ជាតិ
កម្ពុជាមានវារីអគ្គិសនីចំនួន៧ ផ្ដល់ថាមពលអគ្គិសនីចំនួន ២, ៦៤៨មេហ្គាវ៉ាត់
× ភ្នំពេញ៖ ការផលិតថាមពលអគ្គិសនីក្នុងប្រទេសកម្ពុជា បានកើនឡើងជាលំដាប់ ក្នុងរយៈពេល២ទសវត្សរ៍មកនេះ។ គិតត្រឹមចុងឆ្នាំ២០១៨នេះ កម្ពុជាផលិតថាមពលអគ្គិសនីបានប្រមាណ ២, ៦៤៨ មេហ្គាវ៉ាត់ តាមរយៈថាមពលជាច្រើន បានមកពីវារីអគ្គិសនី និងធ្យូងថ្ម ដែលជួយឲ្យកម្ពុជា កាត់បន្ថយការនាំចូលថាមពលពីប្រទេសជិតខាង និងតម្លៃអគ្គិសនីក្នុងប្រទេសក៏ថយចុះយ៉ាងគំហុកទៀតផង។
លោក ស៊ុយ សែម រដ្ឋមន្ត្រីក្រសួងរ៉ែ និងថាមពល បានថ្លែងក្នុងពិធីសម្ពោធដាក់ឲ្យប្រើប្រាស់វារីអគ្គិសនីសេសានក្រោម២ នៅខេត្តស្ទឹងត្រែង កាលពីព្រឹកថ្ងៃទី១៧ ធ្នូ ថាប្រភពអគ្គិសនីរបស់កម្ពុជា បានកើនជាបន្តបន្ទាប់ក្នុងរយៈពេល២ទសវត្សរ៍មកនេះ ពោលពី ១៥០មេហ្គាវ៉ាត់ នៅឆ្នាំ១៩៩៨ រហូតដល់ ២, ៦៤៨មេហ្គាវ៉ាត់ នៅចុងឆ្នាំ២០១៨ ។
បើតាមលោក រដ្ឋមន្ត្រីក្រសួងរ៉ែ និងថាមពល បច្ចុប្បន្ន កម្ពុជាមានទំនប់វារីអគ្គិសនី កំពុងដំណើរការចំនួន៧ រួមមាន ទំនប់វារីអគ្គិសនីគីរីរម្យ I (១២ មេហ្កាវ៉ាត់) ស្ថិតក្នុងខេត្តកំពង់ស្ពឺ។ ទំនប់វារីអគ្គិសនីកំចាយ (១៩៣ មេហ្កាវ៉ាត់) ស្ថិតក្នុងខេត្តកំពត ដែលបានចាប់ដំណើរការនៅឆ្នាំ ២០១១។ ទំនប់វារីអគ្គិសនីគីរីរម្យ III (១៨ មេហ្កាវ៉ាត់) បានចាប់ដំណើរការនៅឆ្នាំ ២០១៣។
លោក ស៊ុយ សែម រដ្ឋមន្ត្រីក្រសួងរ៉ែ និងថាមពល
ទំនប់វារីអគ្គិសនីស្ទឹងអាតៃ (១២០ មេហ្កាវ៉ាត់) ស្ថិតក្នុងខេត្តពោធិសាត់ ដែលបានចាប់ដំណើរការនៅឆ្នាំ ២០១៣។ទំនប់វារីអគ្គិសនីឫស្សីជ្រុំក្រោម (៣៣៨ មេហ្កាវ៉ាត់) ស្ថិតក្នុងខេត្តកោះកុង ដែលបានចាប់ដំណើរការនៅឆ្នាំ ២០១៤។ ទំនប់វារីអគ្គិសនីស្ទឹងតាតៃ (២៤៦ មេហ្កាវ៉ាត់) ស្ថិតក្នុងខេត្តកោះកុង ដែលបានដំណើរការក្នុងឆ្នាំ ២០១៤ និងចុងក្រោយវារីអគ្គិសនីសេសានក្រោម២ ផ្ដល់ថាមពលបាន ៤០០មេហ្គាវ៉ាត់ ស្ថិតនៅក្នុងខេត្តស្ទឹងត្រែង ដែលទើបសម្ពោធដាក់ឲ្យប្រើប្រាស់ជាផ្លូវការក្នុងថ្ងៃទី ១៧ ខែធ្នូ ឆ្នាំ២០១៨នេះ។
រដ្ឋាភិបាល កំពុងសិក្សាលទ្ធភាពលើគម្រោងវារីអគ្គិសនីជាច្រើនទៀត (២០១៧ដល់ ២០២៥) ក្នុងតំបន់ភាគឦសាន និងដងទន្លេមេគង្គ ដូចជាទន្លេសេសានក្រោម៣, ទន្លេសេសានក្រោម ១, ទន្លេស្រែពក ៣ និង៤ និងព្រែកល្អាង ១ និង ២, ជាយអារ៉ែង, ស្ទឹងពោធិ៍សាត់១, ស្ទឹងបាត់ដំបង២, ព្រែកឆ្លូង២, សេកុង, សំបូរ និងរោងចក្រដើរដោយធ្យូងថ្មចំនួន៤គម្រោង និងដោយយថាមពលកំដៅចំនួន១ផងដែរ៕
Tag:
វារីអគ្គិសនី
អគ្គិសនី
ជាតិ
© រក្សាសិទ្ធិដោយ thmeythmey.com