ជាតិ
សម្ដេច ហ៊ុន សែន ច្រានចោលព័ត៌មានចាប់លោកឧកញ៉ា គិត ម៉េង រូបពីហ្វេសប៊ុកសភាពាណិជ្ជកម្ម៖ លោកឧកញ៉ា គិត ម៉េង ម្ចាស់ក្រុមហ៊ុន Royal Group
× ភ្នំពេញ៖ បន្ទាប់ពីលេចឮដំណឹងថា លោកឧកញ៉ា គិត ម៉េង ដែលម្ចាស់ក្រុមហ៊ុន Royal Group ត្រូវបានអាជ្ញាធរចាប់ខ្លួន តាមបញ្ជានាយករដ្ឋមន្ត្រីនោះ សម្ដេច ហ៊ុន សែន ក៏ចេញមុខបដិសេធរឿងនេះ។
សូមស្តាប់សម្លេង សម្តេច ហ៊ុន សែន៖
ថ្លែងក្នុងពិធីជួបសំណេះសំណាលជាមួយកម្មកររោងចក្រជាង១ម៉ឺននាក់ នៅខេត្តកណ្ដាល ព្រឹកនេះ សម្ដេច ហ៊ុន សែន បានប្រតិកម្មតបព័ត៌មានដែលចុះផ្សាយថា លោក គិត ម៉េង ត្រូវបានអាជ្ញាធរចាប់ខ្លួននេះ គឺជារឿងបំភ្លៃការពិត ដើម្បីបង្កភាពចលាចលប៉ុណ្ណោះ។
«ប៉ុន្មានថ្ងៃនេះ ស្រាប់តែវីវរហើយ សម្ដេច ចាប់ គិត ម៉េង បាត់ទៅហើយ។ អាឡប់! ប៉ុន្តែព័ត៌មានបែបនេះ គឺទៅជាព័ត៌មានភូតកុហកមួយ ដែលបាត់តម្លៃអស់»។ នេះជាការលើកឡើងរបស់សម្ដេច ហ៊ុន សែន។
ទាក់ទងនឹងព័ត៌មានខាងលើនេះ គឺកើតចេញពីមានការបែកធ្លាយសារសំឡេងរបស់សម្ដេច ហ៊ុន សែន ដែលបានទូរសព្ទទៅអគ្គនាយកទូរទស្សន៍CNC លោក អ៊ុក វូរ៉ា ដោយប្រាប់ឲ្យបុគ្គលរូបនេះ ចុះចេញតួនាទី ។ សំណើរបស់សម្ដេច ហ៊ុន សែន តាមទូរសព្ទទៅលោក អ៊ុក វូរ៉ា ធ្វើឡើងក្រោយពីឮដំណឹងថា អគ្គនាយកទូរទស្សន៍CNCរូបនេះ បណ្ដេញស្ត្រីបុគ្គលិកមានផ្ទៃពោះម្នាក់ចេញពីការងារ ហើយក៏ត្រៀមផ្លាស់ប្តូរបុគ្គលិក៣០រូបទៀតផងដែរ។ តាមរយៈសំឡេងបែកធ្លាយប្រមាណ១០នាទីនោះ សម្ដេច ហ៊ុន សែន ក៏បានដាក់កំហិតឲ្យលោក អ៊ុក វូរ៉ា ត្រូវតែលាឈប់ពីតួនាទីអគ្គនាយកទូរទស្សន៍នេះភ្លាម បើមិនចង់មានបញ្ហាជាមួយសម្ដេច។ មិនត្រឹមតែប្រាប់ឲ្យលោក វូរ៉ា ឈប់ពីការងារនោះទេ សម្ដេច ហ៊ុន សែន ក៏បានព្រលយពាក្យគំរាមដល់លោក គិត ម៉េង ពីរឿងមុខរបរធ្វើជំនួញផងដែរ បើសិនជាលោកឧកញ៉ារូបនេះ នៅតែរក្សាទុកលោក អ៊ុក វូរ៉ា នៅក្នុងតួនាទីអគ្គនាយកទូរទស្សន៍CNC បន្តទៀត៕
© រក្សាសិទ្ធិដោយ thmeythmey.com