អន្តរជាតិ
លោក ប្រាយុទ្ធ ប្រកាសកាន់អំណាចទាល់តែមានរដ្ឋាភិបាលថ្មី
× ប្រមុខរបបដឹកនាំយោធា ប្រាយុទ្ធ ចន្ទអូចា នៅថ្ងៃទី៣០ ខែមករា បានប្រកាសដោយចំហថា លោកនឹងកាន់តែតំណែងនាយករដ្ឋមន្ត្រីរហូតមានរដ្ឋាភិបាលថ្មី។ ការប្រកាសរបស់លោក ប្រាយុទ្ធ ធ្វើឡើងបន្ទាប់មានការលាលែងពីតំណែងរបស់រដ្ឋមន្ត្រីបួនរូបក្នុងរដ្ឋាភិបាលរបស់លោក ដើម្បីអាចធ្វើនយោបាយពេញលេញ។ មុននេះឥស្សរជនទាំងបួនកាន់តួនាទីរដ្ឋផង និងជាថ្នាក់ដឹកនាំបក្សនយោបាយផង ដែលធ្វើឲ្យមានការរិះគន់ពីអ្នកនយោបាយយ៉ាងខ្លាំង។
រដ្ឋមន្ត្រីបួនរួបក្នុងជួរគណៈរដ្ឋមន្ត្រីរបស់នាយករដ្ឋមន្ត្រី ប្រាយុទ្ធ ចន្ទអូចា បានសម្រេចចិត្តលាលែងពីតំណែងនៅថ្ងៃទី២៩ ខែមករា។ រដ្ឋមន្ត្រីឧស្សាហកម្ម, ពាណិជ្ជកម្ម, វិទ្យាសាស្ត្រ និងបច្ចេកវិទ្យា និងរដ្ឋមន្ត្រីការិយាល័យនាយករដ្ឋមន្ត្រី បានចុះចេញពីតំណែងដើម្បីមានឱកាសគ្រប់គ្រាន់ដឹកនាំបក្ស Palang Pracharath ដែលគាំទ្ររបបយោធា។ យ៉ាងណាមិញ លោក ប្រាយុទ្ធ ដែលបក្សនេះគាំទ្រ ប្រកាសថា លោកមិនទាន់ឈប់ធ្វើនាយករដ្ឋមន្ត្រីឡើយ។
លោក ប្រាយុទ្ធ ដែលដឹកនាំរដ្ឋប្រហារខែឧសភា ឆ្នាំ២០១៤ និងដឹកនាំប្រទេសតាំងពីពេលនោះមក អះអាងថា លោកនឹងបន្តធ្វើជានាយករដ្ឋមន្ត្រី និងប្រធានក្រុមប្រឹក្សាសណ្ដាប់ធ្នាប់ និងសន្តិភាព (NCPO) ដដែល គឺរហូតដល់មានរដ្ឋាភិបាលថ្មីតែម្ដង។ បើតាមកាសែតបាងកកប៉ុស្តិ៍ មេដឹកនាំរបបយោធានិយាយបែបនេះ ជាការឆ្លើយតបទៅនឹងការទាមទាររបស់អ្នកនយោបាយថៃដែលចង់ឲ្យលោកចាកចេញតាមរដ្ឋមន្ត្រីទាំងបួន។
រដ្ឋមន្ត្រីទាំងបួនខាងលើបានបង្កើតបក្ស Palang Pracharath ដើម្បីចូលរួមការបោះឆ្នោតដែលកាលបរិច្ឆេទបានកំណត់ច្បាស់ហើយនៅថ្ងៃទី២៤ ខែមីនាខាងមុខ។ បក្សនេះក៏គាំទ្រលោក ប្រាយុទ្ធ ជាបេក្ខភាពនាយករដ្ឋមន្ត្រីរបស់ខ្លួនដែរ។ ជុំវិញបញ្ហា អ្នកសារព័ត៌មានសួរលោក ប្រាយុទ្ធ ថា មានផែនការលាលែងពីតំណែងឬអត់ បើបក្ស Palang Pracharath អញ្ជើញលោកឲ្យធ្វើជានាយករដ្ឋមន្ត្រីផ្លូវការ។ លោកក៏ឆ្លើយវិញថា បើខ្ញុំលាលែង នរណាធ្វើនាយករដ្ឋមន្ត្រីជំនួសខ្ញុំ?
ប្រមុខរដ្ឋាភិបាលយោធារូបនេះពន្យល់ការពារខ្លួនថា គ្មានច្បាប់ណាឲ្យលោកត្រូវចុះចេញពីតំណែងនាយករដ្ឋមន្ត្រីឡើយ ហើយសម្រាប់តំណែងប្រធាន NCPO វិញ គឺលោកបន្តអង្គុយប្រធានដដែល ព្រោះក្រុមប្រឹក្សានេះក៏នៅកាន់អំណាចរហូតមានរដ្ឋាភិបាលថ្មីដែរ។ សម្រាប់អនាគតទៅមុខទៀត លោក ប្រាយុទ្ធ បង្ហើបថា លោកអាចទទួលយកសំណើរបស់បក្សនយោបាយដើម្បីធ្វើជាបេក្ខភាពនាយករដ្ឋមន្ត្រីរបស់ពួកគេសម្រាប់ការបោះឆ្នោតខែមីនាខាងមុខ។
បន្ថែមពីលើនេះ មេដឹកនាំយោធារូបនេះក៏ប្រកាសថា អនាគតរបស់លោកនឹងដឹងនៅចន្លោះថ្ងៃទី៤ ដល់ទី៨ ខែកុម្ភៈ ដែលជាកាលបរិច្ឆេទបក្សនយោបាយបញ្ជូនបេក្ខភាពនាយករដ្ឋមន្ត្រីរបស់ខ្លួនទៅកាន់គណៈកម្មការរៀបចំការបោះឆ្នោត។ កន្លងមក លោក ប្រាយុទ្ធ ធ្លាប់ប្រកាសហើយថា ទោះមានសំណើពីបក្សណាក្ដី លោកនឹងចូលរួមតែជាមួយបក្សនយោបាយដែលបម្រើជាតិ ប្រជាជន និងមិនចង់បានអ្វីប៉ុណ្ណោះ៕
Tag:
ថៃ
ប្រាយុទ្ធ ចន្ទអូចា
© រក្សាសិទ្ធិដោយ thmeythmey.com