អន្តរជាតិ
អាមេរិក នឹងប្រាប់ឲ្យកូរ៉េខាងជើងបញ្ចេញព័ត៌មានលម្អិតទាក់ទងនុយក្លេអ៊ែរ តំណាងចរចានុយក្លេអ៊ែរកូរ៉េខាងជើង លោក Kim Hyok-chol និងសមភាគីអាមេរិក Stephane Biegun
× ប្រធានក្រុមចរចានុយក្លេអ៊ែររបស់អាមេរិក Stephen Biegun នឹងធ្វើដំណើរទៅកាន់ឧបទ្វីបកូរ៉េនៅចុងសប្ដាហ៍នេះ ដើម្បីជួបជាមួយសមភាគីកូរ៉េខាងជើង។ ជំនួបថ្នាក់មន្ត្រីក្រុមការងារនេះ នឹងផ្ដោតលើជំហានបន្ទាប់ទៀតក្នុងការរំសាយនុយក្លេអ៊ែររបស់កូរ៉េខាងជើងដែលកំពុងជាប់គាំង ខណៈមេដឹកនាំប្រទេសទាំងពីរនឹងជួបគ្នានៅខែកុម្ភៈនេះដែរ។ លោក Biegun អះអាងនៅថ្ងៃទី៣១ ខែមករា ថា លោកនឹងស្នើឲ្យកូរ៉េខាងជើងបញ្ចេញព័ត៌មានលម្អិតទាក់ទងកម្មវិធីនុយក្លេអ៊ែររបស់ខ្លួន។
មុនជំនួបមេដឹកនាំកំពូលមកទល់នៅពេលខាងមុខ មន្ត្រីក្រុមការងារអាមេរិក និងកូរ៉េខាងជើង នឹងជួបគ្នាជាមុនសិនដើម្បីស្វែងរកវិធីសាស្ត្រឈានទៅដល់ការលុបបំបាត់នុយក្លេអ៊ែរកូរ៉េខាងជើងទាំងស្រុង។ បេសកជនពិសេសអាមេរិក Stephen Biegun នឹងជួបជាមួយសមភាគីកូរ៉េខាងជើង Kim Hyok-chol នៅប៉ុន្មានទៀត ខណៈលោក Biegun នឹងធ្វើដំណើរទៅកាន់កូរ៉េខាងត្បូងនៅថ្ងៃទី៣ ខែកុម្ភៈចុងសប្ដាហ៍នេះ។ នេះបើតាមការប្រកាសរបស់ក្រសួងការបរទេសអាមេរិក។
ថ្លែងនៅឯសាកលវិទ្យាល័យមួយក្នុងរដ្ឋកាលីហ្វ័រនីញ៉ា លោក Biegun និយាយថា អាមេរិកនឹងស្នើសុំព័ត៌មានជាក់លាក់ពីកម្មវិធីនុយក្លេអ៊ែរ និងទីតាំងសាកល្បងនានាពីកូរ៉េខាងជើងជាមុន ដើម្បីត្រួតពិនិត្យឲ្យម៉ត់ចត់មុននឹងឈានដល់កិច្ចព្រមព្រៀងណាមួយ។ លើសពីនោះ កូរ៉េខាងជើងក៏ត្រូវព្រមព្រៀងជាមួយអាមេរិកក្នុងការធានាថា នុយក្លេអ៊ែរ មីស៊ីល ទីតាំងសាកល្បង ឃ្លាំងស្តុក និងអាវុធមហាប្រល័យដទៃទៀត ត្រូវតែកម្ទេចឲ្យអស់ដែរ។
ប្រមុខចរចានុយក្លេអ៊ែររបស់អាមេរិករូបនេះក៏ប្រាប់កូរ៉េខាងជើងដែរថា លោកប្រធានាធិបតី ដូណាល់ ត្រាំ ត្រៀមជួយកូរ៉េខាងជើងឲ្យមានអនាគតត្រចះត្រចង់ក្នុងវិស័យសេដ្ឋកិច្ច ប៉ុន្តែទណ្ឌកម្មនឹងនៅតែមានធរមានដដែលបើការរំសាយនុយក្លេអ៊ែរមិនទាន់មាន។ លោក Biegun មានសុទិដ្ឋិនិយមចំពោះនយោបាយរបស់លោក ត្រាំ ក្នុងការដោះស្រាយបញ្ហារ៉ាំរ៉ៃនេះ ទោះជារដ្ឋបាលប្រធានាធិបតីអាមេរិកមុនៗបរាជ័យក៏ដោយចុះ។
ឡើងកាន់តំណែងបានពីរឆ្នាំមកនេះ លោក ត្រាំ បានប្រឹងប្រែងក្នុងការដោះស្រាយសំណុំរឿងនុយក្លេអ៊ែរកូរ៉េខាងជើង។ លោកក៏សន្យាជួយកូរ៉េខាងជើងឲ្យមានជឿនលឿនដូចកូរ៉េខាងត្បូងឲ្យតែសុខចិត្តបោះបង់នុយក្លេអ៊ែររបស់ខ្លួនទាំងស្រុង។ ប្រធានាធិបតីអាមេរិក៏បានទាំងប្រាប់កូរ៉េខាងជើងទៀតថា អាមេរិកគ្មានបំណងធ្វើសង្គ្រាមឡើយ ហើយរឹតតែមិនមានបំណងផ្លាស់ប្ដូររបបដឹកនាំក្រុងព្យុងយ៉ាងទៅទៀត។ នេះបើតាមការលើកឡើងរបស់លោក Biegun ។
ការជួបគ្នានៅសិង្ហបុរីក្នុងឆ្នាំ២០១៨ ក្លាយជាចំណុចរបត់ប្រវត្តិសាស្ត្រដែលបង្ហាញពីការប្រឹងប្រែងរបស់លោក ត្រាំ ដើម្បីស្វែងរកច្រកចេញបញ្ហាឈឺក្បាលនេះ។ ប៉ុន្តែដំណើរការបន្ទាប់មក ហាក់ខុសឆ្ងាយពីការរំពឹងទុក ដ្បិតការរំសាយនុយក្លេអ៊ែរនៅតែមិនធ្វើបានដដែល។ ការជាប់គាំងនេះ ក៏នាំដល់ការរៀបចំជំនួបមេដឹកនាំលើកទីពីរដែលនឹងធ្វើនៅប្រទេសអាស៊ី។
នៅថ្ងៃទី៣១ ខែមករា លោក ត្រាំ បញ្ជាក់ថា ទីតាំង និងកាលបរិច្ឆេទពិតប្រាកដ នឹងត្រូវប្រកាសនៅសប្ដាហ៍ក្រោយនេះ។ ចំពោះមុខអ្នកសារព័ត៌មានជាច្រើន លោកថា វាគ្មានអ្វីជាការសំងាត់ធំដុំឡើយ ព្រោះពួកគេដឹងពីទីតាំងទៅហើយ។ បើគិតគូរតាមសម្ដីនេះ លោក ត្រាំ ទំនងចង់ប្រាប់ថា វៀតណាម ជាម្ចាស់រៀបចំជំនួបនេះ។ កន្លងមក វៀតណាម ក៏ប្រកាសថា ខ្លួនត្រៀមរៀបចំទទួលមេដឹកនាំទាំងពីរ ខណៈមានសេចក្ដីរាយការណ៍ខ្លះផ្សាយថា លោក គីម ក៏នឹងធ្វើទស្សនកិច្ចផ្លូវររដ្ឋផង៕
Tag:
អាមេរិក
កូរ៉េខាងជើង
© រក្សាសិទ្ធិដោយ thmeythmey.com