ជាតិ
នយោបាយជាតិ
អាសនៈក្រុមប្រឹក្សារាជធានី ខេត្ត ក្រុង ស្រុក ខណ្ឌ ត្រូវបានបង្កើនជាង៨០០ថែមទៀត សម្តេច ហ៊ុន សែន នាយករដ្ឋមន្រ្តី (ខាងឆ្វេងដៃ) និងសម្តេច ស ខេង រដ្ឋមន្ត្រីក្រសួងមហាផ្ទៃ (ខាងស្តាប់ដៃ) រួមទាំងតំណាងរាស្រ្តផ្សេងទៀតនៃគណបក្សប្រជាជនកម្ពុជា ស្ថិតក្នុងកិច្ចប្រជុំពេញអង្គនៃរដ្ឋសភា នៅព្រឹកថ្ងៃទី១៦ ខែតុលា ឆ្នាំ២0១៧
×
សមាជិកក្រុមប្រឹក្សារាជធានី ខេត្ត ក្រុង ស្រុក ខណ្ឌ ដែលហៅជាទូទៅថា «សមាជិកក្រុមប្រឹក្សា» នឹងត្រូវកើនឡើង សម្រាប់ការបោះឆ្នោតនៅអាណត្តិថ្មី (អាណត្តិទី៣) ដែលនឹងប្រព្រឹត្តទៅនៅថ្ងៃអាទិត្យ ទី២៦ ខែឧសភា ឆ្នាំ២០១៩។ ប្រមុខរដ្ឋាភិបាល បានចេញអនុក្រឹត្យកាលពីថ្ងៃទី២៥ ខែមករា ឆ្នាំ២០១៩ ស្តីពីការកំណត់ចំនួនអាសនៈក្រុមប្រឹក្សានេះ។
សារព័ត៌មានថ្មីៗ បានបូកសរុបចំនួនសមាជិកក្រុមប្រឹក្សារាជធានី ខេត្ត ក្រុង ស្រុក ខណ្ឌ សម្រាប់អាណត្តិទី៣ ដែលកំណត់ដោយអនុក្រឹត្យ ឃើញថា សមាជិកក្រុមប្រឹក្សារាជធានី ខេត្ត មានចំនួនសរុប៥៥៩រូប ហើយសមាជិកក្រុមប្រឹក្សាក្រុង ស្រុក ខណ្ឌ មានចំនួនសរុប៣៥៨៤រូប។ ក្នុងអាណត្តិទី២នេះ ក្រុមប្រឹក្សារាជធានី ខេត្ត មានចំនួនសរុប៣៩៣រូប ហើយសមាជិកក្រុមប្រឹក្សាក្រុង ស្រុក ខណ្ឌ មានចំនួនសរុប២៩៣១រូប។
យោងតាមតួលេខខាងលើ នៅអាណត្តិទី៣ សមាជិកក្រុមប្រឹក្សារាជធានី ខេត្ត ត្រូវកើនឡើង១៦៦រូប ហើយសមាជិកក្រុមប្រឹក្សាក្រុង ស្រុក ខណ្ឌ ត្រូវកើនឡើង៦៥៣រូប ដែលសរុបទាំងអស់ សមាជិកក្រុមប្រឹក្សារាជធានី ខេត្ត ក្រុង ស្រុក ខណ្ឌ ត្រូវកើនឡើងដល់ទៅ៨១៩រូបបន្ថែមទៀត។
ការបង្កើនសមាជិកក្រុមប្រឹក្សានេះ គឺទន្ទឹមគ្នាជាមួយនឹងការបង្កើតក្រុង ស្រុខ ខណ្ឌថ្មីចំនួន៦បន្ថែមទៀត។ យោងតាមអនុក្រឹត្យរបស់ប្រមុខរដ្ឋាភិបាល ក្រុង ស្រុក ខណ្ឌថ្មីទាំងនោះ រួមមាន រាជធានីភ្នំពេញ មានខណ្ឌថ្មី២ គឺខណ្ឌបឹងកេងកងនិងខណ្ឌកំបូល, ខេត្តព្រះសីហនុ មានក្រុងថ្មី១ គឺក្រុងកោះរ៉ុង, ខេត្តស្ទឹងត្រែង មានស្រុកថ្មី១ គឺស្រុកបុរីអូរស្វាយសែនជ័យ, ខេត្តកំពង់ធំ មានស្រុកថ្មី១ គឺស្រុកតាំងគោក, និងខេត្តពោធិ៍សាត់ មានស្រុកថ្មី១ គឺស្រុកតាលោសែនជ័យ៕
© រក្សាសិទ្ធិដោយ thmeythmey.com