កីឡាជាតិ
ជាតិ
FIFA Ranking៖ កម្ពុជាធ្លាក់ទៅលេខរៀងទី១៧២
× ក្រុមកីឡាករបាល់ទាត់ជម្រើសជាតិកម្ពុជាឈរចំណាត់ថ្នាក់លេខ១៧២ ក្នុងតារាងចំណាត់ថ្នាក់ពិភពលោក(FIFA Ranking)ប្រចាំខែវិច្ឆិកា ឆ្នាំ២០១៨។ ពោលគឺថយចុះពីរចំណាត់ថ្នាក់បើធៀបនឹងខែមុន។ ចំណែកម៉ាឡេស៊ី ដែលធ្លាប់តែឈរក្រោមកម្ពុជាបានឡើងទៅឈរលេខរៀងទី១៦៧។
ក្រោយបរាជ័យជាបន្តបន្ទាប់ទាំងក្នុងការប្រកួតមិត្តភាពអន្តរជាតិ និងការប្រកួតផ្លូវការធ្វើឲ្យចំណាត់ថ្នាក់ FIFA Ranking របស់ក្រុមជម្រើសជាតិកម្ពុជាធ្លាក់ចុះចំនួនពីរចំណាត់ថ្នាក់។ បើតាមតារាងចំណាត់ថ្នាក់សហព័ន្ធកីឡាបាល់ទាត់ពិភពលោកដែលទើបធ្វើបច្ចុប្បន្នភាពប្រចាំខែវិច្ឆិកា កម្ពុជាស្ថិតនៅលេខ១៧២ ដោយមាន៩៧០ពិន្ទុ ខណៈខែមុនស្ថិតនៅលេខ១៧០មាន៩៧៣ពិន្ទុ។
បើធៀបនឹងប្រទេសនៅអាស៊ីអាគ្នេយ៍ កម្ពុជាស្ថិតនៅលេខ៨ ដោយឈរលើឡាវ ព្រុយណេ និងទីម័រខាងកើត។ ចំណែកវៀតណាមឈរលេខ១នៅអាស៊ីអាគ្នេយ៍ ដោយស្ថិតនៅលេខ១០០ក្នុងតារាង FIFA Ranking រីឯហ្វីលីពីនស្ថិតនៅលេខ១១៤, ថៃលេខ១១៨, មីយ៉ាន់ម៉ាលេខ១៣៩, ឥណ្ឌូណេស៊ីលេខ១៦០, សិង្ហបុរីលេខ១៦៥ និងម៉ាឡេស៊ីលេខ១៦៧។
ក្រុមជម្រើសជាតិបែលហ្ស៊ិកបន្តគ្រងកំពូលតារាងក្នុងចំណាត់ថ្នាក់ FIFA Ranking ប្រចាំខែវិច្ឆិកា ដែលតាមពីក្រោយជាបន្តបន្ទាប់ដោយបារាំង ប្រេស៊ីល ក្រូអាស៊ី អង់គ្លេស ព័រទុយហ្គាល់ អ៊ុយរូហ្គាយ ស្វីស អេស្ប៉ាញ និងដាណឺម៉ាក៕
Tag:
បាល់ទាត់
ជម្រើសជាតិកម្ពុជា
© រក្សាសិទ្ធិដោយ thmeythmey.com