សម្ដេច ហ៊ុន សែន បន់ឲ្យលោក សម រង្ស៊ី ចូលស្រុក តែអាជ្ញាធរត្រូវត្រៀមខ្នោះដៃ

ជាតិ

នយោបាយជាតិ

សម្ដេច ហ៊ុន សែន បន់ឲ្យលោក សម រង្ស៊ី ចូលស្រុក តែអាជ្ញាធរត្រូវត្រៀមខ្នោះដៃ

26, Dec 2018 , 9:32 am

រូបភាព

ដោយ: ថ្មីៗ

ភ្នំពេញ៖ ពីពិធីសំណេះសំណាលជាមួយកម្មកររោងចក្រជាង១ម៉ឺននាក់ នៅខេត្តកណ្ដាល ព្រឹកនេះ សម្ដេចនាយករដ្ឋមន្ត្រី ផ្ដាំឲ្យលោក សម រង្ស៊ី ចូលស្រុកតាមការសន្យា បើសិនជាលោក សម រង្ស៊ី ភ្នាល់ចាញ់សម្ដេច រឿងដោះលែងលោក កឹម សុខា។ សម្ដេច ហ៊ុន សែន ក៏បានត្រៀមខ្នោះសម្រាប់លោក សម រង្ស៊ី ផងដែរ។

ថ្លែងក្នុងពិធីសំណេះសំណាលជួបកម្មករនេះ សម្ដេច ហ៊ុន សែន បានរំឭកពីកាលបរិច្ឆេទនៃការភ្នាល់គ្នា ដែលលោក សម រង្ស៊ី អះអាងថា រដ្ឋាភិបាល នឹងដោះលែងលោក កឹម សុខា យ៉ាងយូរនៅដើមខែមីនា ឆ្នាំ២០១៩ខាងមុខ។ សម្ដេច បានថ្លែងផ្លែផ្កាថា បើសិនជាគ្មានការដោះលែងលោក កឹម សុខា ដូចការភ្នាល់គ្នានោះ លោក សម រង្ស៊ី ត្រូវចូលមកក្នុងស្រុកខ្មែរ តាមការសន្យា។

ថ្លែងបែបចំអកទៅលោក សម រង្ស៊ី ប្រមុខរដ្ឋាភិបាល បាននិយាយថា អាជ្ញាធរបានត្រៀមខ្នោះដៃ សម្រាប់ទទួលវត្តមានអ្នកក្លាហាន(សម រង្ស៊ី)ចូលមកស្រុកជានិច្ច។

«បើសិនជាហ៊ានចូលស្រុក អ្នកឯងនឹងបានចូលគុក ក្នុងថ្ងៃចូលឆ្នាំ ហើយអ្នកឯងប្រហែលក្លាយជាវិរៈបុរសនៃការជាប់គុក។ ប៉ុន្តែខ្ញុំជឿថា មនុស្សនេះកំសាកបំផុត មិនហ៊ានចូលមកស្រុកទេ។ ខ្ញុំនិយាយដូចនេះរុញឲ្យអ្នកឯងចូលមក»។ នេះជាការលើកឡើងរបស់ប្រមុខរដ្ឋាភិបាល ដែលចាត់ទុកទង្វើរបស់លោក សម រង្ស៊ី ដែលយកសេរីភាពលោក កឹម សុខា មកភ្នាល់ជាមួយសម្ដេចនេះ គឺជារឿងមិនត្រឹមត្រូវឡើយ។

នាយករដ្ឋមន្ត្រី ហ៊ុន សែន ក៏បានប្រាប់ឲ្យអាកាសចរណ៍ទាំងអស់ ទទួលលោក សម រង្ស៊ី ចូលមកស្រុកផងដែរ បើសិនអតីតប្រមុខមេដឹកនាំបក្សប្រឆាំងរូបនេះ ចង់ចូលមក ។