អន្តរជាតិ
រុស្ស៊ីសោកស្តាយដែល ត្រាំ លុបចោលជំនួបជាមួយពូទីន ទាំងបន្ទាន់បង្ខំ
× រុស្ស៊ីបង្ហាញការសោកស្តាយចំពោះ ការសម្រេចចិត្តរបស់រដ្ឋបាលអាមេរិក ក្នុងការលុបចោលទាំងបន្ទាន់បង្ខំនូវជំនួបរវាងប្រធានាធិបតីអាមេរិក ដូណាល់ ត្រាំ និងសមភាគីរុស្ស៊ី វ្ល៉ាឌីមៀ ពូទីន ដែលគ្រោងនឹងធ្វើនៅក្រៅកិច្ចប្រជុំ G-20 នៅអាហ្សង់ទីន។ លោក ត្រាំ បានយក ការប៉ះទង្គិចគ្នា កាលពីចុងសប្តាហ៍មុន រវាងយោធារុស្ស៊ី និងនាវាអ៊ុយក្រែន នៅសមុទ្រអាហ្សូវ ជាហេតុផលនៃការសម្រេចចិត្ត។
ប៉ុន្មានម៉ោងមុនជិះយន្តហោះ Air Force One ទៅចូលរួមកិច្ចប្រជុំកំពូល G-20 នៅរដ្ឋធានីប៊ុយណូអ៊ែរ ប្រទេសអាហ្សង់ទីន នៅថ្ងៃទី២៩ ខែវិច្ឆិកា លោក ដូណាល់ ត្រាំ បានបង្ហោះសារនៅលើគណនី Twitter របស់លោកថា៖ «ផ្អែកលើស្ថានភាពដែល នាវា និងនាវិកអ៊ុយក្រែនមិនទាន់ត្រូវបានរុស្ស៊ីដោះលែងវិញទេនោះ ខ្ញុំបានសម្រេចចិត្តលុបចោលជំនួប ដែលបានគ្រោងទុកពីមុនរបស់ខ្ញុំ នៅអាហ្សង់ទីនជាមួយលោក វ៉ា្លឌីមៀ ពូទីនដែរ»។
ទាក់ទងនឹងហេតុផលនៃការលុបចោលកិច្ចប្រជុំនេះ ប្រធានាធិបតីអាមេរិកទី៤៥រូបនេះ ចង់សំដៅលើការប្រឈមមុខដាក់គ្នារវាងអ៊ុយក្រែន និងរុស្ស៊ី នៅក្នុងច្រកសមុទ្រ Kerch ដែលជាផ្លូវទឹកដ៏សំខាន់ ក្បែរឧបទ្វីបគ្រីមៀ ។ កាលពីថ្ងៃអាទិត្យមុន នាវារុស្ស៊ីបានបាញ់នាវាយោធាអ៊ុយក្រែនចំនួនបីគ្រឿង រួចហើយបានរឹបអូសទុក និងសួរចម្លើយកងនាវិកទាំងនោះថែមទៀតផង។ សកម្មភាពនេះរងការថ្កោលទោសយ៉ាងខ្លាំងពីសំណាក់មេដឹកលោកខាងលិច ដ្បិតពួកគេចាត់ទុកថា វាជាការឈ្លានពានរបស់រុស្ស៊ីប្រឆាំងអ៊ុយក្រែន។
ក្រោយទទួលបានដំណឹងលុបចោលជំនួបទល់មុខគ្នានេះ អ្នកនាំពាក្យរបស់វិមានក្រេមឡាំង លោក Dmitry Peskov បានបង្ហាញការសោកស្តាយចំពោះការសម្រេចចិត្តនេះ ហើយលោកបានគូសបញ្ជាក់ថា៖ «នេះមានន័យថា កិច្ចពិភាក្សាលើបញ្ហាសំខាន់ ពាក់ព័ន្ធនឹងរបៀបវារៈទ្វេរភាគីនិងអន្តរជាតិ នឹងមិនត្រូវកើតឡើងឡើយ»។ យ៉ាងណាមិញ លោក Peskov បានអះអាងទៀតថា លោកពូទីន ត្រៀមខ្លួនជានិច្ចសម្រាប់ជំនួបជាមួយ លោក ដូណាល់ ត្រាំពេលណាមួយសមស្រប។
បើតាមទីភ្នាក់ងារព័ត៌មាន AFP ជំនួបទ្វេរភាគីរវាងលោកពូទីន និង លោក ដូណាល់ ត្រាំ ត្រូវបានលុបចោលនេះ ដើមឡើយត្រូវគ្រោងធ្វើឡើងនាថ្ងៃទី ១ ខែធ្នូ នៅក្រៅកិច្ចប្រជុំ G-20៕
Tag:
រុស្ស៊ី
សហរដ្ឋអាមេរិក
G-20
© រក្សាសិទ្ធិដោយ thmeythmey.com