អន្តរជាតិ
សមាជិកបក្សប្រឆាំងផ្ចាញ់លោក ឌូទើតេ ដោយទារឲ្យធ្វើតេស្តគ្រឿងញៀន តែលោកប្រកែក
× សមាជិកព្រឹទ្ធសភាមួយរូបមកពីបក្សប្រឆាំងហ្វីលីពីន នៅថ្ងៃទី០៦ ខែធ្នូ បានចេញមុខផ្ចាញ់ប្រធានាធិបតីហ្វីលីពីន រ៉ូឌ្រីហ្គោ ឌូទើតេ ឲ្យទៅធ្វើតេស្តរកមើលសារធាតុញៀន។ សម្តីឌឺដងបែបនេះគឺធ្វើឡើង ក្រោយពីលោក ឌូទើតេ បកស្រាយថា លោកនិយាយលេងសើចទេ រឿងដែលថាលោកជក់កញ្ឆាដើម្បីឲ្យស្វាងអាចធ្វើការងារបានយូរ អំឡុងកិច្ចប្រជុំកំពូលអាស៊ាននៅសិង្ហបុរីនោះ។
លោក ឌូទើតេ ដែលបានបញ្ឆេះសង្គ្រាមប្រឆាំងនឹងគ្រឿងញៀន និងបណ្តាលឲ្យមនុស្សរាប់ពាន់នាក់បានស្លាប់ក្នុងយុទ្ធនាការនេះ បាននិយាយកាលពីថ្ងៃចន្ទទី០៣ ខែធ្នូថា លោកបានប្រើប្រាស់កញ្ឆាដើម្បីស្វាងអាចធ្វើការងារបានយូរ។ តែក្រោយមកដោយសាររងការរិះគន់យ៉ាងចាស់ដៃពីមជ្ឈដ្ឋានជុំវិញនៅហ្វីលីពីន មេដឹកនាំដែលត្រូវបានគេដាក់រហ័សនាមថា «មាត់អត់គំរប» រូបនេះ បានចេញមុខពន្យល់នៅថ្ងៃទី០៤ ខែធ្នូ ថា វាគ្រាន់តែជារឿងលេងសើចតែប៉ុណ្ណោះ។
ក្រោយការបកស្រាយរបស់លោកឌូទើតេ សមាជិកព្រឹទ្ធសភាបក្សប្រឆាំង លោក Antonio Trillanes បានចេញមុខប្រតិកម្មនៅក្នុងសេចក្តីថ្លែងការណ៍ថា៖« ប្រសិនបើលោក [ឌូទើតេ] ពិតជាមានបំណងបញ្ជាក់ថាខ្លួនឯងស្អាតស្អំមែននោះ ខ្ញុំចង់ឲ្យលោកទៅធ្វើតេស្តរកមើលសារធាតុញៀ»។
យ៉ាងណាមិញ អ្នកនាំពាក្យប្រធានាធិបតីលោក Salvador Panelo បានថ្លែងបញ្ជាក់នៅក្នុងសន្និសីទ ប្រកាសព័ត៌មានប្រចាំថ្ងៃថា លោកប្រធានាធិបតីនឹងមិនទទួលយកការផ្ចាញ់ផ្ចាលនេះឡើយ។ ហើយលោកបានវាយបកថា លោក Trillanes ទៅវិញទេ គួរតែជាអ្នកដែលទៅធ្វើតេស្តរកសារធាតុញៀននោះ។
តាមពិតទៅសង្គ្រាមគ្រឿងញៀនរបស់លោករងការថ្កោលទោសខ្លាំងពីក្រុមសិទ្ធិមនុស្ស ដ្បិតថាមកដល់ឥឡូវសង្គ្រាមនេះឆក់យកជីវិតមនុស្សប្រហែល ៤៨០០នាក់ហើយរាប់ចាប់ពីខែកក្កដាឆ្នាំ ២០១៦មក។ ក្រុមសិទ្ធិមនុស្សក៏ចោទប្រកាន់ផងដែរថា សង្គ្រាមនេះហ៊ុមព័ទ្ធដោយការសម្លាប់ក្រៅប្រព័ន្ធតុលាការ ហើយវាមានគោលដៅតែលើប្រជាជនក្រីក្រដែលប្រើប្រាស់ជាងក្រុមឈ្មួញលក់គ្រឿងញៀនធំៗ។
គេយល់ថា បើវាជាការពិតដែលថា លោក ឌូទើតេ បានប្រើប្រាស់គ្រឿងញៀនខ្លួនឯងនោះ វាជារឿងអយុត្តិធម៌បំផុត ដ្បិតថា លោកបញ្ជាឲ្យប៉ូលិសបាញ់សម្លាប់មនុស្សដទៃដែលប្រើប្រាស់គ្រឿងញៀននោះ ប៉ុន្តែលោកប្រើប្រាស់ខ្លួនឯង៕
Tag:
ហ្វីលីពីន
រ៉ូឌ្រីហ្គោ ឌូទើតេ
សង្គ្រាមគ្រឿងញៀន
© រក្សាសិទ្ធិដោយ thmeythmey.com