អន្តរជាតិ
កូរ៉េខាងជើងស្នើឲ្យ UN ប្រឆាំងអាមេរិកដែលចង់បើកប្រជុំពីការបំពានសិទ្ធិមនុស្សប្រព្រឹត្តដោយរបបដឹកនាំខ្លួន
× ក្រុងព្យុងយ៉ាង បានទទូចឲ្យសមាជិកនៃក្រុមប្រឹក្សាសន្តិសុខអង្គការសហប្រជាជាតិទប់ស្កាត់គោលបំណងរបស់សហរដ្ឋអាមេរិក ក្នុងការបើកកិច្ចប្រជុំមួយពាក់ព័ន្ធនឹងកំណត់ហេតុសិទ្ធិមនុស្សរបស់កូរ៉េខាងជើង។ ជាមួយគ្នានេះដែរកូរ៉េខាងជើងក៏បានបង្ហាញជំហរយ៉ាងរឹងមាំថា នឹងប្រឆាំងជាដាច់ខាតទៅនឹងគោលបំណងរបស់អាមេរិកនេះ។
អគ្គរដ្ឋទូតកូរ៉េខាងជើងប្រចាំអង្គការសហប្រជាជាតិ លោក Kim Song នៅថ្ងៃអង្គារ ទី ២៧ ខែវិច្ឆិកាបានបង្ហាញការសោកស្តាយ និងភ្ញាក់ផ្អើលខ្លាំង ក្រោយបានទទួលដំណឹងថា ក្រុមប្រឹក្សាសន្តិសុខនឹងរៀបចំកិច្ចប្រជុំស្តីពីបញ្ហាសិទ្ធិមនុស្សមួយ តាមការស្នើសុំរបស់អាមេរិក នាថ្ងៃទី១០ ខែធ្នូខាងមុខ។
បើតាមទីភ្នាក់ងារព័ត៌មាន AFP លោក Song បានគូសបញ្ជាក់ថា កិច្ចប្រជុំនេះនឹងបញ្ឆេះភាពតានតឹងកាន់ខ្លាំងបន្ថែមទៀត ជាជាងការលើកទឹកចិត្ត និងជំរុញឲ្យមានការអភិវឌ្ឍវិជ្ជមាននៅកូរ៉េខាងជើងនោះ។
មិនត្រឹមតែប៉ុណ្ណោះ មន្ត្រីទូតរូបនេះក៏បានចោទប្រកាន់ថា អាមេរិកបានចូលដៃចូលជើងជាមួយ ឧត្តមស្នងការសិទ្ធិមនុស្សរបស់អង្គការសហប្រជាជាតិ លោកស្រី Michelle Bachelet ដើម្បីលើកយករបាយការណ៍ស្តីពីបញ្ហារំលោភសិទ្ធិមនុស្សក្នុងកូរ៉េខាងជើងទៅរាយការណ៍នៅក្រុមប្រឹក្សាសន្តិសុខផងដែរ។
ប្រសិនបើកិច្ចប្រជុំនេះអាចដំណើរការទៅមុខមែននោះ វានឹងក្លាយជាកិច្ចប្រជុំលើកទីប្រាំហើយក្នុងឆ្នាំ២០១៨នេះ ដែលក្រុមប្រឹក្សាសន្តិសុខពិភាក្សាពីបញ្ហារំលោភសិទ្ធិមនុស្សនៅកូរ៉េខាងជើង។
ជារៀងរាល់ឆ្នាំ ចាប់តាំងពីឆ្នាំ២០១៤ មក អាមេរិកប្រមូលបានប្រាំបួនសំឡេងដែលត្រូវការនៅក្នុងក្រុមប្រឹក្សាសន្តិសុខ ដើម្បីរៀបចំកិច្ចប្រជុំបាន ទោះបីមានការប្រឆាំងពីចិនក្តី។ ជារៀងរាល់ឆ្នាំ ក្រុងប៉េកាំង ដែលជាសមាជិកអចិន្ត្រៃយ៍ ក្រុមប្រឹក្សាសន្តិសុខដែរនោះ ក៏បានព្យាយាមហាមឃាត់កិច្ចប្រជុំនេះដោយអះអាងថា បញ្ហាសិទ្ធិមនុស្សគួរតែត្រូវបានយកទៅពិភាក្សានៅ ក្រុមប្រឹក្សាសិទ្ធិមនុស្ស ដែលមានទីតាំងនៅក្រុងហ្សឺណែវ មិនមែននៅក្រុមប្រឹក្សាសន្តិសុខឡើយ។
គួរបញ្ជាក់ផងដែរថា របាយការណ៍ឆ្នាំ២០១៤មួយរបស់អង្គការសហប្រជាជាតិ បានបង្ហាញពីការធ្វើទុក្ខបុកម្នេញផ្នែកសិទ្ធិមនុស្សនៅកូរ៉េខាងជើង។ ក្នុងរបាយការណ៍នេះ បានពិពណ៌នាពីជំរុំឃុំឃាំងអ្នកទោសមួយកន្លែង ជាទីកន្លែងដែលអ្នកទោសទាំងនោះរងការធ្វើទារុណកម្ម និងបង្អត់អាហារជាដើម។ ម្យ៉ាងវិញទៀត របាយការណ៍ដដែលនេះ ក៏បានចោទប្រកាន់ថា មេដឹកនាំកូរ៉េខាងជើងជាមេដឹកនាំព្រៃផ្សៃ ហើយព្រមានពីការជាប់ចោទក្នុងបទឧក្រិដ្ឋកម្មប្រឆាំងមនុស្សជាតិថែមទៀតផង។ យ៉ាងណាមិញ របបក្រុងព្យុងយ៉ាងបានចេញមុខទាត់ចោលរបាយការណ៍នេះ ដោយអះអាងថា វាជាការមួលបង្កាច់សុទ្ធសាធ៕
Tag:
កូរ៉េខាងជើង
សហរដ្ឋអាមេរិក
អង្គការសហប្រជាជាតិ
សិទ្ធិមនុស្ស
© រក្សាសិទ្ធិដោយ thmeythmey.com