អន្តរជាតិ
ព្រឹទ្ធសភាអាមេរិក បញ្ជូនសំណើតែងតាំងលោក Murphy ជាអគ្គរដ្ឋទូតប្រចាំកម្ពុជាឲ្យលោក ត្រាំ វិញ លោក Patrick Murphy (រូបភាព ស្ថានទូតអាមេរិកប្រចាំកម្ពុជា)
× ព្រឹទ្ធសភាអាមេរិក កាលពីថ្ងៃទី៣ ខែមករា បានបញ្ជូនបេក្ខភាពលោក Patrick Murphy ជាអគ្គរដ្ឋទូតអាមេរិកប្រចាំកម្ពុជាទៅឲ្យប្រធានាធិបតី ដូណាល់ ត្រាំ វិញ។ ការបញ្ជូនត្រឡប់វិញ ធ្វើឡើងបន្ទាប់ពីបេក្ខភាពរបស់លោក Murphy មិនត្រូវបានព្រឹទ្ធសភានីតិកាលទី១១៥ យល់ព្រមឡើយ។
មុនបញ្ចប់នីតិកាលទី១១៥ ព្រឹទ្ធសភាអាមេរិក បានអនុម័តសំណើតែងតាំងជាច្រើនដែលលើកឡើងដោយប្រធានាធិបតី ដូណាល់ ត្រាំ ។ អ្វីគួរឲ្យកត់សម្គាល់នោះ បេក្ខភាពអគ្គរដ្ឋទូតអាមេរិកនៅបរទេសប្រមាណ១៥នាក់ ត្រូវបានព្រឹទ្ធសភាអាមេរិកនីតិកាលទី១១៥ អនុម័ត មុនព្រឹទ្ធសភានីតិកាលទី១១៦ ចូលកាន់តំណែង។
ការបញ្ជូនបេក្ខភាពលោក Murphy ទៅឲ្យប្រធានាធិបតីអាមេរិកវិញ គឺជា
ការអនុវត្តតាមកថាខណ្ឌ៦ មាត្រា៣១ នៃបទបញ្ជាផ្ទៃក្នុងព្រឹទ្ធសភាអាមេរិក។ កថាខណ្ឌនេះចែងថា៖ ការស្នើណាមួយដែលមិនត្រូវបានយល់ព្រម ឬបដិសេធក្នុងនីតិកាលដែលត្រូវបានស្នើឡើង នឹងមិនត្រូវបានលើកមកជជែកនៅនីតិកាលថ្មីដោយគ្មានស្នើជាថ្មីដោយប្រធានាធិបតីឡើយ។ ក្នុងករណីព្រឹទ្ធសភាផ្អាក ឬស្ថិតក្នុងវិស្សមកាលច្រើនជាង៣០ថ្ងៃ សំណើតែងតាំងទាំងអស់ដែលកំពុងស្ថិតក្នុងដំណើរការ ហើយមិនទាន់បញ្ចប់អឡុងពេលនេះ នឹងត្រូវបញ្ជូនត្រឡប់ទៅប្រធានាធិបតីតាមរយៈរដ្ឋមន្ត្រីការបរទេស ហើយសំណើទាំងនេះ នឹងមិនត្រូវបានពិចារណាឡើយរហូតដល់មានការស្នើឡើងវិញពីសំណាក់ប្រធានាធិបតី។»
សូមបញ្ជាក់ថា លោក Murphy ដែលជាឧបការីរងរដ្ឋមន្ត្រីការបរទេសទទួលបន្ទុកកិច្ចការងារអាស៊ីបូព៌ា និងប៉ាស៊ីហ្វិកត្រូវបានតែងតាំងដោយលោក ត្រាំ ជាឯកអគ្គរដ្ឋទូតវិសាមញ្ញនិងពេញសមត្ថភាពរបស់អាមេរិកប្រចាំនៅកម្ពុជាកាលពីថ្ងៃទី១០ ខែសីហា។ សំណើតែងតាំងលោក ត្រូវបញ្ជូនទៅដល់ព្រឹទ្ធសភានៅថ្ងៃទី១៦ ខែដដែល ហើយគណៈកម្មាធិការការបរទេសព្រឹទ្ធសភាបានបើកសវនាការដេញដោលរួបលោកនៅថ្ងៃទី៤ ខែធ្នូ ឆ្នាំ២០១៨ ៕
Tag:
កម្ពុជា
អាមេរិក
Patrick Murphy
© រក្សាសិទ្ធិដោយ thmeythmey.com