កូរ៉េខាងត្បូង ព្រមបង្កើនការចំណាយលើយោធាអាមេរិកដែលឈរជើងលើទឹកដីខ្លួន

អន្តរជាតិ

កូរ៉េខាងត្បូង ព្រមបង្កើនការចំណាយលើយោធាអាមេរិកដែលឈរជើងលើទឹកដីខ្លួន

05, Feb 2019 , 9:39 pm

រូបភាព

ដោយ: តន ចាន់រិទ្ធារ៉ា

កូរ៉េខាងត្បូង និងអាមេរិកបានព្រមព្រៀងជាគោលការណ៍លើការបែងចែកការចំណាយសម្រាប់យោធាអាមេរិកនៅកូរ៉េខាងត្បូង។ នេះបើតាមការប្រកាសរបស់ក្រសួងការបរទេសអាមេរិកនៅថ្ងៃទី៤ ខែកុម្ភៈ។ ការព្រមព្រៀងនេះ ធ្វើឡើងបន្ទាប់ពីអាមេរិកសុខចិត្តទទួលយកវិភាគទានរបស់កូរ៉េខាងត្បូងសម្រាប់វត្តមានទាហានខ្លួនទាំង២៨៥០០នាក់។ កូរ៉េខាងត្បូងបានបង្កើនការចំណាយបន្តិចធៀបនឹងលើកមុន ប៉ុន្តែនៅតែតិចជាងអ្វីដែលអាមេរិកចង់បាន។

ក្រោយការចរចាជាច្រើនលើក កូរ៉េខាងត្បូង និងអាមេរិកព្រមព្រៀងជាគោលការណ៍លើការចំណាយសម្រាប់ទ្រទ្រង់ការពង្រាយរបស់យោធាអាមេរិកដែលឈរជើងនៅកូរ៉េខាងត្បូង។ អ្នកនាំពាក្យក្រសួងការបរទេសអាមេរិកបានប្រកាសនៅថ្ងៃទី៤ ខែកុម្ភៈថា សហរដ្ឋអាមេរិក និងកូរ៉េខាងត្បូងបានឈានដល់ការឯកភាពជាគោលការណ៍លើកិច្ចព្រមព្រៀងបែងចែកការចំណាយ និងបន្តការចរចាលើជំហានបន្ទាប់ឲ្យបានលឿន។

ក្រោមកិច្ចព្រមព្រៀងចាស់ដែលចាប់ផ្ដើមឆ្នាំ២០១៤ កូរ៉េខាងត្បូងបានចំណាយទឹកប្រាក់ដល់ទៅ៨៤៨លានដុល្លារក្នុងមួយឆ្នាំសម្រាប់វត្តមានយោធាអាមេរិក។ មកទល់ឆ្នាំ២០១៨ កិច្ចព្រមព្រៀងបែងចែកការចំណាយនេះក៏អស់សុពលភាព ហើយក្រុងសេអ៊ូល និងក្រុងវ៉ាស៊ីនតោនក៏ចាប់ផ្ដើមចរចាជាថ្មី។ ស្របតាមគោលនយោបាយលោក ដូណាល់ ត្រាំ រដ្ឋបាលក្រុងវ៉ាស៊ីនតោនបានទាមទារឲ្យក្រុងសេអ៊ូលបង្កើនវិភាគទានរបស់ខ្លួនឲ្យបានលើសមួយពាន់លានដុល្លារក្នុងមួយឆ្នាំ។

ការទាមទាររបស់អាមេរិក ធ្វើឲ្យការចរចាបរាជ័យជាច្រើនលើក។ មន្ត្រីកូរ៉េខាងត្បូងអះអាងថា ខ្លួននឹងមិនចំណាយលើសពីមួយពាន់លានដុល្លារឡើយ។ បើតាមទីភ្នាក់ងារព័ត៌មាន Reuters អាមេរិកទំនងជាសុខចិត្តទទួលយកវិភាគទានរបស់កូរ៉េខាងត្បូង ដែលនឹងផ្ដល់ទឹកប្រាក់ចំនួន៨៩១លានដុល្លារប៉ុណ្ណោះសម្រាប់ឆ្នាំ២០១៩ នេះ។ ប៉ុន្តែកិច្ចព្រមព្រៀងថ្មីនេះ នឹងមានសុពលភាពតែមួយឆ្នាំ មិនមែនបីឆ្នាំដូចការចង់បានរបស់កូរ៉េខាងត្បូងឡើយ។

តាមពិតទៅ វិភាគទានរបស់កូរ៉េខាងត្បូងមិនមែនធ្លាក់លើកងទ័ពអាមេរិកទាំងស្រុងឡើយ។ ប្រមាណ៧០ភាគរយនៃការចំណាយរបស់សេអ៊ូល គឺផ្ដោតលើប្រាក់ខែរបស់បុគ្គលិកកូរ៉េខាងត្បូងជាង៨៧០០ពាន់នាក់ដែលបម្រើការផ្នែករដ្ឋបាល បច្ចេកទេស និងសេវាកម្មផ្សេងសម្រាប់យោធាអាមេរិក។ ក្រុងវ៉ាស៊ីនតោនក៏ធ្លាប់ព្រមានដែរថា បើភាគីទាំងពីរមិនអាចសម្រេចបានកិច្ចព្រមព្រៀងនៅត្រឹមពាក់កណ្ដាលខែមេសា អាមេរិកនឹងព្យួរការងារបុគ្គលិកកូរ៉េខាងត្បូងក្នុងបន្ទាយរបស់ខ្លួន។

តាំងពីឡើងកាន់តំណែងប្រធានាធិបតីមកនោះ លោក ត្រាំ បានប្រាប់ឲ្យប្រទេសទាំងឡាយមានមូលដ្ឋានទ័ពអាមេរិកជួយចេញថ្លៃចំណាយផង ព្រោះអាមេរិកចេញតែម្នាក់រាប់សិបឆ្នាំមកហើយ។ ជំហររបស់លោក ត្រាំ ធ្វើឲ្យសម្ព័ន្ធមិត្តមិនពេញចិត្តឡើយ តែក៏មិនអាចជំទាស់បានដែរ។ សម្រាប់កូរ៉េខាងត្បូង វត្តមានទាហានអាមេរិក ជាការរក្សាសន្តិសុខរបស់ខ្លួនប្រឈមមុខការគំរាមកំហែងរបស់កូរ៉េខាងជើងដែលនៅតែមានដដែល៕