ប្រធានាធិបតីវ៉េណេស៊ុយអេឡា នីកូឡាស់ ម៉ាឌុយរ៉ូ នៅថ្ងៃទី២៧ ខែមករា បានធ្វើជាអធិបតីក្នុងពិធីបង្ហាញសព្វាវុធថ្មីដែលផលិតនៅរុស្ស៊ី ខណៈដែលសម្ពាធអន្តរជាតិធ្លាក់លើរូបលោកកាន់តែខ្លាំង។ លោក ម៉ាឌុយរូ ក៏ទាត់ចោលឱសានវាតរបស់រដ្ឋអឺរ៉ុបដែលស្នើឲ្យមានការបោះឆ្នោតឡើងវិញ បើមិនចង់ពួកគេទទួលស្គាល់មេដឹកនាំប្រឆាំង ហ័ន ក្វៃដូ វិញនោះ។ វិបត្តិនយោបាយនេះ ក៏ធ្វើឲ្យការជជែកគ្នាតឹងសសៃកនៅឯក្រុមប្រឹក្សាសន្តិសុខផង។
កម្ដៅនយោបាយនៅវ៉េណេស៊ុយអេឡាកំពុងពុះកញ្ជ្រោលរវាងភាគីម្ខាងដែលមានកាន់អំណាចក្នុងស្រុក មានកងទ័ពក្នុងដៃគឺលោក នីកូឡាស់ ម៉ាឌុយរ៉ូ និងភាគីម្ខាងទៀតគ្មានអំណាចក្នុងដៃ តែមានអន្តរជាតិទទួលស្គាល់កាន់តែច្រើនឡើងគឺ លោក ហ័ន ក្វៃដូ ដែលតាំងខ្លួនជាប្រធានាធិបតីបណ្ដោះអាសន្ន។ សម្ពាធខ្លាំងបានធ្លាក់លើលោក ម៉ាឌុយរ៉ូ ដែលចចេសមិនព្រមចាកចេញពីតំណែង ស្របពេលមានការតវ៉ាពីសំណាក់ប្រជាជនពេញផ្លូវ និងការព្រមានរបស់ប្រទេសច្រើនទៀត។
នៅថ្ងៃទី២៧ ខែមករា លោក ម៉ាឌុយរ៉ូ ក៏ទៅពិនិត្យលំហាត់យោធា និងការតាំងបង្ហាញសព្វាវុធថ្មីរបស់រុស្ស៊ីមានកាំភ្លើងបាញ់យន្តហោះ និងរថក្រោះជាដើម។ ប្រធានាធិបតីវ៉េណេស៊ុយអេឡារូបនេះអះអាងថា លោកនៅតែទទួលបានការគាំទ្រពីសំណាក់យោធាដដែល ហើយកងទ័ពវ៉េណេស៊ុយអេឡាត្រៀមខ្លួនរួចហើយដើម្បីការពារប្រទេស។ លោកថា លើលោកនេះ គេមិនគោរពប្រទេសខ្សោយឡើយ តែកោតខ្លាចអំណាច និងភាពក្លាហានប៉ុណ្ណោះ។
គ្មានការបោះឆ្នោតម្ដងទៀតឡើយ
វត្តមានលោក ហ័ន ក្វៃដូ ទទួលបានការគាំទ្រច្រើនទៅៗពីប្រទេសនានា ខណៈដែលលោក ក្វៃដូ ក៏អំពាវនាវកាន់តែខ្លាំងទៀតឲ្យយោធាបែរខ្នងដាក់លោក ម៉ាឌុយរ៉ូ ។ បន្ថែមពីលើអាមេរិក កាណាដា ប្រេស៊ីជាដើមនោះ អ៊ីស្រាអែល និងអូស្ត្រាលីក៏ទទួលស្គាល់លោក ក្វៃដូ ជាមេដឹកនាំស្របច្បាប់របស់វ៉េណេស៊ុយអេឡាដែរ។ រដ្ឋអឺរ៉ុបដូចជាអេស្ប៉ាញ បារាំង អង់គ្លេស ហូឡង់ និងអាល្លឺម៉ង់ បានកំណត់ឲ្យលោក ម៉ាឌុយរ៉ូ រៀបចំការបោះឆ្នោត បើមិនដូច្នោះទេ ពួកគេនឹងមិនទទួលស្គាល់លោកឡើយ។
យ៉ាងណាមិញ លោក ម៉ាឌុយរ៉ូ មិនរអានឹងការគំរាមកំហែងរបស់ប្រទេសធំៗនៅអឺរ៉ុបទាំងនោះឡើយ។ ក្នុងកិច្ចសម្ភាសមួយនៅថ្ងៃទី២៧ ខែមករា មេដឹកនាំវ៉េណេស៊ុយអេឡារូបនេះចាត់ទុកឱសានវាតនេះជារឿងខុសឆ្គងរបស់ប្រទេសអឺរ៉ុប និងបានប្រាប់ឲ្យប្រទេសអឺរ៉ុបទាំងនោះដកឱសានវាតដែលទាមទារឲមានការបោះឆ្នោតក្នុងរយៈពេល៨ថ្ងៃចេញវិញ ព្រោះវ៉េណេស៊ុយអេឡាមិនជំពាក់វាក់វិនអ្វីជាមួយអឺរ៉ុបឡើយ។ នេះបើតាមការផ្សាយរបស់ទីភ្នាក់ងារព័ត៌មាន AFP ។
ក្រុមប្រឹក្សាសន្តិសុខខ្វែងគំនិតលើវិបត្តិវ៉េណេស៊ុយអេឡា
ការបែងចែកមិនមែនត្រឹមតែកើតនៅវ៉េណេស៊ុយអេឡាឡើយ។ នៅឯក្រុមប្រឹក្សាសន្តិសុខអង្គការសហប្រជាជាតិ ការខ្វែងគំនិតគ្នាបានស្ដែងចេញយ៉ាងច្បាស់។ ក្នុងកិច្ចប្រជុំកាលពីចុងសប្ដាហ៍មុនដែលកោះប្រជុំដោយអាមេរិក សមាជិកអចិន្ត្រៃយ៍ពីរ គឺចិន និងរុស្ស៊ី បាននៅតែគាំទ្រដោយឥតងាករេចំពោះរបបលោក ម៉ាឌុយរ៉ូ និងបានជំទាស់គំនិតរបស់អាមេរិក និងសម្ព័ន្ធមិត្តដែលចង់ឃើញការបោះឆ្នោតថ្មីមួយនៅវ៉េណេស៊ុយអេឡា។
ចិន និងរុស្ស៊ី គឺជាសម្ព័ន្ធមិត្តជិតស្និទ្ធរបស់របបដឹកនាំក្រុងការ៉ាកាស់ និងទទួលស្គាល់លោក ម៉ាឌុយរ៉ូ ជាប្រធានាធិបតីស្របច្បាប់ដដែល ទោះជាអាមេរិក និងបក្សពួករបស់ខ្លួនទទួលស្គាល់លោក ក្វៃដូ ជាមេដឹកនាំបណ្ដោះអាសន្នក្ដី។ ក្នុងកិច្ចប្រជុំនៅបុរីញូវយ៉ក អាមេរិកក៏ប្រាប់ឲ្យពិភពលោកជ្រើសរើសភាគីណាមួយក្នុងជម្លោះវ៉េណេស៊ុយអេឡា និងផ្ដាច់ទំនាក់ទំនងហិរញ្ញវត្ថុជាមួយរដ្ឋាភិបាលោក ម៉ាឌុយរ៉ូ ។
ស្របពេលភាពតានតឹងកើនឡើងរវាងលោក ម៉ាឌុយរ៉ូ និងលោក ក្វៃដូ ដែលជាប្រធានសភាផងនោះ អាមេរិកក៏ផ្ញើសារព្រមានមួយទៅក្រុងការ៉ាកាស់។ ទីប្រឹក្សាសន្តិសុខជាតិអាមេរិក ចន ប៊ូលតុន បានសរសេរលើបណ្ដាញសង្គម Twitter ថា ចំណាត់ណាមួយលើបុគ្គលិកទូតអាមេរិកនៅវ៉េណេស៊ុយអេឡា រដ្ឋសភា ឬលោក ក្វៃដូ នឹងទទួលបានការតបស្នងដ៏ធ្ងន់មិនខាន៕