អន្តរជាតិ
រុស្ស៊ី ចិន និងតួកគីប្រកាសគាំទ្ររបបដឹកនាំលោក ម៉ាឌុយរ៉ូ
× វិបត្តិនយោបាយនៅវ៉េណេស៊ុយអេឡា បានបើកដល់ទំព័រថ្មីមួយទៀតនៅថ្ងៃទី២៣ ខែមករា ដោយមានឥស្សរជននយោបាយម្នាក់ទៀតតាំងខ្លួនជាប្រធានាធិបតី ប្រជែងប្រធានាធិបតីបច្ចុប្បន្ន នីកូឡា ម៉ាឌុយរ៉ូ ។ ប្រធានសភាអត់ធ្មុង ហ័ន ក្វៃដូ (Juan Guaido) បានប្រកាសខ្លួនជាមេដឹមនាំបណ្ដោះអាសន្នរបស់វ៉េណេស៊ុយអេឡា ដោយមានអាមេរិក និងបក្សពួកចាំគាំទ្រ។ សម្ព័ន្ធមិត្តរបស់រដ្ឋាភិបាលលោក ម៉ាឌុយរ៉ូ វិញមានចិន រុស្ស៊ី និងតួកគីជាដើម ចាត់ទុកទង្វើអាមេរិកជាការបំពានកិច្ចការផ្ទៃក្នុងវ៉េណេស៊ុយអេឡាដោយចំហ មិនគោរពច្បាប់អន្តរជាតិ។
ស្ថានភាពនយោបាយនៅវ៉េណេស៊ុយអេឡា កាន់តែតែដុនដាបពីមួយថ្ងៃទៅមួយថ្ងៃ។ មកទល់ពេលនេះ នៅវ៉េណេស៊ុយអេឡាមានសភាពីរ និងប្រធានាធិបតីពីរផង។ មួយគឺរដ្ឋសភាដែលជាប់ឆ្នោតតាំងពីឆ្នាំ២០១៥ និងគ្រប់គ្រងដោយបក្សប្រឆាំង និងមួយទៀត គឺសភានីតិបញ្ញត្តិដែលបង្កើតដោយនៅឆ្នាំ២០១៧ ហើយដើរតួនាទីជំនួសរដ្ឋសភា។ ឯប្រធានាធិបតីវិញ មួយគឺលោក នីកូឡា ម៉ាឌុយរ៉ូ ដែលជាប់ឆ្នោតយ៉ាងចម្រូងចម្រាស និងមួយទៀត គឺលោក ហ័ន ក្វៃដូ ដែលតាំងខ្លួនជាប្រធានាធិបតី។
ការបែងចែកអ្នកគាំទ្ររវាងលោក ម៉ាឌុយរ៉ូ និងលោក ក្វៃដូ មិនមែនកើតឡើងតែនៅវ៉េណេស៊ុយអេឡាឡើយ។ នៅឆាកអន្តរជាតិ ប្រទេសខ្លះដើរតាមអាមេរិកដោយទទួលស្គាល់មេដឹកនាំប្រឆាំងវ៉េណេស៊ុយអេឡា ជាមេដឹកនាំស្របច្បាប់តែមួយគត់ មិនមែនលោក ម៉ាឌុយរ៉ូ នោះឡើយ។ ប៉ុន្តែនៅពីក្រោយខ្នងលោក ម៉ាឌុយរ៉ូ វិញ ក៏នៅមានចិន រុស្ស៊ី អ៊ីរ៉ង់ គុយបា បូលីវី និងតួកគីដែលជាសម្ព័ន្ធមិត្តមួយរបស់អាមេរិកដែរ។
ប្រធានាធិបតីរុស្ស៊ី វ្ល៉ាឌីមៀ ពូទីន បានជជែកតាមទូរសព្ទជាមួយលោក ម៉ាឌុយរ៉ូ នៅថ្ងៃទី២៤ ខែមករា ដោយបានសន្យាផ្ដល់ការគាំទ្រដល់រដ្ឋាភិបាលដែលកើតឡើងតាមការបោះឆ្នោតនៅវ៉េណេស៊ុយអេឡារបស់លោក ម៉ាឌុយរ៉ូ ។ លោក ពូទីន បានរិះគន់អាមេរិកដែលទទួលមេដឹកនាំប្រឆាំង និងចាត់ទុកទង្វើនេះជាការបំពានកិច្ចការផ្ទៃក្នុងរបស់វ៉េណេស៊ុយអេឡាដោយមិនគោរពច្បាប់អន្តរជាតិបន្តិចសោះ។ មេដឹកនាំទាំងពីរក៏ឯកភាពគ្នាបន្តកិច្ចសហប្រតិបត្តិការលើវិស័យច្រើនទៀត។
នៅទីក្រុងប៉េកាំងឯណោះវិញ អ្នកនាំពាក្យក្រសួងការបរទេសចិន ក៏ប្រកាសជំហរចិនគាំទ្ររដ្ឋាភិបាលោក ម៉ាឌុយរ៉ូ បន្តទៀត។ ក្នុងសន្និសីទសារព័ត៌មានថ្ងៃទី២៤ ខែមករា លោកស្រី Hua Chunying និយាយថា ការដាក់សម្ពាធពីកម្លាំងខាងក្រៅ ឬការលូកលាន់កិច្ចការផ្ទៃក្នុងប្រទេសផ្សេង មិនអាចជួយដោះស្រាយបញ្ហាបានទេ តែធ្វើឲ្យបញ្ហាកាន់តែស្មុគស្មាញ។ នៅរដ្ឋធានីអង់ការ៉ា ប្រមុខការទូតតួកគីក៏រិះគន់អាមេរិកដែលចេះតែលូកលាន់កិច្ចការវ៉េណេស៊ុយអេឡា។
អ៊ីរ៉ង់ ជាប្រទេសធំមួយទៀតដែលគាំទ្ររដ្ឋាភិបាលក្រុងការ៉ាកាស់ និងរិះគន់អាមេរិកដែលចូលទៅពាក់ព័ន្ធកិច្ចការរបស់វ៉េណេស៊ុយអេឡា។ អ្នកនាំពាក្យ Bahram Ghasemi ក្រសួងការបរទេសអ៊ីរ៉ង់លើកឡើងថា អ៊ីរ៉ង់នៅឈរខាងប្រជាជនវ៉េណេស៊ុយអេឡាដែលកំពុងប្រឈមមុខអន្តរាគមន៍បរទេស ឬក៏សកម្មភាពខុសច្បាប់នានាតួយ៉ាងការប៉ុនប៉ងធ្វើរដ្ឋប្រហារជាដើម។
ងាកទៅរឿងការផ្ដាច់ចំណងការទូតវិញ លោក ម៉ាឌុយរ៉ូ បានបញ្ជាឲ្យបិទស្ថានទូត និងស្ថានកុងស៊ុលវ៉េណេស៊ុយអេឡាទាំងអស់នៅអាមេរិក។ ឯអាមេរិកវិញដែលបន្តទំនាក់ទំនងជាមួយក្រុមប្រឆាំងនោះ បានសម្រេចចិត្តដកបុគ្គលិកទូតខ្លះដែលមិនចាំបាច់ចេញពីវ៉េណេស៊ុយអេឡា។ តាមពិតទៅ អាមេរិក និងវ៉េណេស៊ុយអេឡាមិនបានតែងតាំងអគ្គរដ្ឋទូតប្រចាំប្រទេសរៀងខ្លួនឡើយក្នុងរយៈពេលជាង១០ឆ្នាំមកនេះ៕
Tag:
ចិន
រុស្ស៊ី
តួកគី
វ៉េណេស៊ុយអេឡា
នីកូឡាស់ ម៉ាឌុយរ៉ូ
© រក្សាសិទ្ធិដោយ thmeythmey.com