Europa League៖ Arsenal ដាក់កីឡាករក្មេងៗយកឈ្នះម្ចាស់ផ្ទះ Poltava ៣-០

កីឡាអន្តរជាតិ

អន្តរជាតិ

Europa League៖ Arsenal ដាក់កីឡាករក្មេងៗយកឈ្នះម្ចាស់ផ្ទះ Poltava ៣-០

30, Nov 2018 , 2:04 pm

រូបភាព

ដោយ: ទេព ពិទូរ្យ

ក្រុម Arsenal ដែលដាក់បញ្ចូលសុទ្ធតែកីឡាករក្មេងៗអាចរកជ័យជម្នះដល់ទៅ ៣-០ លើក្រុមម្ចាស់ផ្ទះ Vorskla Poltava ក្នុងការប្រកួតក្របខណ្ឌ Europa League នាកីឡដ្ឋានជាតិ (NSC) ដែលស្ថិតក្នុងក្រុងគៀវ។

ខ្សែប្រយុទ្ធវ័យក្មេង Emile Smith Rowe អាចរកគ្រាប់បាល់នាំមុខឲ្យក្រុមលោក Unai Emery នៅ១១នាទីដំបូងដើមតង់ទី១ មុន Aaron Ramsey សម្រេចគ្រាប់ទី២នៅនាទី២៧ ដោយបាល់ពិន័យប៉េណាល់ទី។ មិនទាន់ឆ្លងផុតវគ្គទី១ផង កីឡាករវ័យ ១៩ឆ្នាំ Joseph Willock ជាអ្នកស៊ុតបញ្ចូលទីគ្រាប់ទី៣នៅនាទី៤១ និងជាគ្រាប់បាល់ដំបូងរបស់គេផងដែរ។

ជ័យជម្នះបាននាំកាំភ្លើងធំឈរកំពូលតារាងពូល E មាន១៣ពិន្ទុ ក្រោយឆ្លងកាត់ការប្រកួត៥លើករួចមក និងឈានទៅវគ្គ៣២ក្រុមចុងក្រោយដោយស្វ័យប្រវត្តិ។ ក្នុងពូលនេះដែរ Sporting CP បានចំណាត់ថ្នាក់ទី២មាន១០ពិន្ទុនិងកក់កៅអីទៅជាមួយ Arsenal ដែរ ព្រោះក្រុមលេខ៣ Vorskla Poltava និងលេខ៤ Qarabag FK មានតែ៣ពិន្ទុប៉ុណ្ណោះ ខណៈការប្រកួតសល់តែ១លើកទៀត។

ដំបូងឡើយជំនួបរវាង Arsenal និង Vorskla Poltava ស្ថិតក្នុងភាពស្រពេចស្រពិលដោយសារតែបញ្ហាសន្តិសុខនៅក្នុងទីក្រុង Poltava មិនសូវល្អ។ បញ្ហានេះ UEFA បានធ្វើអន្តរាគមន៍ហើយសម្រេចផ្លាស់ប្តូរទីលានប្រកួតពីកីឡដ្ឋាន Oleksiy Butovsky ទៅកាន់កីឡដ្ឋានជាតិ (NSC) ដែលស្ថិតក្នុងក្រុងគៀវវិញ បន្ទាប់ពីមានការដាក់ឲ្យប្រើប្រាស់ច្បាប់អាជ្ញាសឹកនៅអ៊ុយក្រែន។

អ្នកនយោបាយនៅអ៊ុយក្រែននៅសប្ដាហ៍នេះបានអនុម័តលើសំណើមួយដើម្បីណែនាំច្បាប់អាជ្ញាសឹកនៅក្នុងតំបន់ដែលងាយរងគ្រោះបំផុតចំពោះការវាយប្រហារ បន្ទាប់ពីរុស្ស៊ីបានបាញ់រះ និងឃាត់ទុកនាវាចម្បាំងអ៊ុយក្រែន៣គ្រឿងកាលពីថ្ងៃអាទិត្យសប្តាហ៍មុន។

លទ្ធផលការប្រកួតគូដទៃសម្រាប់ពានរង្វាន់លំដាប់ទីអឺរ៉ុបនេះ

- Group A

Bayer Leverkusen ១ - ១ Ludogorets Razgrad

FC Zuerich ១ - ២ AEK Larnaca

- Group B

Rosenborg ០ - ១ Celtic

Salzburg ១ - ០ RasenBallsport Leipzig

- Group C

Bordeaux ២ - ០ Slavia Prague

Zenit St. Petersburg ១ - ០ FC Koebenhavn

- Group D

Anderlecht ០ - ០ Spartak Trnava