កីឡាជាតិ
ជាតិ
AFC U23៖ កម្ពុជាស្មើឆាយនីសតៃប៉ិ រីឯកូរ៉េខាងត្បូង និងអូស្ត្រាលីនាំគ្នាទៅវគ្គបន្ត ប្រាក់ ធីវ៉ា ប្រជែងយកបាល់ជាមួយកីឡាកររបស់ឆាយនីសតៃប៉ិ។ រូបថត សហព័ន្ធកីឡាបាល់ទាត់កម្ពុជា
× ក្រុមកីឡាបាល់ទាត់ជម្រើសជាតិអាយុក្រោម២៣ឆ្នាំរបស់កម្ពុជា បានបញ្ចប់យុទ្ធនាការ AFC U23 Championship ជាមួយនឹងលទ្ធផលស្មើឆាយនីសតៃប៉ិ ១-១ នាជំនួបចុងក្រោយពូល H ល្ងាចថ្ងៃអង្គារ ទី២៦ ខែមីនា នៅពហុកីឡដ្ឋានជាតិអូឡាំពិក។ រីឯជំនួបគូទីមួយ កូរ៉េខាងត្បូង និងអូស្ត្រាលី ចាប់ដៃគ្នាទៅកាន់វគ្គបន្តនៅប្រទេសថៃ ក្រោយលទ្ធផលស្មើ ២-២ ។
សមាសភាព U23 កម្ពុជា ស្ទើរតែផ្លាស់ប្តូរទាំងស្រុង បើប្រៀបធៀបទៅនឹងជំនួបជាមួយអូស្ត្រាលី និងកូរ៉េខាងត្បូង ជាពិសេសលោក Keisuke Honda ដែលជាអ្នកចាត់ការទូទៅ និងគ្រូបង្វឹកលោក Felix Dalmas ផ្តល់ឱកាសដល់កីឡាករទាំងអស់បានចូលលេងដើម្បីពង្រឹងសមត្ថភាព។
U23 កម្ពុជា បើកការវាយលុកទៅលើក្រុមភ្ញៀវ ហើយនៅនាទី៤០ ស៊ិន កក្កដា បានប្រើជើងឆ្វេងស៊ុតបញ្ចូលទីនាំមុខបានសម្រេច ក្រោយការបញ្ជូនរបស់ ឃៀង ម៉េងហ៊ួ។ ឈានដល់នាទី៥៧ ខ្សែការពារ Philip John Ponder បានវាយបកតាមស្មើវិញសម្រាប់ក្រុមភ្ញៀវ ហើយក៏ជាគ្រាប់បាល់ដំបូងរបស់ឆាយនីសតៃប៉ិ នៅក្នុងព្រឹត្តិការណ៍នេះផងដែរ។
សម្រាប់គូប្រកួតគូទីមួយ ខ្សែប្រយុទ្ធ Nicholas D’Agostino រកបានគ្រាប់បញ្ចូលទី២គ្រាប់នាំមុខគ្រាប់សម្រាប់អូស្ត្រាលី តែ Cho Young-wook និង Lee Dong-gyeong រកបានគ្រាប់បញ្ចូលម្នាក់១គ្រាប់ដើម្បីតាមស្មើសម្រាប់កូរ៉េខាងត្បូង។
លទ្ធផលស្មើនាំឲ្យកូរ៉េខាងត្បូង មាន៧ពិន្ទុឈរលេខមួយពូល H ខណៈអូស្ត្រាលីដែលមាន៧ពិន្ទុដូចគ្នា តែចាញ់គ្រាប់បាល់ស៊ុតបញ្ចូលទី ក៏ត្រូវឡើងទៅវគ្គបន្តផងដែរក្នុងនាមជាក្រុមលេខពីរដែលល្អជាងគេ។
ជម្រើសកម្ពុជា៖ សាវែង សំណាង (អ្នកចាំទី), សឿត បារាំង, អ៊ន ចាន់ប៉ូលីន (ប្រធានក្រុម), អ៊ុក សុវណ្ណ, កែន ច័ន្ទសុភ័ក្ត្រ, ទេស សម្បត្តិ, ប្រាក់ ធីវ៉ា, ស៊ិន កក្កដា, យ៉ើ មូស្លីម (សៀង ចន្ធា ៨៦), ជា វេស្លី (ទៀត គឹមហេង ៧៨), ឃៀង ម៉េងហ៊ួ (ណារ៉ុង កក្កដា ៦១)៕
© រក្សាសិទ្ធិដោយ thmeythmey.com