អ្នកស្លាប់ដោយសារស៊ូណាមិនៅឥណ្ឌូណេស៊ីកើនដល់ទៅ៣៧៣នាក់

អន្តរជាតិ

អ្នកស្លាប់ដោយសារស៊ូណាមិនៅឥណ្ឌូណេស៊ីកើនដល់ទៅ៣៧៣នាក់

25, Dec 2018 , 3:09 pm

រូបភាព

រូបថត AFP

ដោយ: ថ្មីៗ

រលកស៊ូណាមិ ដែលបង្កឡើងដោយបន្ទុះភ្នំភ្លើងនៅកោះ Krakatoa ប្រទេសឥណ្ឌូណេស៊ី កាលពីល្ងាចថ្ងៃសៅរ៍ ទី២២ ខែធ្នូ បណ្តាលឲ្យមនុស្សស្លាប់ឡើងដល់៣៧៣នាក់ហើយ ខណៈមនុស្សប្រមាណ១៤០០នាក់រងរបួស។ នេះបើតាមការផ្សាយរបស់ AFP ដោយបង្ហាញពីកំណើនអ្នកស្លាប់ពី២៨១នាក់នៅថ្ងៃចន្ទ កើនមកដល់៣៧៣នាក់ ដោយគិតត្រឹមព្រឹកថ្ងៃអង្គារនេះ ។

អត្ថបទទាក់ទង
អ្នកជំនាញជឿថា រលកយក្សស៊ូណាមិដ៏សាហាវនៅឥណ្ឌូណេស៊ីកើតព្រោះផ្ទុះភ្នំភ្លើង Anak Krakatau
រលកស៊ូណាមិនៅឥណ្ឌូណេស៊ី សម្លាប់មនុស្ស២០នាក់

តំបន់ឆ្នេរ ដែលសម្បូរទៅដោយទេសចរនៅជុំវិញច្រក Sunda បានរងនូវការបំផ្លិចបំផ្លាញ ហើយប៉ះពាល់យ៉ាងខ្លាំងចំពោះពលរដ្ឋមូលដ្ឋាន និងអ្នករកស៊ីខាងវិស័យទេសចរណ៍។ លោក Sutopo Purwo Nugroho អ្នកនាំពាក្យភ្នាក់ងារគ្រប់គ្រងគ្រោះមហន្តរាយជាតិឥណ្ឌូណេស៊ី បានអះអាងផងដែរថា មនុស្សប្រមាណ១២៨នាក់កំពុងបាត់ខ្លួន ជាពិសេសនៅភាគខាងត្បូងស៊ូម៉ាត្រា និងខាងលិចកោះជ្វា។

អ្វីដែលគួរសម្គាល់ ភរិយាតារាចម្រៀង Riefian Fajarsyah នៃក្រុម Seventeen ដ៏ល្បីល្បាញនៅឥណ្ឌូណេស៊ី គឺអ្នកស្រី Dylan Sahara ដែលជាតារាសំដែង និងតារាទូរទស្សន៍ម្នាក់ផងដែរនោះ ក៏បានបាត់បង់ជីវិតផងដែរ។

នាពេលស៊ូណាមិបោកបក់ អ្នកស្រី Dylan Sahara ស្ថិតនៅស្រុកកំណើតខ្លួនក្នុងក្រុង Ponorogo នៃកោះជ្វា។ លោក Riefian Fajarsyah រៀបចំពិធីបុណ្យសព្វភរិយាខ្លួននាថ្ងៃអង្គារ៍នេះ៕