ឧស្សាហកម្មភាពយន្តជោគជ័យខ្លាំងក្នុងឆ្នាំ២០១៨ ដោយរកចំណូលជិត១០០ពាន់លានដុល្លារ

អន្តរជាតិ

ឧស្សាហកម្មភាពយន្តជោគជ័យខ្លាំងក្នុងឆ្នាំ២០១៨ ដោយរកចំណូលជិត១០០ពាន់លានដុល្លារ

23, Mar 2019 , 8:59 am

រូបភាព

ដោយ:

ឧស្សាហកម្មភាពយន្តនៅទូទាំងពិភពលោក ទទួលជោគជ័យខ្លាំងដែលពុំធ្លាប់មានពីមុនមកក្នុងឆ្នាំ២០១៨ ដោយរកចំណូលបានចំនួន៩៦,៨ពាន់លានដុល្លារ។ ក្នុងចំណោមនោះ ៤០ពាន់លានដុល្លារបានមកពីការលក់សំបុត្រតាមបណ្តារោងកុន។ នេះបើតាមតួលេខថ្មីមួយ ដែលចុះផ្សាយកាលពីថ្ងៃទី២១ ខែមីនា ឆ្នាំ២០១៩ ដោយសមាគម Motion Picture អាមេរិក (MPAA) ។

បច្ចុប្បន្ននេះ ក្រៅពីទស្សនាភាពយន្តនៅតាមបណ្តារោងកុននានា គេឃើញមានសម្ទុះនៃការប្រើប្រាស់សេវាកម្ម Streaming វីដេអូតាមអនឡាញ រួមមាន Netflix និង Amazon Prime ជាដើម។ ត្រង់ចំណុចនេះ សមាគម Motion Picture អាមេរិក ដែលមានសមាជិកភាព រួមមាន ផលិតកម្មធំៗរបស់ហូលីវូតចំនួន៦ និងក្រុមហ៊ុន Netflix គូសបញ្ជាក់ថា ប្រមាណជាង ៥២ភាគរយនៃពេលវេលាប្រើប្រាស់ឧបករណ៍អេឡិចត្រូនិករបស់ប្រជាជនអាមេរិក ចំណាយលើបណ្តាញឌីជីថល។

យោងតាមរបាយការណ៍ខាងលើ ទីផ្សារភាពយន្តសកល រាប់បញ្ចូលទាំងនៅតាមរោងកុន និងនៅតាមផ្ទះ មានកំណើនប្រមាណ៩ភាគរយ បើធៀបទៅនឹងឆ្នាំ២០១៧។ ការកើនឡើងនេះ ត្រូវជំរុញដោយសម្ទុះខ្សែភាពយន្តក្នុងចក្រវាល Marvel ចំនួនពីរ រួមមាន « Black Panther» រកចំណូលបានជាង១,៣ពាន់លានដុល្លារ និង «Avengers: Infinity War» រកចំណូលបានជាង២ពាន់លានដុល្លារ។ ភាពយន្តទាំងពីរនេះ ចាក់បញ្ចាំងក្នុងឆ្នាំ២០១៨។

បន្ថែមពីចំណូលមកពីការលក់សំបុត្រកុន ការចំណាយសម្រាប់ទស្សនាភាពយន្តនៅតាមផ្ទះ រួមមាន ការភ្ជាប់សេវាកម្មទូរទស្សន៍ខ្សែកាប និងជាវសេវាកម្ម Streaming ស្ទុះឡើងដល់១៦ភាគរយ បើធៀបនឹងឆ្នាំ២០១៧ ដែលឈានដល់ ៥៥,៧ពាន់លានដុល្លារ។ តួលេខនេះ បានបំបែកកំណត់ត្រាជាលើកដំបូង ដែលវ៉ាដាច់ចំណូលលក់សំបុត្រនៅតាមរោងកុន។ បើតាមការចុះផ្សាយរបស់ទីភ្នាក់ងារព័ត៌មាន AFP គិតចាប់ពីឆ្នាំ២០១៤មក ការចំណាយលើប្រព័ន្ធឌីជីថល បានកើនឡើងប្រមាណ ១៧០ភាគរយនៅទូទាំងសកលលោក។

សូមបញ្ជាក់ថា ក្នុងឆ្នាំ២០១៨ ការលក់សំបុត្រកុនក្នុងសហរដ្ឋអាមេរិក និងកាណាដា បូកបញ្ចូលគ្នាមានចំនួន១១,៩ពាន់លានដុល្លារ។ ចិនឯណោះវិញ រកចំណូលបាន៩ពាន់លានដុល្លារ និងជប៉ុនរកបាន២ពាន់លានដុល្លារ តាមពីក្រោយដោយចក្រភពអង់គ្លេស បារាំង ឥណ្ឌា និងអាល្លឺម៉ង់៕