អន្តរជាតិ
អាមេរិកដាក់ទណ្ឌកម្មក្រុមហ៊ុនប្រេងរដ្ឋវ៉េណេស៊ុយអេឡា ដើម្បីផ្ដាច់ហិរញ្ញវត្ថុលោក ម៉ាឌុយរ៉ូ
ទីប្រឹក្សាសន្តិសុខជាតិអាមេរិក ចន ប៊ូលតុន និងរដ្ឋមន្រ្តីរតនាគារ Steven Mnuchin ក្នុងសន្និសីទសារព័ត៌មាននៅសេតវិមាន (រូបភាព AFP)
×![]()
ដោយ: តន ចាន់រិទ្ធារ៉ា
រដ្ឋបាលប្រធានាធិបតី ដូណាល់ ត្រាំ នៅថ្ងៃទី២៨ ខែមករា បានដាក់ទណ្ឌកម្មលើក្រុមហ៊ុនប្រេងរដ្ឋរបស់វ៉េណេស៊ុយអេឡា (PDVSA) ដែលជាវិធានការកាត់ផ្ដាច់ប្រភពហិរញ្ញវត្ថុរបស់ប្រធានាធិបតី នីកូឡាស់ ម៉ាឌុយរ៉ូ ។ វិធានការរបស់អាមេរិក គឺស្របគ្នានឹងការប្រកាសរបស់មេដឹកនាំប្រឆាំង ហ័ន ក្វៃដូ ក្នុងគ្រប់គ្រងទ្រព្យសម្បត្តិទាំងអស់របស់វ៉េណេស៊ុយអេឡានៅបរទេស។ រដ្ឋបាលលោក ត្រាំ បានប្រាប់ឲ្យលោក ម៉ាឌុយរ៉ូ ចុះចេញតាមសម្រួល ដោយគំរាមថា អាមេរិកអាចប្រើជម្រើសទាំងអស់។
គោលបំណងនៃទណ្ឌកម្ម គឺដើម្បីផ្លាស់ប្ដូរអាកប្បកិរិយាលោក នីកូឡាស់ ម៉ាឌុយរ៉ូ ។ នេះជាការលើកឡើងរបស់រដ្ឋមន្ត្រីរតនាគារអាមេរិក Steven Mnuchin ក្នុងពេលប្រកាសដាក់ទណ្ឌកម្មលើក្រុមហ៊ុនប្រេងវ៉េណេស៊ុយអេឡា PDVSA ។ ទណ្ឌកម្មនេះ នឹងកំហិតការនាំចូលប្រេងទៅកាន់ទីផ្សារអាមេរិក និងកាត់ផ្ដាច់ប្រភពចំណាយរបស់រដ្ឋាភិបាលវ៉េណេស៊ុយអេឡារហូតទាល់តែលោក ម៉ាឌុយរ៉ូ លាលែងពីតំណែងតែម្ដង។
ថ្លែងទៅកាន់អ្នកសារព័ត៌មាននៅសេតវិមានថ្ងៃទី២៨ ខែមករា លោក Mnuchin និយាយថា នៅពេលក្រុមហ៊ុន PDVSA ត្រូវស្ថិតក្រោមការដឹកនាំរបស់លោក ក្វៃដូ វិញនោះ អាមេរិកនឹងប្រគល់ទ្រព្យទាំងនោះទៅកាន់វ៉េណេស៊ុយអេឡាវិញ។ រដ្ឋមន្ត្រីរូបនេះប្រាប់ឲ្យក្រុមហ៊ុនរដ្ឋដដែលនេះ ផ្ដាច់ខ្លួនពីប្រធានាធិបតី ម៉ាឌុយរ៉ូ ហើយឲ្យលោក ក្វៃដូ គ្រប់គ្រង ឬក៏រដ្ឋាភិបាលជាប់ឆ្នោតតាមបែបប្រជាធិបតេយ្យណាមួយ ទើបអាមេរិកដកទណ្ឌកម្មវិញ។ នេះបើតាមការផ្សាយរបស់ទីភ្នាក់ងារព័ត៌មាន AFP ។
យ៉ាងណាមិញ សាខារបស់ PDVSA នៅអាមេរិក គឺ Citgo អាចបន្តដំណើរការរកស៊ីរបស់ខ្លួនដដែល ល្គឹកណាចំណូលទាំងប៉ុន្មានត្រូវវេរទៅកាន់គណនីដែលមិនអាចដកបាន (Blocked Account) ។ ជាមួយគ្នា លោក ក្វៃដូ ប្រកាសថា លោកនឹងតែងតាំងថ្នាក់ដឹកនាំថ្មីរបស់ PDVSA និង Citgo ដើម្បីស្រោចស្រង់ឧស្សាហកម្មប្រេងឡើងវិញ ដែលកំពុងតែស្ថិតក្នុងសម័យកាលខ្មៅងងឹត។
វិធានការដាក់ទណ្ឌកម្មនេះ ជាសកម្មភាពថ្មីមួយទៀតរបស់អាមេរិកក្នុងការបង្ខំឲ្យលោក ម៉ាឌុយរ៉ូ ចាកចេញពីអំណាច បន្ថែមពីលើការទទួលស្គាល់មេដឹកនាំប្រឆាំង និងការស្នើឲ្យយោធាគាំទ្រមេដឹកនាំថ្មី។ ទីប្រឹក្សាសន្តិសុខជាតិរបស់លោក ត្រាំ គឺលោក ចន ប៊ូលតុន បានប្រាប់កម្លាំងយោធាវ៉េណេស៊ុយអេឡាឲ្យទទួលការផ្ទេរអំណាចដោយសន្តិភាព តាមបែបប្រជាធិបតេយ្យ និងគោរពតាមរដ្ឋធម្មនុញ្ញ។ ប៉ុន្តែមន្ត្រីរូបនេះក៏អះអាងថា អាមេរិកដាក់ជម្រើសទាំងអស់លើតុ។
ការលើកឡើងរបស់លោក ប៊ូលតុន មានន័យថា អាមេរិកនៅតែអាចប្រើយោធាដើម្បីបណ្ដេញលោក ម៉ាឌុយរ៉ូ ចេញពីអំណាចដដែល។ អ្វីគួរឲ្យចាប់អារម្មណ៍ លោក ប៊ូលតុន បានបង្ហាញផែនការផ្លាស់ប្ដូររបបដឹកនាំក្រុងការ៉ាកាស់បញ្ជូនទ័ព៥ពាន់នាក់ទៅកូឡុំប៊ីដែលមានព្រំដែនជាប់វ៉េណេស៊ុយអេឡា។ អ្នកសារព័ត៌មានបានថតជាប់សៀវភៅកំណត់ហេតុរបស់លោក ប៊ូលតុន ដែលក្បែរលោក Mnuchin និងមានឃ្លា ហើយឃ្លាមួយសរសរថា «ទាហាន៥ពាន់នាក់ទៅកូឡុំប៊ី»។
My eagle-eyed colleague spotted on Bolton’s notepad what sure looks like:
— Ned Price (@nedprice) January 28, 2019
“Afghanistan—>welcome the talks.
5,000 troops to Colombia” pic.twitter.com/Al4mCGJIfU
ទីប្រឹក្សាសន្តិសុខអាមេរិករូបនេះ ពិតជាបំណងបង្ហាញផែនការបញ្ជូនទ័ពនេះជាសាធារណៈ ដើម្បីគំរាមលោក ម៉ាឌុយរ៉ូ ដែលចចេសមិនបោះបង់អំណាច ដោយលោកមិនចាំបាច់និយាយតាមត្រង់ឡើយ។ លោក ប៊ូលតុន ត្រូវបានគេទទួលស្គាល់ថា ជាមន្ត្រីដែលមានគំនិតយោធានិយម និងមិនសូវចូលចិត្តការជជែកគ្នាប៉ុន្មានឡើយ។ ពេលសួរជុំវិញសំណេររបស់លោក ប៊ូលតុន ខាងលើនេះ អ្នកនាំពាក្យសេតវិមានរំឭកសម្ដីលោក ត្រាំ ថា ជម្រើសទាំងអស់នៅលើតុ៕
Tag:
អាមេរិក
វ៉េណេស៊ុយអេឡា
នីកូឡាស់ ម៉ាឌុយរ៉ូ
© រក្សាសិទ្ធិដោយ thmeythmey.com
