នូវែលសេឡង់បដិសេធព័ត៌មានដែលថា ខ្លួនរើសអើងក្រុមហ៊ុនចិន ក្រោយពេលដែលរដ្ឋាភិបាលសម្រេចហាមក្រុមហ៊ុនទូរគមនាគមន៍ក្នុងស្រុកទិញគ្រឿងបរិក្ខារបច្ចេកវិទ្យាក្រុមហ៊ុនទូរគមនាគមន៍យក្សចិន Huawei ក្នុងការដាក់ប្រើប្រាស់ប្រព័ន្ធ 5G ក្នុងស្រុកនោះ។ ថ្វីបើមានការស្រាយដូច្នេះក្តី ការសម្រេចនេះកើតឡើងស្របពេលលោកខាងលិចលើកពីក្តីបារម្ភរបស់ខ្លួនថា បច្ចេកវិទ្យាក្រុមហ៊ុនចិនអាចបម្រើឲ្យកិច្ចការចារកម្ម និងមានហានិភ័យដល់សន្តិសុខជាតិ។
បន្ទាប់ពីមានមតិចម្រូងចម្រាសកើតឡើងលើការដាក់បម្រាមក្រុមហ៊ុនអ៊ីនធឺណិតនូវែលសេឡង់ដ៏ធំបំផុត Spark ប្រើប្រាស់គ្រឿបរិក្ខារបច្ចេកវិទ្យាក្រុមហ៊ុន Huawei ក្នុងការដាក់ដំណើរការប្រព័ន្ធអ៊ីនធឺណិត 5G រដ្ឋាភិបាលក្រុង Wellington នៅថ្ងៃព្រហស្បតិ៍ទី ២៩ វិច្ឆិកានេះ បានចេញមុខបកស្រាយថា រាល់ការសម្រេចមិនមែនដោយសារប្រទេសចិនឬក្រុមហ៊ុនចិនឡើយ។
ប្រព័ន្ធ 5G ឬបណ្តាញអ៊ីនធឺណិតចល័តជំនាន់ទីប្រាំមានល្បឿនលឿនបំផុតមួយ ហើយអះអាងថា បណ្តាញនេះមានសមត្ថភាពសម្រាប់ការទាញយកវីដេអូបានរហ័សបំផុតពោលគឺមិនដល់មួយវិនាទីឡើយ។
បើតាមការចុះផ្សាយរបស់ទីភ្នាក់ងារព័ត៌មាន AFP លោក Andrew Little រដ្ឋមន្ត្រីទទួលបន្ទុកការិយាល័យទំនាក់ទំនងសន្តិសុខរបស់រដ្ឋាភិបាលនូវែលសេឡង់ (GCSB) បានថ្លែងថា៖« វាមិនទាក់ទងនឹងប្រទេសចិនឡើយ ហើយវាក៏មិនពាក់ព័ន្ធនឹងក្រុមហ៊ុនណាមួយជាក់លាក់ដែរ។ ប៉ុន្តែវាទាក់ទិននឹងបច្ចេកវិទ្យាដែលត្រូវបានស្នើឡើងប៉ុណ្ណោះ»។
តំណាងរដ្ឋាភិបាលនូវែសេឡង់រូបនេះក៏បានទាត់ចោលព័ត៌មានចរចាមអារ៉ាមថា ខ្លួនទំនងជារងសម្ពាធពី«បណ្តាញក្រុមចារកម្មភ្នែកប្រាំ» (Five Eyes) ដែលមានសមាជិកផ្សេងទៀតជាសម្ព័ន្ធមិត្តដូចជាអូស្ត្រាលី អាមេរិក កាណាដា និងអង់គ្លេសផងនោះទើបបានជាសម្រេចបែបនេះ។ អ្វីដែលគួរឲ្យសង្ស័យនោះ កាលពីប៉ុន្មានខែមុន អូស្ត្រាលីក៏បានសម្រេចហាមក្រុមហ៊ុនចិនខាងលើចូលបម្រើក្នុងទីផ្សារបច្ចេកវិទ្យា 5G របស់ខ្លួនដូចគ្នា។
«ខ្ញុំអាចនិយាយបានដោយទំនុកចិត្តខ្ពស់ថា វាមិនមែនជាការសម្រេចចិត្តដែលការិយាល័យទំនាក់ទំនងសន្តិសុខរបស់យើងដើម្បីឆ្លើយតបទៅនឹងសម្ពាធអូស្ត្រាលី ឬអាមេរិក ឬប្រទេសណាមួយឡើយ»។ លោក Andrew សង្កត់ធ្ងន់បែបនេះ។
ដោយឡែក ក្រុមហ៊ុនទូរគនាគមន៍នូវែសេឡង់ Spark បានបញ្ជាក់កាលពីថ្ងៃពុធទី ២៨ ខែវិច្ឆិកាថា វាទាក់ទិននឹងហានិភ័យនៃសន្តិសុខជាតិ ទើបបានជាមានការសម្រេចចិត្តពីខាងរដ្ឋាភិបាលនូវែលសេឡង់នេះ។ ក្រៅពី Huawei ក្រុមហ៊ុន ZTE របស់ចិនក៏ស្ថិតក្រោមបញ្ជីហាមឃាត់ផ្តល់បច្ចេកវិទ្យា 5G នេះដែរ។
យ៉ាងណាមិញ រដ្ឋមន្ត្រីខាងលើមិនបានបកស្រាយឲ្យបានច្បាស់លាស់ឡើយជុំវិញផលវិបាកផ្នែកសន្តិសុខដែលអាចកើតឡើង ក្នុងករណីដែលមានការប្រើប្រាស់បច្ចេកវិទ្យាក្រុមហ៊ុនចិន ដោយលោកអះអាងថា វាជារឿងសម្ងាត់។ លោកគ្រាន់តែបង្ហើបថា វាមានហេតុផលច្រើនដែលនូវែលសេឡង់ត្រូវសម្រេចចិត្តបែបនេះ ហើយហេតុផលមួយគឺ បច្ចេកវិទ្យាខ្លះងាយនឹងប្រឈមការវាយប្រហារតាមអ៊ីនធឺណិតខ្លាំង។
ក៏ប៉ុន្តែលោក Andrew បានបញ្ជាក់ឡើងវិញដែរថា វាមិនមានជាការហាមឃាត់ទាំងស្រុងឡើយចំពោះក្រុមហ៊ុន Spark។ ក្រុមហ៊ុននេះអាចប្រឹក្សាជាមួយអាជ្ញាធររបស់លោកដើម្បីស្វែងរកលទ្ធភាពនានាក្នុងការបន្ថយហានិភ័យ។
ថ្វីបើមិនបានលើកឡើងច្បាស់លាស់ពីហេតុផលចម្បងក៏ដោយ កន្លងមកវាមានការបារម្ភក្នុងចំណោមភ្នាក់ងារចារកម្មលោកខាងលិចជុំវិញការវាយប្រហារអ៊ឺនធឺណិត និងបញ្ហាចារកម្មដែលពាក់ព័ន្ធនឹងរដ្ឋាភិបាលចិន។ ស្ថាបនិកក្រុមហ៊ុន Huawei លោក Ren Zhengfei ជាអតីតវិស្វករនៃបម្រើការងារក្នុងកងកម្លាំងរំដោះប្រជាជនចិន ហើយគេបារម្ភដែរថា លោកមានទំនាក់ទំនងជិតស្និទ្ធជាមួយក្រសួងការពារជាតិ និងរដ្ឋាភិបាលចិនដែលវាអាចជាបញ្ហាធំសម្រាប់កិច្ចការសន្តិសុខជាតិប្រទេសដទៃ។ ប៉ុន្តែខាងក្រុមហ៊ុន Huawei បានបន្តបដិសេធរាល់ការអះអាងខាងលើដើម្បីជម្រះក្តីកង្វល់ទាំងនេះ។
ចិនដែលជាដៃគូពាណិជ្ជកម្មធំបំផុតរបស់នូវែលសេឡង់ដោយទំហំពាណិជ្ជកម្មទ្វេភាគីកើនឡើងដល់ ១៨ពាន់ដុល្លារៀងរាល់ឆ្នាំនោះ បានបង្ហាញក្តីបារម្ភខ្លាំងផងដែរលើការសម្រេចចិត្តហាមឃាត់ក្រុមហ៊ុនខ្លួនដ្បិត វាប៉ះពាល់ដល់លទ្ធភាពប្រកួតប្រជែងក្នុងការកិច្ចការជំនួញ។
ក្រៅពីមានទំហំពាណិជ្ជកម្មធំ ភាគីទាំងពីរក៏មានកិច្ចព្រមព្រៀងពាណិជ្ជកម្មសេរីរួមគ្នាដែរ។ ដូច្នេះហើយក្រសួងការបរទេសចិនក៏បានស្នើសុំឲ្យនូវែសេឡង់ធានាឲ្យបាននូវបរិយាកាសនិងលទ្ធភាពនៃការប្រកួតប្រជែងស្មើភាពមួយសម្រាប់ក្រុមហ៊ុនខ្លួននៅក្នុងប្រទេសដែរ៕