នាយករដ្ឋមន្ត្រី ពុំបានព្រមានបិទហ្វេសប៊ុកនៅស្រុកខ្មែរទេ

ជាតិ

សង្គមជាតិ

នាយករដ្ឋមន្ត្រី ពុំបានព្រមានបិទហ្វេសប៊ុកនៅស្រុកខ្មែរទេ

26, Feb 2019 , 9:19 am

រូបភាព

ដោយ: ថ្មីៗ

សម្តេចនាយករដ្ឋមន្ត្រី ហ៊ុន សែន មិនមានចេតនាបិទបណ្តាញសង្គមហ្វេសប៊ុកនៅកម្ពុជាឡើយ។ សារលើទំព័រហ្វេសប៊ុករបស់លោក ដែលព្រមានថា លោក ចង់បិទបណ្តាញសង្គមដ៏មានប្រជាប្រិយភាពមួយនេះ គឺពួកឧក្រិដ្ឋជនបច្ចេកវិទ្យា (Hacker) ជាអ្នកសរសេរ។

នាយករដ្ឋមន្ត្រី បានហៅទូរសព្ទទៅប្រាប់ Fresh News យ៉ាងដូច្នេះថា៖«ហ្វេសប៊ុករបស់ខ្ញុំត្រូវបានក្រុមឧក្រិដ្ឋជនបច្ចេកវិទ្យាគ្រប់គ្រង ហើយសារដែលសរសេរថា ខ្ញុំព្រមានបិទហ្វេសប៊ុកនៅកម្ពុជា មិនមែនជាសាររបស់ខ្ញុំនោះទេ គឺខ្លឹមសារក្រុម Hacker។ ខ្ញុំសូមទាត់ចោលនូវព័ត៌មានបំពុលសង្គមមួយនេះ»។

នៅព្រឹកថ្ងៃទី២៥ ខែកុម្ភៈ ឆ្នាំ២០១៩ ទំព័រហ្វេសប៊ុករបស់នាយករដ្ឋមន្ត្រីខ្មែរ ត្រូវបានគេលួចចូលទៅគ្រប់គ្រង ហើយទិន្នន័យជាច្រើនត្រូវបានបាត់បង់។ ហើយពេលនោះ សារដ៏ភ្ញាក់ផ្អើលមួយ ក៏លេចឡើងលើទំព័រហ្វេសប៊ុករបស់នាយករដ្ឋមន្ត្រីថា៖«បើអ្នកឯងហ៊ានបិទហ្វេសប៊ុករបស់ខ្ញុំ ខ្ញុំនិងបិទលែងឲ្យប្រើហ្វេសប៊ុកនៅស្រុកខ្មែ»។

ប៉ុន្មានម៉ោងក្រោយមក ក្រុមអ្នកជំនាញរបស់នាយករដ្ឋមន្ត្រី ក៏ដណ្តើមគ្រប់គ្រងទំព័រហ្វេសប៊ុកពីក្រុម Hacker បានវិញទាំងស្រុង។ បច្ចុប្បន្ន ទំព័រហ្វេសប៊ុករបស់នាយករដ្ឋមន្ត្រីរូបនេះ មានគេចុច Like ជាង១០លាន៕