អន្តរជាតិ
ប្រជាជនចិនកើនដល់១,៤៤ពាន់លាននាក់ក្នុងឆ្នាំ២០២៩ មុនធ្លាក់ចុះទប់មិនជាប់នៅឆ្នាំ២០៣០
×![]()
ដោយ: តន ចាន់រិទ្ធារ៉ា
ប្រជាជនចិន នឹងកើនដល់ចំនួន១, ៤៤ពាន់លាននាក់ក្នុងឆ្នាំ២០២៩ ដែលជាចំណុចខ្ពស់បំផុត។ នេះបើតាមការសិក្សារបស់បណ្ឌិត្យសភាវិទ្យាសាស្ត្រនយោបាយរបស់ចិន (CASS) ។ ឡើងដល់ចំណុចកំពូលហើយនោះ ចំនួនប្រជាជនចិននឹងចាប់ផ្ដើមធ្លាក់ចុះវិញក្នុងល្បឿនដែលមិនអាចទប់ស្កាត់បាននៅឆ្នាំបន្ទាប់។ ការធ្លាក់ចុះចំនួនប្រជាជនសកម្ម និងការកើនឡើងចំនួនប្រជាជនវ័យចំណាស់ នឹងបង្កផលប៉ះពាល់ដល់សេដ្ឋកិច្ច និងសង្គម បើរដ្ឋាភិបាលមិនចាត់វិធានការទេនោះ។
ចិន នឹងនៅតែជាប្រទេសមានច្រើនជាងគេលើលោកក្នុងរយៈពេល១០ឆ្នាំទៅមុខ។ ក្នុងការសិក្សារបស់បណ្ឌិត្យសភាវិទ្យាសាស្ត្រនយោបាយរបស់ចិន (CASS) ចំនួនប្រជាជនចិននឹងកើនដល់១, ៤៤ពាន់លាននាក់នៅឆ្នាំ ២០២៩ ។ កំណើនប្រជាជនដ៏សន្ធឹកសន្ធាប់នេះ ជាលទ្ធផលនៃការលុបចោលនយោបាយកូនមួយក្នុងឆ្នាំ២០១៦ ដែលចាប់ពីពេលនោះ ប្រជាជនចិនអាចមានកូនពីរនាក់ ប៉ុន្តែវាក៏ជាសញ្ញាបង្ហាញថា បញ្ហាប្រឈមនឹងកើតឡើងនៅពេលបន្ទាប់ដែរ។
ការសិក្សាដែលផ្សាយក្នុងសៀវភៅបៃតងស្ដីពីប្រជាជននិងការងារកាលពីចុងសប្ដាហ៍មុន CASS អះអាងថា កំណើនប្រជាជននេះ នឹងចាប់ផ្ដើមធ្លាក់ក្នុងឆ្នាំ២០៣០ វិញ ហើយដែលមិនអាចបញ្ឈប់បានឡើយ។ ក្នុងន័យនេះ ស្ថាប័នរដ្ឋចិនមួយនេះបានស្នើឲ្យរដ្ឋាភិបាលមានចំណាត់ការដើម្បីដោះស្រាយទំហំប្រជាជនសកម្មដែលមានតិច និងកំណើនប្រជាជនមានអាយុច្រើន ដ្បិតចរន្តទាំងនេះ នឹងធ្វើឲ្យសេដ្ឋកិច្ច និងសង្គមចិនជួបវិបត្តិមិនខាន។
បើតាម CASS ចំនួនប្រជាជនសកម្មរបស់ចិនពេលនេះ នឹងជាប់ទ្រឹង ហើយអត្រាបង្កកំណើតដែលមានកម្រិតទាប នឹងធ្វើឲ្យចំនួនប្រជាជនសកម្មកាន់តែធ្លាក់ចុះ។ នៅពាក់កណ្ដាលសតវត្សរ៍នេះ ចំនួនប្រជាជនចិនត្រូវប៉ាន់ស្មានថា នឹងធ្លាក់មកត្រឹម១,៣៦ពាន់លាននាក់ ឯប្រជាជនសកម្មនឹងថយចុះចំនួនជិត ២០០លាននាក់ឯណោះ។ បើអត្រាបង្កកំណើតនៅតែធ្លាក់ចុះទៀត ចិននឹងមានប្រជាជនចំនួន១,១៧ពាន់នាក់ក្នុងឆ្នាំ ២០៦៥ ។
ដើម្បីដោះស្រាយការធ្លាក់ចុះចំនួនប្រជាជនសកម្ម ក្រុងប៉េកាំងសម្រេចចិត្តលុបចោលបម្រាមយកកូនលើសពីមួយនៅឆ្នាំ ២០១៦ ប៉ុន្តែនេះជាដំណោះស្រាយរយៈពេលវែងប៉ុណ្ណោះ។ នៅរយៈពេលខ្លី ចិននៅតែជួបបញ្ហាប្រឈម ដ្បិតអត្រាបង្កកំណើតមានត្រឹម ៣,៥ភាគរយនៅឆ្នាំ២០១៧ ហើយឆ្នាំ២០១៨ ក៏មានកម្រិតទាបដែរ។
ការសិក្សាដដែលក៏បានព្រមានពីការកើនឡើងចំនួនប្រជាជនពឹងផ្អែកលើអ្នកដទៃ ហើយមិនអាចបំពេញពលកម្មបានដូចជាកូនក្មេង និងមនុស្សចាស់។ ការដកចេញនយោបាយកូនមួយ ធ្វើឲ្យចំនួនកូនក្មេងកើនឡើង ស្របគ្នានឹងការកើនឡើងចំនួនមនុស្សវ័យចំណាស់ដែរ។ គេរំពឹងថា ចរន្តកើនឡើងនេះ នឹងកើតមានយ៉ាងហោចណាស់ក៏ពីរ ឬបីទសវត្សរ៍ទៀតដែរ។ ក្នុងការទស្សទាយកន្លងមក ចំនួនប្រជាជនវ័យចំណាស់នៅចិននឹងកើនដល់៤០០លាននាក់នៅចុងឆ្នាំ២០៣៥ ៕
Tag:
ចិន
CASS
ប្រជាជនសកម្ម
© រក្សាសិទ្ធិដោយ thmeythmey.com
