អន្តរជាតិ
ម៉ាឌុយរ៉ូ ការពារភាពស្របច្បាប់ជាមេដឹកនាំវ៉េណេស៊ុយអេឡា ខណៈសភា និងអន្តរជាតិមិនទទួលស្គាល់
×![]()
ដោយ: ថ្មីៗ
លោក នីកូឡា ម៉ាឌុយរ៉ូ បានការពារភាពស្របច្បាប់នៃរដ្ឋាភិបាលខ្លួននៅចុងសប្តាហ៍កន្លងមកនេះ ស្របពេលដែលលោកត្រូវស្បថចូលកាន់តំណែងជាប្រធានាធិបតីក្នុងអាណត្តិទីពីរ។ ការចេញមុខការពារខ្លួនធ្វើឡើង ស្របពេលដែលរដ្ឋសភាវ៉េណេស៊ុយអេឡា ដែលដឹកនាំដោយបក្សប្រឆាំង និងសហគមន៍អន្តរជាតិថ្កោលទោស និងបដិសេធទទួលលោក ម៉ាឌុយរ៉ូជាមេដឹកនាំស្របច្បាប់ទៀត។
ប្រធានាធិបតីវ៉េណេស៊ុយអេឡា លោក នីកូឡាស ម៉ាឌុយរ៉ូ នឹងចាប់ផ្តើមស្បថចូលកាន់តំណែងសម្រាប់អាណត្តិទីពីរនៅថ្ងៃ ១០ខែមករា ខណៈដែលរដ្ឋអាមេរិកឡាទីនមួយនេះកំពុងប្រឈមនឹងការក្ស័យធនសេដ្ឋកិច្ច និងធ្លាក់ផុតជ្រៅក្នុងវិបត្តិសង្គម និងនយោបាយផង។
ថ្វីបើបញ្ហាកើតឡើងច្រើន ហើយមានចលនាប្រឆាំងទាំងក្នុង និងក្រៅប្រទេសក៏ដោយ លោក ម៉ាឌុយរ៉ូ នៅតែអះអាងថា អំណាចដែលលោកទទួលបានគឺស្របច្បាប់ និងផ្តល់ឲ្យដោយប្រជាពលរដ្ឋវ៉េណេស៊ុយអេឡា តាមរយៈការបោះឆ្នោតផង។
តាមគណនី Twitter ប្រធានាធិបតីដែលមានប្រវត្តិធ្លាប់ជាអ្នកបើកបររថយន្តរបស់លោក ហ៊ូហ្គោ ឆាវែស ខាងលើបានសង្កត់ធ្ងន់ដូច្នេះ៖ «ភាពស្របច្បាប់ត្រូវបាផ្តល់ឲ្យយើងដោយប្រជាជនតាមការបោះឆ្នោត។ អ្នកដែលសង្ឃឹមចង់បំផ្លាញឆន្ទៈរបស់យើង កុំបង្កើតកំហុសឲ្យសោះ។ វ៉េណេស៊ុយអេឡា ត្រូវតែទទួលការគោរព»។
លោក ម៉ាឌុយរ៉ូ បានជាប់ឆ្នោតជាថ្មីនៅក្នុងការបោះឆ្នោតថ្ងៃ ២០ ខែឧសភាកន្លងទៅ ដែលស្នើឡើងដោយសភាធម្មនុញ្ញដែលជាអាយ៉ងរបស់រដ្ឋាភិបាលរបស់លោក ម៉ាឌុយរ៉ូផង។ ប៉ុន្តែការបោះឆ្នោតនោះមិនមានការចូលរួមពីសមាជិកបក្សប្រឆាំងឡើយ ដ្បិតមេដឹកនាំពួកគេភាគច្រើនត្រូវបានហាមឃាត់ និងស្ថិតក្រោមការឃុំឃាំងក្នុងផ្ទះផង។ លទ្ធផលក៏រងការថ្កោលទោសខ្លាំងពីសហគមន៍អន្តរជាតិ និងមិនមានការទទួលស្គាល់ពីអង្គការរដ្ឋអាមេរិកឡើយ។
មុនពេលពិធីស្បថចូលកាន់តំណែងផ្លូវការមកដល់ សភាវ៉េណេស៊ុយអេឡា ដែលបច្ចុប្បន្នដឹកនាំដោយតំណាងរាស្ត្របក្សប្រឆាំងបានចេញមុខបដិសេធទទួលលោក ម៉ាឌុយរ៉ូ ជាមេដឹកនាំស្របច្បាប់រួចទៅហើយ។
ទីភ្នាក់ងារព័ត៌មាន AFP ផ្សាយថា សភាវ៉េណេស៊ុយអេឡា ប្រកាសជាផ្លូវការថា តំណាងប្រធានាធិបតីរបស់លោក ម៉ាឌុយរ៉ូ មិនស្របច្បាប់ និងស្នើឲ្យមានការរៀបចំរដ្ឋាភិបាលអន្តរកាលមួយផងដើម្បីរៀបចំការបោះឆ្នោតប្រជាធិបតេយ្យនៅពេលខាងមុខដែរ។
មុនមានការប្រកាសពីសភាវ៉េណេស៊ុយអេឡា ប្រទេសជាច្រើនដូចជា កាណាដា អាមេរិក សហភាពអឺរ៉ុប និងប្រទេសនៅតំបន់អាមេរិកខាងត្បូង និងអាមេរិកណ្តាលប្រកាសជាមុនហើយថា ពួកគេនឹងមិនទទួលស្គាល់លោក ម៉ាឌុយរ៉ូជាមេដឹកនាំស្របច្បាប់ទេ ហើយប្រទេសទាំងនេះក៏ទាមទារឲ្យមេដឹកនាំផ្តាច់ការរូបនេះចុះចេញពីតំណែងដូចគ្នា។
សូមបញ្ជាក់ថា វ៉េណេស៊ុយអេឡា ដែលជារដ្ឋធ្លាប់មានស្តុកស្តម្ភដោយសារសម្បូរធនធានប្រេង បានផុងខ្លួនក្នុងវិបត្តិយ៉ាងជ្រៅក្រោមការដឹកនាំរបស់លោក ម៉ាឌុយរ៉ូ ។ ជម្លោះផ្នែកនយោបាយ និងសេដ្ឋកិច្ច បានបង្ខំឲ្យប្រជាជនរាប់លាននាក់ភៀសខ្លួនទៅកាន់ប្រទេសជិតខាង។ ដើម្បីដោះស្រាយបញ្ហា រដ្ឋាភិបាលក្រុងការ៉ាកាស់ បែរជាបន្តទម្លាក់តម្លៃរូបិយវត្ថុក្នុងស្រុកក្នុងគោលដៅទប់ស្កាត់កំណើនអតិផរណាដែរ។ ប៉ុន្តែកាលពីឆ្នាំមុន មូលនិធិរូបិយវត្ថុអន្តរជាតិទស្សទាយថា អតិផរណានៅវ៉េណេស៊ុយអេឡាបន្តកើនដល់មួយលានភាគរយ៕
Tag:
វ៉េណេស៊ុយអេឡា
នីកូឡា ម៉ាឌុយរ៉ូ
© រក្សាសិទ្ធិដោយ thmeythmey.com
