ព្រូដិនសល និង អេស៊ីលីដា សម្រួលការបង់បុព្វលាភអតិថិជន តាមអេស៊ីលីដា យូនីធី ទាន់ចិត្ត

អត្ថបទពាណិជ្ជកម្ម

ព្រូដិនសល និង អេស៊ីលីដា សម្រួលការបង់បុព្វលាភអតិថិជន តាមអេស៊ីលីដា យូនីធី ទាន់ចិត្ត

30, Mar 2019 , 4:25 pm

រូបភាព

ដោយ: ថ្មីៗ

ភ្នំពេញ៖ ថ្ងៃទី២៩ ខែមិនា ឆ្នាំ២០១៩ ធនាគារ អេស៊ីលីដា ភីអិលស៊ី (ប្រជាធនាគារដែលលោកអ្នកជឿទុកចិត្ត) និង ក្រុមហ៊ុនព្រូដិនសលកម្ពុជា ដែលជាក្រុមហ៊ុនធានារ៉ាប់រងអាយុជីវិតឈានមុខគេក្នុងប្រទេសកម្ពុជា ក្រោមភាពជាដៃគូយុទ្ធសាស្ដ្រ បានប្រកាសជាសាធារណៈ ស្តីពី អតិថិជនអាចបង់បុព្វលាភធានារ៉ាប់រងអាយុជីវិតបាន តាមរយៈ អេស៊ីលីដា យូនីធី ទាន់ចិត្ត (ACLEDA Unity ToanChet)។

តាមរយៈ អេស៊ីលីដា យូនីធី ទាន់ចិត្ត នេះ អតិថិជនក្រុមហ៊ុនព្រូដិនសលកម្ពុជា ដែលមានគណនីនៅធនាគារ អេស៊ីលីដា ភីអិលស៊ី អាចបង់បុព្វលាភធានារ៉ាប់រងរបស់ពួកគាត់បានយ៉ាងរលូននិងឆាប់រហ័ស តាមរយៈទូរសព្ទចល័តដែលដំណើរការដោយ Android និង iOS ដែលកម្មវិធីនេះ អាចសន្សំសំចៃពេលវេលា និងមិនចាំបាច់ពិបាកធ្វើដំណើរទៅកាន់ធនាគារនោះឡើយ ហើយព្រមទាំងអាចទូទាត់ប្រាក់បុព្វលាភបានភ្លាមៗ និងងាយស្រួលទៀតផង។

នាយកប្រតិបត្តិ ក្រុមហ៊ុនព្រូដិនសលកម្ពុជា លោក David Nutman មានប្រសាសន៍ថា៖«ការដាក់ឲ្យដំណើរការនូវមធ្យោបាយបង់បុព្វលាភ តាមរយៈ អេស៊ីលីដា យូនីធី ទាន់ចិត្ត ក្នុងទូរសព្ទចល័តនេះ គឺសបញ្ជាក់ឲ្យឃើញថា ក្រុមហ៊ុនព្រូដិនសលកម្ពុជា ផ្តល់ជម្រើសសម្រាប់ប្រតិបត្តិការទូទាត់ស្របតាមយុគសម័យឌីជីថល ស្របតាមបច្ចេកវិទ្យាទាន់សម័យ ជាមធ្យោបាយបង់ប្រាក់ដ៏ងាយស្រួល ដែលគួរឲ្យទុកចិត្ត និងមានសុវត្ថិភាពសម្រាប់អតិថិជនរបស់ខ្លួនក្នុងប្រទេសកម្ពុជា»។

លោកបានមានប្រសាសន៍ថា៖«ស្របតាមយុទ្ធនាការផ្សព្វផ្សាយថ្មី WeDoInnovation របស់ក្រុមហ៊ុនព្រូដិនសលកម្ពុជា យើងបានប្តេជ្ញាពង្រឹងសមត្ថភាពនាយុគសម័យទំនើបរបស់យើង ដើម្បីបំពេញឲ្យគ្រប់តាមសេចក្ដីត្រូវការដែលវិវត្តទៅមុខឥតឈប់ឈររបស់អតិថិជនយើង។ ភាពជាដៃគូដ៏អស្ចារ្យជាមួយនឹងធនាគារ អេស៊ីលីដា ភីអិលស៊ី បានជួយឲ្យយើងអាចបន្ថែមកម្មវិធីបង់បុព្វលាភធានារ៉ាប់រងអាយុជីវិត តាមរយៈ អេស៊ីលីដា យូនីធី ទាន់ចិត្ត ទៅក្នុងមធ្យោបាយបង់បុព្វលាភជាច្រើនយ៉ាង ដែលយើងកំពុងមានសព្វថ្ងៃ ហើយក៏ជួយឲ្យយើងអាចអភិវឌ្ឍឈានឡើងបានយ៉ាងងាយស្រួល លើការងារផ្ដល់ជូនអតិថិជនរបស់យើងនូវបទពិសោធន៍សម័យទំនើបដ៏រលូនផងដែរ។ អស់រយៈពេលជាង៥ឆ្នាំកន្លងមកហើយ ដែលក្រុមហ៊ុនព្រូដិនសលកម្ពុជា និង ធនាគារ អេស៊ីលីដា ភីអិលស៊ី បានធ្វើការរួមគ្នាដើម្បីផ្តល់សុវត្ថិភាពហិរញ្ញវត្ថុ ក៏ដូចជាការការពារផ្នែកសុខភាព និងផ្នែកហិរញ្ញវត្ថុពេញលេញ ជូនដល់អតិថិជនរបស់យើង ដែលមានចំនួនកើនឡើងជាបន្តបន្ទាប់បែបនេះ»។

ចាប់តាំងពីដំណើរការក្នុងប្រទេសកម្ពុជានៅឆ្នាំ២០១៣ ក្រុមហ៊ុនព្រូដិនសលកម្ពុជា បានចេញបណ្ណសន្យារ៉ាប់រងជាង១៥ម៉ឺនបណ្ណ ដែលនេះសបញ្ជាក់ឲ្យឃើញអំពីការប្ដេជ្ញាចិត្តរបស់ក្រុមហ៊ុន លើការបំពេញតាមសេចក្ដីត្រូវការផ្នែកការការពាររបស់ប្រជាពលរដ្ឋខ្មែរ ព្រមទាំងការរក្សាការពារអនាគតរយៈពេលវែងរបស់ពួកគាត់ផងដែរ។

ធនាគារ អេស៊ីលីដា ភីអិលស៊ី បានដាក់ឲ្យដំណើរការប្រតិបត្តិការធនាគារ តាមរយៈ អេស៊ីលីដា យូនីធី ទាន់ចិត្ត ក្នុងឆ្នាំ២០១៧ ដែលជាផ្នែកមួយនៃការប្ដេជ្ញាចិត្តក្នុងការធ្វើឲ្យការប្រើប្រាស់សេវាធនាគារពាណិជ្ជកាន់តែមានភាពងាយស្រួល ទូលំទូលាយ និងសុវត្ថិភាពខ្ពស់ ក្នុងប្រទេសកម្ពុជា។ ធនាគារ អេស៊ីលីដា ភីអិលស៊ី ជាធនាគារពាណិជ្ជឈានមុខក្នុងប្រទេសកម្ពុជា ដែលមានអតិថិជនជាង២លាន៥សែននាក់ និងទ្រព្យសម្បត្តិសរុប៥ពាន់៧រយលានដុល្លារ បើគិតត្រឹមខែធ្នូ ឆ្នាំ២០១៨។

បណ្ឌិត អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី បានមានប្រសាសន៍ថា អេស៊ីលីដា យូនីធី ទាន់ចិត្ត ជាជម្រើសដ៏ល្អក្នុងការបម្រើដៃគូយុទ្ធសាស្ត្រ ក្រុមហ៊ុនព្រូដិនសលកម្ពុជា ក្នុងគោលដៅបម្រើអតិថិជនគោលប្រកបដោយភាពងាយស្រួល សុវត្ថិភាព និងមានឧត្តមភាពខ្ពស់ក្នុងការប្រកួតប្រជែង។

ក្រុមហ៊ុនព្រូដិនសលកម្ពុជា មានទំនុកចិត្តថា ការងាកមកប្រើមធ្យោបាយទូទាត់ទំនើបបែបថ្មី ដោយមិនចាំបាច់ប្រើក្រដាសនេះ នឹងក្លាយជាស្តង់ដាររួមនៅក្នុងប្រទេសកម្ពុជា ហើយវាក៏នឹងផ្ដល់អំណោយផលដ៏ល្អផងដែរសម្រាប់ការខិតខំរបស់ក្រុមហ៊ុន លើការងារលើកកម្ពស់សមូហភាពហិរញ្ញវត្ថុនៅក្នុងប្រទេស។

ក្រុមហ៊ុនព្រូដិនសលកម្ពុជា បានចាំផ្តើមធ្វើយុទ្ធនាការផ្សព្វផ្សាយថ្មីរបស់ខ្លួន គឺ “We Do” ដោយភ្ជាប់ជាមួយនឹងការប្ដេជ្ញាចិត្តរបស់ក្រុមហ៊ុនចំពោះអតិថិជនរបស់ខ្លួនក្រោមពាក្យថា “Listening. Understanding. Delivering.”។ យុទ្ធនាការនេះបាននាំយកមូលបទជាក់លាក់៣ គឺ ១. ការច្នៃប្រឌិត ២. ការរៀបចំផែនការហិរញ្ញវត្ថុ និង ៣. ការថែទាំសុខភាពរាងកាយ ដែលគូសបញ្ជាក់សារជាថ្មីនូវការយកចិត្តទុកដាក់ជាយុទ្ធសាស្ត្ររបស់ក្រុមហ៊ុន លើការជួយការពារសុខភាព និងសុវត្ថិភាពហិរញ្ញវត្ថុរបស់អតិថិជននៅទូទាំងប្រទេស៕