លិខិតបួនពីនាយករដ្ឋមន្ត្រីខ្មែរ ផ្ញើទៅតួកគី វៀតណាម ថៃ និង ឡាវ សុំឲ្យជួយផ្គត់ផ្គង់អគ្គិសនី

ជាតិ

សង្គមជាតិ

លិខិតបួនពីនាយករដ្ឋមន្ត្រីខ្មែរ ផ្ញើទៅតួកគី វៀតណាម ថៃ និង ឡាវ សុំឲ្យជួយផ្គត់ផ្គង់អគ្គិសនី

29, Mar 2019 , 5:20 pm

រូបភាព

ពីឆ្វេងទៅស្តាំ៖ នាយករដ្ឋមន្ត្រីកម្ពុជា ជួបជាមួយលោក Recep Tayyip Erdogan ប្រធានាធិបតីតួកគី, ជាមួយលោក ប្រាយុទ្ធ នាយករដ្ឋមន្ត្រីថៃ, ជាមួយលោក Nguyen Xuan Phuc នាយករដ្ឋមន្រ្តីវៀតណាម, និងជាមួយលោក ថងលូន ស៊ីស៊ូលីត នាយករដ្ឋមន្ត្រីឡាវ

ដោយ: ថ្មីៗ

កម្ពុជា ទិញម៉ាស៊ីនភ្លើងផ្ទុកអគ្គិសនី២០០មេហ្កាវ៉ាត់ពីតួកគី ហើយសុំឲ្យវៀតណាម ជួយផ្គត់ពី៥០ទៅ១០០មេហ្កាវ៉ាត់បន្ថែម សុំឲ្យថៃ ជួយផ្គត់ផ្គង់៨០មេហ្កាវ៉ាត់បន្ថែម និងសុំឲ្យឡាវ ជួយផ្គត់ផ្គង់១០មេហ្កាវ៉ាត់បន្ថែម។

រដ្ឋាភិបាលកម្ពុជា ខ្នះខ្នែងស្វែងរកជំនួយពីបណ្តាប្រទេសមួយចំនួន ដើម្បីសុំឲ្យជួយផ្គត់ផ្គង់អគ្គិសនីកម្ពុជា ដែលកំពុងខ្វះខាត។ មានរដ្ឋាភិបាលបរទេសបួន គឺតួកគី វៀតណាម ថៃ និង ឡាវ ដែលសម្តេច ហ៊ុន សែន ប្រមុខរដ្ឋាភិបាលកម្ពុជា បានផ្ញើលិខិតទៅជូន ដើម្បីសុំឲ្យជួយផ្គត់ផ្គង់អគ្គិសនី។

ក្នុងវេទិការវាងរដ្ឋាភិបាលកម្ពុជានិងវិស័យឯកជន នៅវិមានសន្តិភាព នាព្រឹកថ្ងៃទី២៩ ខែមីនា ឆ្នាំ២០១៩ សម្តេចនាយករដ្ឋមន្ត្រី ហ៊ុន សែន បានលើកឡើងថា លិខិត ដែលផ្ញើទៅរដ្ឋាភិបាលតួកគី គឺទាក់ទងនឹងកិច្ចព្រមព្រៀងនៃការបញ្ជូនម៉ាស៊ីនមកកម្ពុជា ដែលម៉ាស៊ីននោះ អាចផ្គត់ផ្គង់អគ្គិសនី២០០មេហ្កាវ៉ាត់។ សម្តេចនាយក ថ្លែងបែបនេះថា៖«យើងបានចរចាត្រូវគ្នាហើយ»។

លោក វុចទ័រ ហ្សូនា អ្នកនាំពាក្យអគ្គិសនីកម្ពុជា ប្រាប់សារព័ត៌មានថ្មីៗតាមទូរសព្ទថា បន្ទាប់ពីចុះកិច្ចព្រមព្រៀងពាណិជ្ជកម្មជាមួយគ្នារួចហើយ រដ្ឋាភិបាលតួកគី អាចនឹងបញ្ជូនម៉ាស៊ីននោះ មកកម្ពុជា ក្នុងរយៈពេល៥សប្តាហ៍ក្រោយ។ លោក បន្តថា ម៉ាស៊ីនភ្លើងនោះ គឺកម្ពុជាទិញពីតួកគី មិនមែនជាជំនួយទេ។ តែអ្នកនាំពាក្យរូបនេះ ពុំបានបញ្ជាក់ពីតម្លៃឡើយ។

ចំណែក លិខិត ដែលផ្ញើទៅរដ្ឋាភិបាលវៀតណាម គឺដើម្បីសុំឲ្យជួយផ្គត់ផ្គង់អគ្គិសនីកម្ពុជា ចម្លោះពី៥០ទៅ១០០មេហ្កាវ៉ាត់បន្ថែមទៀត ខណៈបច្ចុប្បន្ន វៀតណាម ជួយផ្គត់ផ្គង់ប្រមាណ២០០មេហ្កាវ៉ាត់។ នេះជាការអះអាងរបស់ប្រមុខរដ្ឋាភិបាលកម្ពុជាដដែល។

ចំពោះ ថៃ និង ឡាវ ប្រមុខរដ្ឋាភិបាលកម្ពុជា ពុំបានបញ្ជាក់ទេ ថាសុំឲ្យជួយផ្គត់ផ្គត់អគ្គិសនីប៉ុន្មានបន្ថែមទៀត។ ប៉ុន្តែ កន្លងមក អគ្គិសនីកម្ពុជា ផ្តល់ព័ត៌មានថា ថៃ យល់ព្រមជួយផ្គត់ផ្គង់អគ្គិសនីកម្ពុជា៨០មេហ្កាវ៉ាត់បន្ថែម និង ឡាវ ជួយផ្គត់ផ្គង់១០មេហ្កាវ៉ាត់បន្ថែម។

ក្នុងវេទិកាខាងលើ ដែលមានវត្តមានទូតនៃបណ្តាប្រទេសទាំងនោះដែរនោះ មេដឹកនាំកម្ពុជា ថ្លែងបែបនេះថា៖«បើបានកាន់តែឆាប់ កាន់តែល្អ ដើម្បីយើងខ្ញុំបានដោះស្រាយបញ្ហា»។

លោក វុចទ័រ ហ្សូនា លើកឡើងថា ចំពោះការផ្គត់ផ្គង់អគ្គិសនីពីវៀតណាម ថៃ និង ឡាវ ក៏ជាការទិញដែរ ពោលគឺមិនមែនប្រទេសទាំងនេះ ជួយផ្គត់ផ្គង់ដោយមិនគិតថ្លៃនោះទេ។

មូលហេតុធំៗពីរយ៉ាង ដែលបណ្តាលឲ្យកម្ពុជា ជួបបញ្ហាខ្វះអគ្គិសនី គឺគ្រោះរាំងស្ងួតនិងការកើនឡើងនូវវិស័យសំណង់។ ប្រមុខរដ្ឋាភិបាលកម្ពុជា បញ្ចេញរបាយការណ៍ថា គ្រាន់តែរយៈពេលប៉ុន្មានខែនៃដើមឆ្នាំ២០១៩នេះ វិស័យសំណង់ បានកើនឡើងដល់ទៅប្រមាណ៧០០ភាគរយឯណោះ បើប្រៀបធៀបនឹងឆ្នាំមុន។

អគ្គិសនីដែលខ្វះខាត គឺប្រមាណ៤០០មេហ្កាវ៉ាត់។ អគ្គិសនីកម្ពុជា បានឲ្យដឹងថា ការខ្វះខាតនេះ នឹងអូសបន្លាយរហូតដល់ចុងខែឧសភា ឆ្នាំ២០១៩។

ស្របជាមួយគ្នានេះ ប្រមុខរដ្ឋាភិបាល បានអំពាវនាវឲ្យប្រជាពលរដ្ឋ ដែលមានម៉ាស៊ីនភ្លើងស្រាប់ ឲ្យប្រើប្រាស់ម៉ាស៊ីនភ្លើងរបស់ខ្លួនសិន ចំណែកអ្នកដែលមានលទ្ធភាព គួរទិញម៉ាស៊ីនភ្លើង ខណៈអគ្គិសនី មិនមានការផ្គត់ផ្គង់ទៀងទាត់។ បន្ថែមពីលើនេះ ប្រមុខរដ្ឋាភិបាល ក៏បានស្នើឲ្យប្រជាពលរដ្ឋ សំន្សំសំចៃក្នុងការប្រើប្រាស់អគ្គិសនីផងដែរ៕