អន្តរជាតិ
រដ្ឋប៉ាស៊ីហ្វិក Cook Islands ពិចារណាប្តូរឈ្មោះថ្មីដែលស្របនឹងវប្បធម៌ខ្លួន
× រដ្ឋកោះដែលស្ថិតក្នុងមហាសមុទ្រប៉ាស៊ីហ្វិក Cook Islands កំពុងពិចារណាផ្លាស់ប្តូរឈ្មោះថ្មីដែលអាចរំលេចពីអត្តសញ្ញាណ និងវប្បធម៌របស់ខ្លួនផ្ទាល់ ដើម្បីជំនួសឲ្យឈ្មោះបច្ចុប្បន្នដែលឧទ្ទិសឲ្យអ្នករុករកជនជាតិអង់គ្លេស James Cooks។
គណៈកម្មការពិសេសមួយត្រូវបានរដ្ឋាភិបាលកោះ Cook បង្កើតឡើងដើម្បីសិក្សាឲ្យបានលម្អិត និង ស្វែងរកឈ្មោះថ្មីមួយដែលមានលក្ខណៈសមស្របតាមវប្បធម៌ប្រពៃណីជនជាតិដើមដែលរស់នៅលើកោះរបស់ខ្លួនសរុបទាំង១៥។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។
ប្រធានគណៈកម្មការលោក Danny Mataroa បានអះអាងនៅថ្ងៃចន្ទដើមសប្តាហ៍នេះថា វាមានការឯកភាព និងមានការគាំទ្រលើការបញ្ចប់ការប្រើប្រាស់ឈ្មោះ « Cook Islands» តទៅទៀត ។ ប៉ុន្តែមិនទាន់មានការកំណត់នៅឡើយទេចំពោះឈ្មោះថ្មីដែលត្រូវយកមកជំនួសនោះ។
«នៅពេលសមាជិកគណៈកម្មការដែលរួមមានទាំងអ្នកប្រវត្តិសាស្ត្រ និងចាស់ៗបុរាណដែលមានចំណេះដឹងខ្ពស់ផ្នែកប្រពៃណីនិងទំនៀមទម្លាប់នោះបានសម្រេចហើយថា វាជាពេលដែលត្រូវប្តូរឈ្មោះប្រទេស។ ចំណែកឈ្មោះថ្មីចាំបាច់ត្រូវតែរំលេចឲ្យឃើញពីបេតិកភណ្ឌ ប្រពៃណី និងជំនឿពិសេសលើសាសនគ្រឹស្តរបស់ប្រជាជនយើង»។ លោក Danny Mataroa បានបញ្ជាក់ដូច្នេះ។
ស្ថិតនៅចម្ងាយប្រហែល ៣០០០គីឡូម៉ែត្រពីនូវែលសេឡង់ ប្រជាជនដែលរស់នៅលើកោះ Cook សម្រេចយកឈ្មោះបែបនេះដើម្បីឧទ្ទិសដល់អ្នករុករកជនជាតិអង់គ្លេសលោក James Cook។ ដូច្នេះហើយទើបបានជាពេលនេះប្រជាជនកោះនេះចង់ឲ្យមានការផ្លាស់ប្តូរឈ្មោះវិញឲ្យសមស្របតាមអត្តសញ្ញាណនិងវប្បធម៌ប្រជាជនប៉ូលីណេស៊ី។
ដោយឡែក ឧបនាយករដ្ឋមន្ត្រីកោះ Cook លោក Mark Brown បង្ហាញជំហរគាំទ្រការឈានទៅប្តូរឈ្មោះនេះ ប៉ុន្តែលោកទទួលស្គាល់ថា វាត្រូវការពេលវេលាយូរទម្រាំកោះដែលមានប្រជាជនប្រហែល ១២០០០នាក់នេះប្តូរឈ្មោះជាផ្លូវការបាន។
សូមរម្លឹកបន្តិចថា កោះ Cook ស្ថិតក្រោមអាណាព្យាបាលរបស់អង់គ្លេសពីឆ្នាំ ១៨៨៨ ដល់ឆ្នាំ ១៩០០ មុននឹងត្រូវផ្ទេរមកជាទឹកដីអាណានិគមនៅក្រោមការគ្រប់គ្រងរួមជាមួយនូវែលសេឡង់។ ដល់ឆ្នាំ ១៩៦៥ Cook ទទួលបានប្រកាសឯករាជ្យជាផ្លូវការ ប៉ុន្តែរាល់ទំនាក់ទំនងការបរទេសត្រូវគ្រប់គ្រងដោយរដ្ឋាភិបាលនូវែលសេឡង់វិញ។ ចំណែកប្រជាជនកោះ Cook អាចរស់នៅ ឬចេញចូលនូវែលសេឡង់បានដោយងាយស្រួលដែរ។
តាមពិតទៅ វាមិនមែនជាលើកដំបូងឡើយដែលបញ្ហាជុំវិញការប្តូរឈ្មោះនេះត្រូវបានគេលើកយកមកពិភាក្សាគ្នា។ ឆ្នាំ ១៩៩៤ មានប្រជាមតិមួយត្រូវបានគេរៀបចំឡើងដើម្បីសួរមតិយោបល់ប្រជាជនលើការប្តូរឈ្មោះកោះទៅ Avaiki Nui ប៉ុន្តែវាទទួលបរាជ័យ។
Tag:
Cook Islands
ប៉ាស៊ីហ្វិក
នូវែលសេឡង់
© រក្សាសិទ្ធិដោយ thmeythmey.com