ជាតិ
សេដ្ឋកិច្ច
ADB នឹងអនុវត្តគម្រោងអភិវឌ្ឍធនធានទឹកនៅកម្ពុជា ដែលចំណាយជិត៤០០លានដុល្លារ
លោកស្រី Sunniya Durrani-Jamal ជួបលោក លឹម គានហោ។ រូបពីក្រសួងធនធានទឹក
×![]()
ភ្នំពេញ៖ ក្រសួងធនធានទឹកនិងឧតុនិយម បានបង្ហោះព័ត៌មានលើទំព័រហ្វសប៊ុករបស់ខ្លួនថា ធនាគារអភិវឌ្ឍន៍អាស៊ី (ADB) ប្រចាំកម្ពុជាផ្តល់ហិរញ្ញវត្ថុ៣៨០លានដុល្លារ សម្រាប់គម្រោងធ្វើឲ្យប្រសើរធារាសាស្ត្រកសិកម្ម និងគម្រោងបរិធានហិរញ្ញទានច្រើនយ៉ាងស្តីពីធារាសាស្ត្រ និងការគ្រប់គ្រងធនធានទឹក។ គម្រោងទាំងពីរនេះ ត្រូវចាប់ផ្តើមអនុវត្តនៅឆ្នាំ២០១៩នេះ ហើយនឹងត្រូវបញ្ចប់នៅឆ្នាំ២០២៣។
លោកស្រី Sunniya Durrani-Jamal ប្រធានតំណាង ADB ប្រចាំកម្ពុជាបានបញ្ជាក់ ក្នុងជំនួប ជាមួយលោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម កាលពីថ្ងៃទី១ ខែកុម្ភៈ ថា ការបន្តជួយសម្រាប់វិស័យធនធានទឹក គឺដើម្បីបន្តរួមចំណែកទ្រទ្រង់ដល់ការអភិវឌ្ឍ និងកំណើនសេដ្ឋកិច្ចកម្ពុជា។ ចំណុចនេះ នៅតែជារបៀបវារៈសំខាន់ និងជាអាទិភាពរបស់ ADB។ កិច្ចការនេះ នឹងផ្តោតការយកចិត្តទុកដាក់ជាពិសេសលើសុវត្ថិភាពទឹក ការធ្វើឲ្យប្រសើរនូវប្រសិទ្ធភាពផ្នែកធារាសាស្ត្រ ការគ្រប់គ្រងទឹកជំនន់ និងគ្រោះរាំងស្ងួត ការគ្រប់គ្រងធនធានទឹកចម្រុះសម្រាប់អាងទន្លេ និងការពង្រឹងស្ថាប័នជាដើម។
ក្រសួងធនធានទឹក បានស្រង់សម្តីរបស់លោកស្រី ទៅសរសេរថា សម្រាប់គម្រោងទាំងពីរផ្នែកនេះ ADB បានកំណត់ក្នុងយុទ្ធសាស្ត្រភាពជាដៃគូសម្រាប់កម្ពុជា២០១៩-២០២៣។ លោកស្រី Sunniya Durrani-Jamal បានចាត់ទុកការរៀបចំ និងការអនុវត្តយុទ្ធសាស្ត្រភាពជាដៃគូសម្រាប់កម្ពុជាក្នុងរយៈពេល៥ឆ្នាំនេះ ដើម្បីបន្តរួមចំណែកជួយដល់កិច្ចប្រឹងប្រែងរបស់រាជរដ្ឋាភិបាល ក្នុងការរក្សា និងជំរុញកំណើន និងនិរន្តរភាពនៃការអភិវឌ្ឍសេដ្ឋកិច្ចកម្ពុជា ឲ្យមានសន្ទុះទៅមុខជានិច្ច។
បើតាមប្រភពដដែល ប្រធានតំណាង ADB ប្រចាំកម្ពុជារូបនេះ និយាយថា កន្លងមក ក៏ដូចជាពេលបច្ចុប្បន្ន ការងារជាអាទិភាព និងកិច្ចសហប្រតិបត្តិការ ដែលត្រូវរួមគ្នាបន្តយកចិត្តទុកដាក់អនុវត្តឲ្យបានកាន់តែសកម្ម និងមានប្រសិទ្ធភាពថែមទៀត សំដៅរួមចំណែកជំរុញកំណើន និងការរីកចម្រើនប្រកបដាយនិរន្តរភាពនៃសេដ្ឋកិច្ចកម្ពុជាសម្រាប់ពេលបច្ចុប្បន្ន និងទៅអនាគត។
ក្នុងជំនួបនោះ លោក លឹម គានហោ បានសម្តែងក្តីសង្ឃឹម និងមានជំនឿយ៉ាងមុតមាំថា ADB នៅតែជាដៃគូគាំទ្រ និងសហប្រតិបត្តិការមួយដ៏សំខាន់របស់កម្ពុជា សម្រាប់ការបន្តជួយលើការអភិវឌ្ឍលើគ្រប់វិស័យឲ្យកាន់តែខ្លាំងថែមទៀត។ លោក លើកឡើងនៅចំពោះមុខលោកស្រី Sunniya Durrani-Jamal ថាក្រសួងធនធានទឹក ត្រៀមខ្លួនជាស្រេចក្នុងការបន្តធ្វើការជាមួយ ADB ដើម្បីជំរុញការគ្រប់គ្រង និងការអភិវឌ្ឍធនធានទឹក ឲ្យកាន់តែមានប្រសិទ្ធភាព និងប្រកបដោយនិរន្តរភាព សម្រាប់ការអភិវឌ្ឍ និងការរីកលូតលាស់សេដ្ឋកិច្ចនិងសង្គមកម្ពុជា។ នេះបើតាមខ្លឹសារលើទំព័រហ្វេសប៊ុករបស់ក្រសួងធនធានទឹកដដែល៕
Tag:
ADB
ធនធានទឹក
ជំនួយ
កម្ចី
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 4 ថ្ងៃ
