អន្តរជាតិ
ការធ្វើអត្តឃាត ជាឃាតករលាក់មុខធំបំផុតក្នុងចំណោមកុមារជប៉ុន
× បន្ទាប់ពីវិភាគលើទិន្នន័យប្រជាសាស្ត្រពីរដ្ឋាភិបាលជប៉ុន ការធ្វើអត្តឃាតបានក្លាយជាមូលហេតុដ៏ធំបំផុតនៃការស្លាប់របស់កុមារក្នុងប្រទេសជប៉ុន ដែលមានអាយុចន្លោះពី ១០ ទៅ ១៤ឆ្នាំ ។ បើតាមសារព័ត៌មានជប៉ុន Kyodo នេះគឺជាលើកដំបូងបង្អស់ហើយ ដែលការធ្វើអត្តឃាតត្រូវទទួលស្គាល់ ជាឃាតករលាក់មុខដ៏ធំជាងគេ បន្ទាប់ពីជំងឺមហារីក គិតចាប់ពីក្រោយជំនាន់សម័យសង្គ្រាមលោកមក។
ថ្វីបើតួលេខសរុបនៃប្រជាជនដែលស្លាប់ដោយសារធ្វើអត្តឃាតនៅជុំវិញប្រទេសជប៉ុន ធ្លាក់ចុះគួរឲ្យកត់សម្គាល់ក្នុងរយៈពេលប៉ុន្មានឆ្នាំចុងក្រោយនេះពិតមែន។ ប៉ុន្តែស្ថិតិឆ្នាំ ២០១៧របស់ក្រសួងសុខាភិបាលជប៉ុន បង្ហាញថា កុមារ១០០នាក់ក្នុងចំណោមអាយុពី១០ទៅ១៤ឆ្នាំ បានបញ្ចប់ជីវិតខ្លួនឯង ដែលស្មើនឹងប្រមាណ ២២,៩ភាគរយនៃការស្លាប់ក្នុងជំនាន់របស់ពួកគេ។
បើតាមរបាយការណ៍ខាងលើដដែល ការស្លាប់ដោយសារជំងឺមហារីក ធ្លាក់មកនៅចំណាត់ថ្នាក់លេខពីរ ប្រមាណ២២,៧ភាគរយ និងតាមពីក្រោយដោយការសម្លាប់ដោយឧប្បទ្ទវហេតុ ប្រមាណ១១,៧ភាគរយ។ ជារួម តួលេខប្រជាជនជប៉ុនដែលបានស្លាប់ដោយសារការធ្វើអត្តឃាត កាលពីឆ្នាំ២០០៣ មានចំនួនច្រើនជាង ៣២០០០នាក់ មុននឹងចាប់ផ្តើមធ្លាក់ចុះមកត្រឹមចំនួន ២០៤៦៥នាក់ក្នុងឆ្នាំ២០១៧។
យ៉ាងណាមិញ តួលេខអ្នកស្លាប់ដោយការធ្វើអត្តឃាតក្នុងចំនួនមនុស្ស១០ម៉ឺននាក់នៃក្រុមមនុស្សអាយុចន្លោះពី ១០ ទៅ១៩ឆ្នាំ នៅតែមិនប្រែប្រួលដដែល។ ឯក្នុងចំណោមអ្នកដែលមានអាយុពី១៥ ទៅ ៣៩ ឆ្នាំ ការធ្វើអត្តឃាតគឺជាមូលហេតុដ៏ធំនៃការស្លាប់របស់ពួកគេ ចាប់តាំងពីឆ្នាំ២០១២មកម្ល៉េះ ហើយពាក់កណ្តាលនៃអ្នកទាំងនោះគឺស្ថិតក្នុងវ័យ២០ឆ្នាំ។
ចំពោះកត្តាដែលបង្កឲ្យកុមារអាយុចន្លោះពី ១០ ទៅ ១៤ ឆ្នាំ ធ្វើអត្តឃាត ពុំទាន់ត្រូវបានបញ្ជាក់ឲ្យច្បាស់នៅឡើយទេ។ នេះបើយោងតាមរបាយការណ៍របស់ក្រសួងសុខាភិបាលជប៉ុន និងឯកសារផ្សេងៗទៀត។ ភាគច្រើននៃអ្នកដែលបានធ្វើអត្តឃាតទាំងនោះ ពុំធ្លាប់មានបំណងសម្លាប់ខ្លួនឯងពីមុនមកទេ ដែលវាបណ្តាលឲ្យមនុស្សផ្សេងទៀតនៅជុំវិញពួកគេពិបាកក្នុងកត់ចំណាំពីសញ្ញានៃការចង់ធ្វើអត្តឃាត។
បើតាមសារព័ត៌មាន Kyodo លោកស្រី Junko Sakanaka មន្ត្រីរដ្ឋាភិបាលជប៉ុនទទួលបន្ទុកទប់ស្កាត់ការធ្វើអត្តឃាត ចាត់ទុករបាយការណ៍នេះជា «ស្ថានការណ៍ធ្ងន់ធ្ងរ» មួយ។ លោកស្រីបន្ថែមថា៖«ដើម្បីការពារក្មេងៗពីការបញ្ចប់ជីវិតរបស់ពួកគេ យើងត្រូវឈ្វេងយល់ពីស្ថានភាពជាក់ស្តែងរបស់ក្មេងៗទាំងនោះឲ្យលម្អិត និងតាមដានសញ្ញាមិនប្រក្រតីណាមួយ ដែលពួកគេសម្តែងចេញមក»៕
Tag:
ជប៉ុន
ការសិក្សា
ការធ្វើអត្តឃាត
© រក្សាសិទ្ធិដោយ thmeythmey.com