លោក នួន ផារ័ត្ន៖ អាជ្ញាធរគ្មានគម្រោងរុះរើផ្សារដើមគរ ឬតម្រូវឲ្យអាជីវករដូរទីតាំងឡើយ

ជាតិ

សង្គមជាតិ

លោក នួន ផារ័ត្ន៖ អាជ្ញាធរគ្មានគម្រោងរុះរើផ្សារដើមគរ ឬតម្រូវឲ្យអាជីវករដូរទីតាំងឡើយ

04, Jan 2019 , 11:41 am

រូបភាព

នួន ផារ័ត្ន អភិបាលរងរាជធានីភ្នំពេញ ធ្វើសន្និសីទកាសែត នៅព្រឹកថ្ងៃទី៤ ខែមករា ឆ្នាំ២០១៩ ដើម្បីបកស្រាយពីការយល់ច្រឡំរឿងរើផ្សារដើមគរ ទៅបឹងតាមោក។ រូបពីរដ្ឋបាលរាជធានីភ្នំពេញ

ដោយ: ឡាយ សុភាវតី

ក្រោយមានសាធារណជនខ្លះ យល់ច្រឡំថា ផ្សារដើមគរទាំងមូល នឹងត្រូវប្តូរទៅទីតាំងថ្មី រដ្ឋបាលរាជធានីភ្នំពេញ ក៏បានចេញមកបដិសេធ តាមរយៈសន្និសីទកាសែត នាព្រឹកថ្ងៃទី៤ ខែមករា ឆ្នាំ២០១៩នេះ ដោយមានលោក នួន ផារ័ត្ន អភិបាលរង ជាអ្នកបកស្រាយ។

លោក នួន ផារ័ត្ន លើកឡើងថា រដ្ឋបាលរាជធានីភ្នំពេញ គ្មានគម្រោងរុះរើផ្សារដើមគរទាំងស្រុង ហើយប្រគល់ឲ្យក្រុមហ៊ុនឯកជន វិនិយោគនោះទេ។ «សូមបញ្ជាក់ឲ្យច្បាស់ថា រដ្ឋបាលរាជធានភ្នំពេញ មិនមានគោលបំណងរុះរើផ្សារដើមគរទេ។ បើមាន ដាច់ខាត យើងត្រូវតែពិគ្រោះយោបល់ជាមួយបងប្អូនអាជីវករទាំងអស់»។

អភិបាលរងរូបនេះ បកស្រាយថា អ្វីដែលរដ្ឋបាលរាជធានីភ្នំពេញ នឹងធ្វើនោះ គឺបង្កើតផ្សារថ្មីមួយ នៅបឹងតាមោក ដើម្បីឲ្យអាជីវករ លក់បោះដុំបន្លែផ្លែឈើ និង ធ្វើជាចំណតរថយន្ត។ លោក សង្កត់ធ្ងន់ថា គោលបំណងនៃការបង្កើតផ្សារថ្មី នៅបឹងតាមោក គឺដើម្បីសម្រួលចរាចរណ៍ និងការពារបរិស្ថាន។ លោក បន្ថែមថា កន្លងមក ការលក់បន្លែផ្លែឈើនិងរបស់ផ្សេងៗទៀត នៅតាមដងផ្លូវ ជាប់ផ្សារដើមគរ បានធ្វើឲ្យកកស្ទះចរាចរណ៍និងប៉ះពាល់ដល់បរិស្ថាន។

អាជីវករ និងប្រជាពលរដ្ឋ មានការភ្ញាក់ផ្អើល នៅពេលផ្ទុះដំណឹងថា អាជ្ញាធរ នឹងរើផ្សារដើមគរ ទៅបឹងតាមោក។ មានការភ្ញាក់ផ្អើលនិងការភាន់ច្រឡំបែបនេះ ទំនងដោយសារតែគេ ឃើញសេចក្តីសម្រេចរបស់ទីស្តីការគណៈរដ្ឋមន្ត្រី ដែលសរសេរថា រដ្ឋាភិបាល «អនុញ្ញាតឲ្យរើផ្សារបន្លែពីផ្សារដើមគរ ទៅផ្សារថ្មីនៅបឹងតាមោក»។

តាមពិត ទីស្តីការគណៈរដ្ឋមន្ត្រី បានចេញសេចក្តីសម្រេចអំពីរឿងនេះ តាំងពីអំឡុងខែសីហា ឆ្នាំ២០១៨មកម្ល៉េះ ប៉ុន្តែទើបនឹងបែកធ្លាយ។ ទីស្តីការគណៈរដ្ឋមន្ត្រី បញ្ជាក់ថា ការសម្រេចប្តូរផ្សារដើមគរនេះ គឺយោងតាមចំណាររបស់សម្តេចនាយករដ្ឋមន្ត្រី ហ៊ុន សែន។ ដីសម្រាប់បង្កើតផ្សារថ្មី នៅបឹងតាមោក មានទំហំ២០ហិកតា៕