អន្តរជាតិ
អ្នករាយការណ៍UN៖ ស្ថានភាពសិទ្ធិមនុស្សមីយ៉ាន់ម៉ា កាន់តែអាក្រក់ រូបភាព UN Media Center
× អ្នករាយការណ៍ពិសេសស្តីពីស្ថានភាពសិទ្ធិមនុស្សមីយ៉ាន់ម៉ារបស់អង្គការសហប្រជាជាតិ បានមានទុទិដ្ឋិនិយមទៅលើសិទ្ធិមនុស្សរបស់មីយ៉ាន់ម៉ា។ អ្នករាយការណ៍ បានមើលឃើញពីការវិលត្រលប់ថយក្រោយ របស់រដ្ឋាភិបាលស៊ីវិលមីយ៉ាន់ម៉ា ក្នុងការអនុវត្តគោលការណ៍សិទ្ធិមនុស្ស ជាពិសេសនោះលើបញ្ហាជនភៀសខ្លួនក្នុងរដ្ឋរ៉ាខាន(Rakhine) ដែលអូសបន្លាយគ្មានដំណោះស្រាយ។
បើទោះបីជាមិនអាចចូលទៅក្នុងប្រទេសមីយ៉ាន់ម៉ាបានក៏ដោយ លោកស្រី Yanghee Lee អ្នករាយការណ៍ពិសេសរបស់អង្គការសហប្រជាជាតិ នៅតែអាចធ្វើរបាយការណ៍ស្តីពីបច្ចុប្បន្នភាពនៃស្ថានភាពសិទ្ធិមនុស្សមីយ៉ាន់ម៉ាបាន។ លោកស្រី ទើបតែបញ្ចប់ដំណើរទស្សនកិច្ចវាយតម្លៃស្ថានភាពសិទ្ធិមនុស្សរបស់មីយ៉ាន់ម៉ារយៈពេល១១ថ្ងៃ តាមរយៈការសម្ភាសន៍ជាមួយនឹងជនរងគ្រោះពីរបបដឹកនាំដែលភៀសខ្លួនទៅកាន់បង់ក្លាដែស និងថៃ។
នាសន្និសីទសារព័ត៌មានចុងសប្តាហ៍មុន លោកស្រីអ្នករាយការណ៍ពិសេស Yanghee Lee បានពណ៌នាពីប្រជាធិបតេយ្យមីយ៉ាន់ម៉ា ថា ផុយស្រួលបំផុត ខណៈការបែងចែកផ្នែកសាសនា និងជាតិសាសន៍ នៅតែបន្តកើតមានឡើងទូទាំងប្រទេស រួមទាំងការមិនអើពើ និងរើសអើងជនជាតិភាគតិចផងដែរ។ នេះបើយោងតាមការចុះផ្សាយរបស់មជ្ឈមណ្ឌលព័ត៌មានអង្គការសហប្រជាជាតិ។
តាមប្រភពព័ត៌មានដដែលនោះ លោកស្រី បានអះអាងថា លោកស្រី ពិតជាមានការព្រួយបារម្ភខ្លាំងពីមជ្ឈដ្ឋានដ៏សម្ពាធរបស់មីយ៉ាន់ម៉ា ដែលធ្វើឲ្យប្រជាជនមិនសូវហ៊ាននិយាយដោយសេរីអំពីការបំពានសិទ្ធិមនុស្ស និងអំពើអយុត្តិធម៌ ដែលបានកើតឡើងនៅក្នុងប្រទេស។ លោកស្រី បានបន្ថែមថា ស្ថានភាពសិទ្ធិមនុស្សមីយ៉ាន់ម៉ា កាន់តែស្មុគស្មាញដោយសារតែការប៉ះទង្គិចនៅក្នុងតំបន់មួយចំនួននៅក្នុងប្រទេស។
ពាក់ព័ន្ធនឹងបញ្ហាជនភៀសខ្លួននៅក្នុងរដ្ឋរ៉ាខានវិញ លោកស្រី បានយល់ឃើញថា រដ្ឋាភិបាលមីយ៉ាន់ម៉ា មិនបានបំពេញតួនាទីក្នុងការបង្កើតលក្ខខណ្ឌសម្រាប់ការវិលត្រលប់របស់ពួកគេវិញឡើង ផ្ទុយទៅវិញមីយ៉ាន់ម៉ា កាន់តែពាក់ព័ន្ធទៅនឹងហិង្សាទៅវិញ។ លោកស្រី អះអាងថា បានជួបជាមួយនឹងជនរងគ្រោះជាច្រើន ដែលត្រូវបានអាជ្ញាធរមីយ៉ាន់ម៉ា ធ្វើទុក្ខបុកម្នេញ និងបង្ខំឲ្យចាកចេញពីប្រទេសទៀតផង។
គួរជម្រាបថា លោកស្រី Lee ត្រូវបានហាមឃាត់មិនឲ្យចូលទស្សនកិច្ចទៅកាន់មីយ៉ាន់ម៉ា ដើម្បីអនុវត្តអាណត្តិ និងបេសកកម្មរបស់លោកស្រី ដែលផ្តល់សិទ្ធិដោយក្រុមប្រឹក្សាសិទ្ធិមនុស្សអង្គការប្រជាជាតិ តាំងពីឆ្នាំ២០១៧មកម្ល៉េះ។ កន្លងមករដ្ឋាភិបាលមីយ៉ាន់ម៉ា ក៏បានស្នើឲ្យក្រុមប្រឹក្សាសន្តិសុខ ផ្លាស់ប្តូរលោកស្រី ចេញ ដ្បិតសេចក្តីថ្លែងការណ៍របស់លោកស្រី មានភាពលម្អៀង និងគ្មានភាពច្បាស់លាស់៕
Tag:
មីយ៉ាន់ម៉ា
អាស៊ាន
សិទ្ធិមនុស្ស
© រក្សាសិទ្ធិដោយ thmeythmey.com