ម៉ាឌុយរ៉ូ ចោទថា អាមេរិកចង់បានធនធានរ៉ែនៅវ៉េណេស៊ុយអេឡាដូចធ្វើដាក់អ៊ីរ៉ាក់និងលីប៊ី

អន្តរជាតិ

ម៉ាឌុយរ៉ូ ចោទថា អាមេរិកចង់បានធនធានរ៉ែនៅវ៉េណេស៊ុយអេឡាដូចធ្វើដាក់អ៊ីរ៉ាក់និងលីប៊ី

31, Jan 2019 , 7:39 pm

រូបភាព

ដោយ: តន ចាន់រិទ្ធារ៉ា

ប្រធានាធិបតីវ៉េណេស៊ុយអេឡា នីកូឡាស់ ម៉ាឌុយរ៉ូ បានចោទអាមេរិកចំៗថា សម្លឹងឃើញភោគទ្រព្យធម្មជាតិដ៏សម្បើមរបស់វ៉េណេស៊ុយអេឡា ទើបធ្វើគ្រប់យ៉ាងដើម្បីបណ្ដេញលោកចេញពីតំណែង។ ក្នុងវីដេអូដែលបង្ហោះលើទំព័រ Facebook របស់ខ្លួន លោក ម៉ាឌុយរ៉ូ បានប្រាប់ប្រជាជនអាមេរិកឲ្យជួយទប់ស្កាត់ទង្វើរដ្ឋាភិបាលអាមេរិក ប៉ុន្តែឆ្លៀតព្រមានថា បើយោធាអាមេរិកហ៊ានជាន់ទឹកដីវ៉េណេស៊ុយអេឡា អាមេរិកនឹងជួបបញ្ហាធ្ងន់ជាងសង្គ្រាមនៅវៀតណាម។

ប្រឈមមុខនឹងសម្ពាធផ្ទួនៗរបស់អាមេរិក លោកប្រធានាធិបតីវ៉េណេស៊ុយអេឡា នីកូឡាស់ ម៉ាឌុយរ៉ូ នៅតែរឹងមាំ និងវាយបកអាមេរិកវិញដែរ។ លោក ម៉ាឌុយរ៉ូ បានបង្ហោះវីដេអូលើបណ្ដាញសង្គម Facebook ដែលរិះគន់រដ្ឋបាលក្រុងវ៉ាស៊ីនតោន និងប្រព័ន្ធផ្សព្វផ្សាយនៅអាមេរិក ដែលព្យាយាមលាបពណ៌វ៉េណេស៊ុយអេឡា ហើយកំពុងហុតទឹកសម្លឹងកាកផងដែរ។

ក្នុងវីដេអូ៤នាទីជាភាសាអេស្ប៉ាញ និងមានបកប្រែជាភាសាអង់គ្លេសផង លោក ម៉ាឌុយរ៉ូ ដែលចចេសមិនបោះបង់កៅអីប្រធានាធិបតី បានចោទអាមេរិកថា បានដាក់គោលដៅលើធនធានរ៉ែរបស់វ៉េណេស៊ុយអេឡា។ ប្រធានាធិបតីដែលទើបចូលកាន់តំណែងអាណត្តិទី២ ទាំងចម្រូងចម្រាសបន្តថា តាមរយៈការញុះញង់ឲ្យមានចលាចល ពួកអភិជនអាមេរិកចង់បានទ្រព្យសម្បត្តិរបស់វ៉េណេស៊ុយអេឡា ដូចដែលពួកគេធ្លាប់ធ្វើដោយជោគជ័យនៅអ៊ីរ៉ាក់ និងលីប៊ី។

រដ្ឋអាមេរិកឡាទីនមួយនេះ ត្រូវគេស្គាល់ថា មានប្រេងបម្រុងទុកធំជាងគេលើពិភពលោក និងជាប្រទេសមានឧស្ម័នបម្រុងច្រើនលំដាប់ទី៤ របស់ពិភពលោកផង។ បើតាមក្រុមប្រឹក្សាសម្រាប់ទំនាក់ទំនងការបរទេស (Council for Foreign Relations) វ៉េណេស៊ុយអេឡាមានប្រេងឆៅបម្រុងប្រហែល ៣០០ ពាន់លានបារ៉ែលឯណោះ។ ឧស្សាហកម្មប្រេង ធ្វើឲ្យវ៉េណេស៊ុយអេឡាស្គាល់ភាពមានបាន និងមានសេដ្ឋកិច្ចរីកចម្រើនខ្លាំង។ ប៉ុន្តែចាប់ពីការឡើងកាន់អំណាចរបស់លោក ម៉ាឌុយរ៉ូ បន្តពីលោក ហ៊ូហ្គោ ឆាវេស នៅឆ្នាំ២០១៣ មក ប្រទេសនេះបែរជាធ្លាក់ខ្លួនក្រស្មានមិនដល់រហូតដល់មានការតវ៉ាតាមផ្លូវ អតិផរណាខ្ពស់កប់ពពក និងវិបត្តិនយោបាយដូចសព្វថ្ងៃ។

ជ័យជម្នះរបស់លោក ម៉ាឌុយរ៉ូ ក្នុងការបោះឆ្នោតឆ្នាំ២០១៨ ដែលគ្មានវត្តមានប្រឆាំង ធ្វើឲ្យវិបត្តិនយោបាយកាន់តែឡើងកម្ដៅខ្លាំង។ បាតុករប្រឆាំងបានប្រមូលផ្ដុំគ្នាព្រោងព្រាតតាមដងផ្លូវស្ទើរគ្មានលស់ថ្ងៃ ខណៈស្ថានការណ៍វិវត្តដល់ថ្នាក់ប្រទេសមួយមានប្រធានាធិបតីពីរទៅហើយ។ ប្រធានសភាដែលដឹកនាំក្រុមប្រឆាំង ហ័ន ក្វៃដូ បានតាំងខ្លួនជាមេដឹកនាំបណ្ដោះអាសន្នរបស់វ៉េណេស៊ុយអេឡា ដោយមានអាមេរិក និងសម្ព័ន្ធមិត្តច្រើនទៀតគាំទ្រ។

រដ្ឋបាលលោក ដូណាល់ ត្រាំ បានព្រមានរួចហើយថា ក្រុងការ៉ាកាស់នឹងជួបផលវិបាកធំ បើហ៊ានប៉ះពាល់លោក ក្វៃដូ ។ ទីប្រឹក្សាសន្តិសុខជាតិអាមេរិក ចន ប៊ូលតុន គំរាមថា អាមេរិកនឹងគ្រប់ជម្រើសទាំងអស់ដើម្បីដោះស្រាយបញ្ហាជាមួយវ៉េណេស៊ុយអេឡារាប់ទាំងការប្រើប្រាស់យោធាផង។

យ៉ាងណាមិញ លោក ម៉ាឌុយរ៉ូ ហាក់មិនរអានឹងគំរាមរបស់អាមេរិកឡើយ។ តាមរយៈវីដេអូដែលបង្ហោះលើទំព័រ Facebook ផ្លូវការរបស់នៅថ្ងៃទី៣០ ខែមករា លោក ម៉ាឌុយរ៉ូ ដែលហៅខ្លួនឯងថា ប្រធានាធិបតីស្របច្បាប់ អំពាវនាវទៅកាន់ប្រជាជនអាមេរិកដែលលោកចាត់ទុកជាប្រជាជនដ៏ខ្ពង់ខ្ពស់ឲ្យបញ្ឈប់សកម្មភាពរដ្ឋាភិបាលអាមេរិក ព្រោះបើក្រុងវ៉ាស៊ីនតោនហ៊ានចូលអន្តរាគមន៍ យោធាអាមេរិកនឹងជួបបទពិសោធធ្ងន់ធ្ងរជាសង្គ្រាមវៀតណាមទៅទៀត៕