ផ្លូវល្បឿនលឿនភ្នំពេញ-ព្រះសីហនុ បើកការដ្ឋានសាងសង់នៅខែកុម្ភៈ ឬដើមខែមីនាឆ្នាំនេះ

ជាតិ

សេដ្ឋកិច្ច

ផ្លូវល្បឿនលឿនភ្នំពេញ-ព្រះសីហនុ បើកការដ្ឋានសាងសង់នៅខែកុម្ភៈ ឬដើមខែមីនាឆ្នាំនេះ

09, Jan 2019 , 10:39 pm

រូបភាព

ដោយ:

ភ្នំពេញ៖ រដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល បានប្រកាសថា ការស្ថាបនាផ្លូវល្បឿនលឿនភ្នំពេញ-ព្រះសីហនុ នឹងត្រូវបើកការដ្ឋាន នៅក្នុងខែកុម្ភៈ ឬដើមខែមីនាឆ្នាំ២០១៩ នេះ ។

ថ្លែងក្នុងពិធីបើកសន្និបាតបូកសរុបការងារប្រចាំឆ្នាំរបស់ក្រសួងសាធារណការ និងដឹកជញ្ជូន នៅថ្ងៃទី៩ខែមករា លោក ស៊ុន ចាន់ថុល បានឲ្យដឹងដូច្នេះថា៖«យើងបានចុះកិច្ចព្រមព្រៀងសម្បទានផ្លូវពីភ្នំពេញទៅខេត្តព្រះសីហនុ នៅខែមករានៅឆ្នាំ២០១៨។ យើងសង្ឃឹមថាខែកុម្ភៈ ឬដើមខែមីនា អាចបើកការដ្ឋានសាងសង់ផ្លូវល្បឿនលឿននេះបាន»។

បើតាមលោក ស៊ុន ចាន់ថុល គ្រឿងចក្រតម្លៃប្រមាណ ១០០លានដុល្លារអាមេរិក សម្រាប់បម្រើឲ្យការស្ថាបផ្លូវល្បឿនលឿននេះ នឹងមកដល់កម្ពុជានៅបំណាច់ខែមករានេះ ខណៈអ្នកបច្ចេកទេស វិស្វករចិនប្រហែល ២០០នាក់បានមកដល់កម្ពុជាហើយ។

ជាមួយគ្នានេះ រដ្ឋាភិបាលកំពុងរៀបចំដោះស្រាយផលប៉ះពាល់ សម្រាប់គម្រោងមួយនេះ។ លោក ស៊ុន ចាន់ថុល បានថ្លែងដូច្នេះថា៖«យើងមិនទាន់ដោះស្រាយផលប៉ះពាល់នៅឡើយ គឺកំពុងរៀបចំ ប៉ុន្តែយើង និងក្រសួងសេដ្ឋកិច្ច និងហិរញ្ញវត្ថុ កំពុងតែជំរុញធ្វើយ៉ាងណាដោះស្រាយបញ្ហាដីធ្លីនេះឲ្យបាន»។

តាមការគ្រោងទុក ផ្លូវល្បឿនលឿនភ្នំពេញ-ព្រះសីហនុ ដែលជាគម្រោងលើកដំបូងនៅកម្ពុជានេះ នឹងត្រូវចំណាយ ១៩០០លានដុល្លាអាមេរិក។ នេះជាគម្រោង BOT ដែលក្រុមហ៊ុននឹងសាងសង់ ធ្វើប្រតិបត្តិការ រួចផ្ទេរឲ្យរដ្ឋាភិបាល៕