស្នើសុំរបស់រដ្ឋាភិបាលក្រុងសេអ៊ូល។ នេះជាលើកឡើងរបស់មេទ័ពជើងអាកាសអាមេរិកប្រចាំតំបន់ប៉ាស៊ីហ្វិក នៅថ្ងៃទី ២៦ ខែវិច្ឆិកា។ យ៉ាងណាមិញ មន្ត្រីយោធាជាន់ខ្ពស់អាមេរិករូបនេះ ក៏បានបង្ហើបដែរថា ក្រុងវ៉ាស៊ីនតោននឹងនៅតែរក្សាយន្តហោះទាំងនោះនៅលើមូលដ្ឋានទ័ពរបស់ខ្លួន ក្នុងតំបន់ប៉ាស៊ីហ្វិកដដែល។
ឧត្តមសេនីយ៍ Charles Brown ជាមេបញ្ជាការកងទ័ពជើងអាកាសប៉ាស៊ីហ្វិករបស់អាមេរិក បានប្រាប់អ្នកសារព័ត៌មាននៅមន្ទីរបញ្ជកោណថា ការផ្អាកប្រតិបត្តិការយោធានេះគឺដើម្បីជួយបង្កើតបរិយាកាសល្អសម្រាប់ កិច្ចខិតខំប្រឹងប្រែងផ្នែកការទូតដែលកំពុងដំណើរការទៅមុខ ក្នុងគោលបំណងដោះស្រាយបញ្ហានុយក្លេអ៊ែររបស់កូរ៉េខាងជើង។
បើតាមទីភ្នាក់ងារព័ត៌មាន AFP មន្ត្រីយោធាអាមេរិកជាន់ខ្ពស់រូបនេះ បានគូសបញ្ជាក់បែបនេះ៖ «ស្របពេលដែលយើងកំពុងឆ្លងកាត់ទិដ្ឋភាពផ្នែកការទូត ជាមួយកូរ៉េខាងជើង យើងពុំចង់ធ្វើរឿងមិនសមប្រកបណាមួយ ដែលអាចបំផ្លាញការចរចាផ្នែកការទូតនេះឡើយ»។ ជាមួយការអះអាងបែបនេះ លោក Brown និយាយថា វាគ្មានហេតុផលអ្វីដែលសហរដ្ឋអាមេរិក នៅបន្តបើកប្រតិបត្តិការហោះហើរលើឧបទ្វីបកូរ៉េទៀតនោះទេ។
បើទោះបីជាផ្អាកការហោះហើរលើឧបទ្វីបកូរ៉េយ៉ាងដូច្នេះមែន លោក Brown ក៏បានបញ្ជាក់ផងដែរថា ចំនួនយន្តហោះទម្លាក់គ្រាប់បែករបស់សហរដ្ឋអាមេរិក ដែលមាននៅលើមូលដ្ឋានទ័ព Guam នឹងនៅតែរក្សាទុកដដែល ដោយពុំផ្លាស់ប្តូរនោះឡើយ។ តួយ៉ាង គិតចាប់ពីឆ្នាំ២០០៤ ក្រុងវ៉ាស៊ីនតោន បានរក្សាយន្តហោះទម្លាក់គ្រាប់យុទ្ធសាស្ត្រច្រើនប្រភេទរួមមាន B-1B, B-52 និង B-2 នៅលើទឹកដីអធិបតេយ្យ Guam ដែលជាផ្នែកមួយនៃបេសកម្មវត្តមានយន្តហោះទម្លាក់គ្រាប់បែករបស់ខ្លួន។
តាមពិតទៅ សហរដ្ឋអាមេរិកជារឿយៗបើកប្រតិបត្តិការហោះហើរជាប្រចាំរបស់ខ្លួន នៅក្នុងតំបន់ប៉ាស៊ីហ្វិក ជាមួយនឹងសម្ព័ន្ធមិត្តខ្លួន រួមមាន ជប៉ុន កូរ៉េខាងត្បូង និងអូស្ត្រាលី ។ ប្រតិបត្តិការហោះហើររួមគ្នាបែបនេះគឺធ្វើឡើង ដើម្បីជាការហ្វឹកហាត់ និងបង្ហាញសាច់ដុំខាងផ្នែកយោធារបស់ពួកគេ ក្នុងគោលបំណងប្រឆាំងនឹងកូរ៉េខាងជើង។
គួរឲ្យដឹងដែរថា សហរដ្ឋអាមេរិក និងកូរ៉េខាងត្បូង បានផ្អាកសមយុទ្ធយោធារួមគ្នាមួយចំនួន ចាប់តាំងពីជំនួបកំពូលជាប្រវត្តិសាស្ត្ររវាងប្រធានាធិបតីអាមេរិក ដូណាល់ ត្រាំ និងមេដឹកនាំកូរ៉េខាងជើង គីម ជុងអ៊ុន នៅបុរីរដ្ឋសិង្ហបុរី កាលពីខែមិថុនាកន្លងទៅ។ កាលនោះ លោក ត្រាំ បានប្រកាសថា សហរដ្ឋអាមេរិក នឹងបញ្ឈប់ការធ្វើសមយុទ្ធយោធារួមគ្នាជាមួយក្រុងសេអ៊ូល ដែលលោកបានចាត់ទុកសកម្មភាពយោធានេះថា ចំណាយប្រាក់ច្រើន និងជាសកម្មភាពបង្ករឿងថែមទៀតផង។
អ្វីដែលគូរឲ្យចាប់អារម្មណ៍នោះគឺ រដ្ឋមន្ត្រីការពារជាតិអាមេរិក លោក ជេម ម៉ាធីស កាលពីសប្តាហ៍មុន បានគូសបញ្ជាក់ថា សហរដ្ឋអាមេរិក និងកូរ៉េខាងត្បូង បានយល់ព្រមកាត់បន្ថយទំហំនៃសមយុទ្ធ Foal Eagle របស់ពួកគេ ដែលគ្រោងធ្វើឡើងនាឆ្នាំ២០១៩ខាងមុខ។ សម្រាប់សមយុទ្ធ Foal Eagle នេះ ជាសមយុទ្ធទៀងទាត់ដ៏ធំបំផុតមូយរវាងសម្ព័ន្ធមិត្តទាំងពីរនេះ ហើយវាតែងតែបង្កជាកំហឹងដល់កូរ៉េខាងជើងផងដែរ ។ យ៉ាងណាមិញ កូរ៉េខាងជើង បានចាត់ទុកការធ្វើសមយុទ្ធនេះ ជាការត្រៀមឈ្លានពានមកលើខ្លួន៕
Tag:
សហរដ្ឋអាមេរិក
ឧបទ្វីបកូរ៉េ
© រក្សាសិទ្ធិដោយ thmeythmey.com