អន្តរជាតិ
×![]()
កំណើននៃការនាំចេញបន្លែ និងផ្លែឈើរបស់វៀតណាម មានល្បឿនយឺតគួរឲ្យកត់សម្គាល់ ក្នុងឆ្នាំ២០១៨។ នេះបើតាមការឲ្យដឹងរបស់ក្រសួងអភិវឌ្ឍន៍ជនបទ និងកសិកម្មវៀតណាម នៅថ្ងៃទី១១ ខែធ្នូ។ ជាមួយគ្នានេះ ក្រសួងក៏បានបញ្ជាក់ទៀតថា មូលហេតុនោះគឺមកពីឥទ្ធិពលអាកាសធាតុមិនអំណោយផលដល់ការធ្វើកសិកម្ម។
មន្ទីរអភិវឌ្ឍន៍ទីផ្សារ និងដំណើរការកសិកម្មនៃ ក្រសួងកសិកម្មវៀតណាម នៅថ្ងៃទី១១ ខែធ្នូ បានប៉ាន់ប្រមាណថា កំណើននៃការនាំចេញបន្លែ និងផ្លែឈើរបស់វៀតណាម សម្រាប់ពេញមួយឆ្នាំ២០១៨ គឺមានចំនួនត្រឹមតែ១០ភាគរយប៉ុណ្ណោះ។ បើតាមការចុះផ្សាយរបស់សារព័ត៌មាន Vietnam News ចំនួននេះគឺទាបជាងកំណើនជាភាគរយនៃការនាំចេញកាលពីឆ្នាំ២០១៧ ដែលស្មើនឹង ៤០ភាគរយឯណោះ។
មន្ទីរខាងលើនេះ បានគូសបញ្ជាក់ថា កត្តាដែលធ្វើឲ្យការនាំចេញបន្លែ និងផ្លែឈើរបស់វៀតណាម មានការថយចុះបែបនេះ គឺមកពីឥទ្ធិពលនៃអាកាសធាតុមិនអំណោយផល ដែលបណ្តាលឲ្យទិន្នផលកសិកម្មមានការធ្លាក់ចុះ។
យ៉ាងណាមិញ មន្ទីរដដែលក៏បានបញ្ជាក់ទៀតថា ផែនការដែលរដ្ឋាភិបាលបានដាក់ចេញ ក្នុងគោលដៅរកចំណូលឲ្យបានដល់ ១០ពាន់លានដុល្លារពីការនាំចេញផលិតផលកសិកម្មទាំងនេះនាឆ្នាំ២០២៥ នៅតែអាចធ្វើទៅរួច។
គួរបញ្ជាក់ដែរថា វៀតណាមបាននាំចេញបន្លែ និងផ្លែឈើ ដែលស្មើនឹងទំហំទឹកប្រាក់ ២,៤១ពាន់លានដុល្លារ ក្នុងរយៈពេល១១ខែ ពោលគឺចាប់ពីខែមករាដល់ខែវិច្ឆិកា ឆ្នាំ២០១៨។ ហើយក្នុងចំណោមនោះ ចិនជាទីផ្សារនាំចូលធំបំផុតរបស់វៀតណាម ដែលគ្របដណ្តប់ប្រមាណ ៧៣ភាគរយ នៃចំណូលសរុបសម្រាប់ការនាំចេញបន្លែ និងផ្លែឈើរបស់វៀតណាម៕
Tag:
វៀតណាម
សេដ្ឋកិច្ច
កសិកម្ម
© រក្សាសិទ្ធិដោយ thmeythmey.com
