ប្រធានក្រុមប្រឹក្សារាជបល្ល័ង្កថៃប្រាប់លោកប្រាយុទ្ធ កុំឲ្យចាត់ទុកក្រុមអ្នកប្រឆាំងជាសត្រូវ

អន្តរជាតិ

ប្រធានក្រុមប្រឹក្សារាជបល្ល័ង្កថៃប្រាប់លោកប្រាយុទ្ធ កុំឲ្យចាត់ទុកក្រុមអ្នកប្រឆាំងជាសត្រូវ

28, Dec 2018 , 7:39 pm

រូបភាព

ពីឆ្វេង នាយករដ្ឋមន្ត្រីថៃ ប្រាយុទ្ធ ចាន់អូចា, នៅពីក្រោយលោកប្រាយុទ្ធ ឧបនាយករដ្ឋមន្ត្រីថៃ Prawit Wongsuwan, បន្ទាប់មក ប្រធានក្រុមប្រឹក្សារាជបល្ល័ង្កថៃ លោក Prem Tinsulanonda (កណ្តាល) ប្រភពរូប៖ The Nation

ដោយ:

ប្រធានក្រុមប្រឹក្សារាជបល្ល័ង្កថៃ លោក Prem Tinsulanonda នៅថ្ងៃទី ២៧ ខែធ្នូ បានផ្តល់យោបល់ទៅកាន់មេដឹកនាំរបបសឹកថៃ ឧត្តមសេនីយិ៍ ប្រយុទ្ធ ចន្ទអូចា ឲ្យចាត់ទុកក្រុមអ្នកប្រឆាំង និងក្រុមអ្នករិះគន់របស់លោកជាមិត្ត ពុំមែនជាសត្រូវឡើយ។

ការលើកឡើងរបស់លោក Prem បានធ្វើឡើង អំឡុងពេលលោកកំពុងទទួលស្វាគមន៍លោក ប្រាយុទ្ធ និងសមាជិកនៃគណៈរដ្ឋមន្ត្រីថៃ នៅឯផ្ទះរបស់លោកផ្ទាល់តែម្តង។ នៅថ្ងៃព្រហស្បត្តិ៍ នាយករដ្ឋមន្ត្រីថៃ ប្រាយុទ្ធ ចន្ទអូចា ដែលក៏ជាប្រធានក្រុមប្រឹក្សាជាតិដើម្បីសណ្តាប់ធ្នាប់ និងសន្តិភាព (NCPO) ផងដែរនោះ បានដឹកនាំសមាជិកគណៈរដ្ឋមន្ត្រីសំខាន់ៗ និងមេទ័ពកំពូលនៃកងទ័ពជើងគោកភូមិន្ទថៃ ដើម្បីជូនពរឆ្នាំថ្មីដល់លោក Prem Tinsulanonda ។

ដើម្បីជាការឆ្លើយតបទៅនឹងការសួរសុខទុក្ខនេះ លោក Prem បានផ្តល់ការជូនពររបស់លោក និងចែករំលែកចំណេះដឹងទៅកាន់មន្ត្រីសំខាន់ៗទាំងនោះផងដែរ ជាពិសេស គឺលោកប្រាយុទ្ធតែម្តង។ យោងតាមសារព័ត៌មានថៃ The Nation លោក Prem បានលើកឡើងបែបនេះ៖ «លោកនាយករដ្ឋមន្ត្រីគួរតែចាត់ទុកក្រុមអ្នកប្រឆាំង និងក្រុមអ្នកដែលមិនយល់ស្របនឹងលោក ជាមិត្ត។ កុំចាត់ទុកពួកគេជាសត្រូវ។ វាពុំមានលទ្ធផលល្អនោះទេ»។

«ការខ្វែងគំនិតគ្នាគឺមានសារៈសំខាន់ និងពុំអាចជៀសរួចនោះទេ។ ខ្ញុំចង់ឲ្យលោកនាយករដ្ឋមន្ត្រីធ្វើខ្លួនបែបនេះ…គឺថា ខ្ញុំមិនយល់ស្របជាមួយអ្នក ប៉ុន្តែខ្ញុំអាចក្លាយជាមិត្តរបស់អ្នកបាន។ ក្នុងផ្លូវនេះ រឿងរ៉ាវនឹងទៅមុខយ៉ាងរលូន។ ខ្ញុំចង់ឲ្យលោកនាយករដ្ឋមន្ត្រីចងចាំទុកថា វាប្រហែលមានប្រយោជន៍សម្រាប់លោក ដ្បិតវាទទួលបានផលសម្រាប់ខ្ញុំ»។ នេះជាការបកស្រាយបន្ថែមរបស់លោក Prem ។

តាមពិតទៅ លោក Prem Tinsulanonda ស្ថិតក្នុងវ័យ៩៨ឆ្នាំ ធ្លាប់បានកាន់តំណែងជាប្រមុខរដ្ឋាភិបាលថៃដែលពុំទទួលបានការបោះឆ្នោត ពីខែឧសភា ឆ្នាំ១៩៧៩ ទៅដល់ខែសីហា ឆ្នាំ១៩៨៦។ ជាអតីតមេទ័ពកំពូលថៃ លោកនៅតែត្រូវបានគេចាត់ទុក ជាបុគ្គលដ៏មានឥទ្ធិពលមួយរូបក្នុងប្រទេសថៃ ទោះបីជាលោកពុំមានតួនាទីក្នុងជួររដ្ឋាភិបាល ឬនយោបាយក្តី។

យោងតាមសារព័ត៌មានថៃដដែល លោក ប្រាយុទ្ធបានឆ្លើយតបទៅនឹងការផ្តល់យោបល់របស់លោក Prem ដោយបានបញ្ជាក់ថា លោកធ្វើជាមិត្តជាមួយមនុស្សគ្រប់គ្នា។ «ខ្ញុំពុំចាត់ទុកមនុស្សគ្រប់គ្នាជាសត្រូវនោះទេ»។

ក្នុងចំណោមសមាជិកសំខាន់ៗរបស់គណៈរដ្ឋមន្ត្រីថៃដែលអមដំណើរជាមួយលោកនាយករដ្ឋមន្ត្រីថៃ ឧត្តមសេនីយ៍ ប្រាយុទ្ធ ចន្ទអូចា គឺរួមមានដូចជា ឧបនាយករដ្ឋមន្ត្រីថៃ ឧត្តមសេនីយ៍ Prawit Wongsuwan, រដ្ឋមន្ត្រីក្រសួងមហាផ្ទៃឧត្តមសេនីយ៍ Anupong Paochinda និងឧបនាយករដ្ឋមន្ត្រីឧត្តមសេនីយ៍ Chatchai Sarikulya៕