អន្តរជាតិ
លោក ឌូទើតេ ដំឡើងតំណែងសាច់ញាតិកូនប្រសាខ្លួនជាអនុរដ្ឋមន្ត្រីកសិកម្ម
× ប្រធានាធិបតីហ្វីលីពីន រ៉ូឌ្រីហ្គោ ឌូទើតេ បានដំឡើងតំណែង លោក Waldo Carpio ដែលបងប្រុសរបស់កូនប្រសាលោក ជាអនុរដ្ឋមន្ត្រីកសិកម្ម។ តំណែងថ្មីនេះគឺធ្វើឡើង ក្រោយពីលោក Waldo កាលពីខែកញ្ញា ឆ្នាំ២០១៧ ត្រូវបានរដ្ឋបាលលោក ឌូទើតេ តែងតាំងឲ្យធ្វើជា ឧបការីរដ្ឋមន្ត្រីក្រសួងកសិកម្ម។
បើតាមសេចក្តីប្រកាសរបស់វិមានប្រធានាធិបតីហ្វីលីពីន Malacañang ចេញផ្សាយនៅថ្ងៃទី ២៩ ខែវិច្ឆិកា លោក ឌូទើតេ បានចុះហត្ថលេខាតែងតាំង លោក Waldo តាំងពីថ្ងៃទី ២៧ ខែវិច្ឆិកាមកម្ល៉េះ។
លោក Waldo Carpio គឺជាបងប្រុសរបស់ លោក Manases Carpio ដែលសព្វថ្ងៃជាស្វាមីរបស់កូនស្រីលោកឌូទើតេ គឺលោកស្រី Sara Duterte Carpio។ លោកស្រី Sara Duterte ដែលជាកូនស្រីម្នាក់ ក្នុងចំណោមកូនៗទាំង៤របស់លោកឌូទើតេ បច្ចុប្បន្នមានតួនាទីជាអភិបាលក្រុង Davao ។
គួរបញ្ជាក់ផងដែរថា លោកប្រធានាធិបតីហ្វីលីពីន រ៉ូឌ្រីហ្គោ ឌូទើតេ ដែលជាអតីតអភិបាលក្រុង Davao មានកូនចំនួន៤នាក់ ក្នុងនោះ ស្រីពីរនាក់ និងប្រុសពីរនាក់។ កូនៗរបស់លោកពីររូបដែលសព្វថ្ងៃកំពុងប្រឡូកក្នុងឆាកនយោបាយ គឺមានដូចជា លោកស្រី Sara Duterte វ័យ ៤០ឆ្នាំ និងលោក Paolo Duterte វ័យ៤៣ឆ្នាំ ដែលទើបលាលែងពីតំណែងជាអភិបាលរងក្រុង Davao កាលពីខែធ្នូ ឆ្នាំ២០១៧៕
Tag:
រ៉ូឌ្រីហ្គោ ឌូទើតេ
ហ្វីលីពីន
© រក្សាសិទ្ធិដោយ thmeythmey.com