អន្តរជាតិ
×![]()
ដោយ: តន ចាន់រិទ្ធារ៉ា
ប្រធានាធិបតីចិន ស៊ី ជិនភីង នៅថ្ងៃទី២៦ ខែមេសា បានអំពាវនាវឲ្យប្រទេសនានាបង្កើតបរិយាកាសវិនិយោគល្អប្រសើរសម្រាប់ក្រុមហ៊ុនចិន និងត្រូវមានគោលការណ៍ស្មើភាពចំពោះជនជាតិចិនដែលរស់នៅក្នុងប្រទេសទាំងនោះ។ ការអំពាវនាវរបស់មេដឹកនាំកំពូលចិនរូបនេះ ធ្វើឡើងក្នុងពិធីបើកវេទិកាខ្សែក្រវាត់ និងវិថីលើកទីពីរក្នុងរដ្ឋធានីប៉េកាំង។ 
បច្ចុប្បន្ននេះ ប្រជាជនចិនកើនឡើងគ្រប់ទីកន្លែង ស្របគ្នានឹងវត្តមានក្រុមហ៊ុនចិននៅពាសពេញពិភពលោកដែរ។ សកម្មភាពប្រជាជនចិនខ្លះ និងក្រុមហ៊ុនចិនខ្លះធ្វើឲ្យម្ចាស់ស្រុកអាក់អន់ស្រពន់ចិន ហើយចាត់ទុកជនជាតិចិនទាំងនោះ ជាមេបង្កបញ្ហាតែម្ដង។ ពេលខ្លះ ភាពទាស់ទែងរវាងប្រទេស និងប្រទេសក៏ប៉ះពាល់ដល់ជនជាតិចិនខ្លះដែលមិនបានធ្វើអ្វីទៅទៀត ហើយបង្កឲ្យមានការរើសអើងជនជាតិចិន ឬក្រុមហ៊ុនចិនផង។
ឧទាហរណ៍ជាក់ស្ដែង គឺការហាមឃាត់ក្រុមហ៊ុនបច្ចេកវិទ្យា Huawei តែម្ដង។ ប្រទេសជាច្រើនបានរឹតត្បិតក្រុមហ៊ុនចិនមួយនេះពីការអភិវឌ្ឍប្រព័ន្ធអ៊ីនធឺណិតជំនាន់ទី៥ (5G) ដោយលើកហេតុផលការពារសន្តិសុខជាតិ។ ការហាមប្រាមក្រុមហ៊ុនចិន តែផ្ដល់សិទ្ធិឲ្យក្រុមហ៊ុនប្រទេសផ្សេង អាចនិយាយបានថា ជាការរើសអើងក្នុងវិស័យពាណិជ្ជកម្ម។ ករណីផ្សេងទៀតដូចជា ការចាប់ឃាត់ជនជាតិចិន ក៏កើនឡើងដែរ និងធ្វើក្រោមការចោទប្រកាន់ថា ពួកគេធ្វើការឲ្យរដ្ឋាភិបាលក្រុងប៉េកាំង។
បញ្ហាទាំងអម្បាលម៉ាននេះ ធ្វើឲ្យប្រធានាធិបតីចិន ស៊ី ជិនភីង ស្នើជាសាធារណៈឲ្យមានគោរពសិទ្ធិជនជាតិចិននៅក្រៅប្រទេស។ ថ្លែងក្នុងពិធីបើកវេទិកាខ្សែក្រវាត់ និងវិថីលើកទីពីរនៅថ្ងៃទី២៦ ខែមេសា លោក ស៊ី បានអំពាវនាវចំពោះមុខមេដឹកនាំប្រទេសជាច្រើនថា ប្រទេសទាំងអស់បង្កើតបរិយាកាសរកស៊ីត្រឹមត្រូវសម្រាប់ក្រុមហ៊ុនចិន និងរាប់អានក្រុមហ៊ុនចិន សិស្សនិស្សិតចិន និងអ្នកប្រាជ្ញចិនឲ្យបានស្មើភាព។
«បណ្ដាប្រទេសទាំងឡាយ គួរផ្ដល់បរិយាកាសមិត្តភាព និងយុត្តិធម៌សម្រាប់ជនជាតិចិនអនុវត្តការផ្លាស់ប្ដូរកម្រិតអន្តរជាតិ និងកិច្ចសហប្រតិបត្តិការតាមធម្មតា»។ នេះជាអំពាវនាវរបស់ប្រមុខរដ្ឋចិនរូបនេះទៅកាន់មេដឹកនាំបរទេសចំនួន៣៧ប្រទេស និងអ្នកចូលរួមជាងប្រាំពាន់នាក់ផ្សេងទៀត ដែលផ្សាយដោយទីភ្នាក់ងារព័ត៌មាន Xinhua ។
ឆ្លៀតពេលនេះ លោក ស៊ី ក៏និយាយការពារគំនិតផ្ដួចផ្ដើមខ្សែក្រវាត់ និងវិថីដែលជាយន្តការធ្វើឲ្យក្រុមហ៊ុនជាច្រើនទទួលបានសិទ្ធិរកស៊ីនៅតាមប្រទេសដែលចូលរួម។ មេដឹកនាំចិនរូបនេះអះអាងថា គំនិតផ្ដួចផ្ដើមដែលលោកដាក់ចេញនៅឆ្នាំ២០១៣ នេះ មិនមែនជាកម្មសិទ្ធិផ្ដាច់មុខរបស់ចិនឡើយ ហើយចិនស្វាគមន៍ប្រទេសទាំងអស់ចូលរួមផងដែរ។ គម្រោងនេះ ជំរុញការតភ្ជាប់ និងកិច្ចសហប្រតិបត្តិការឈ្នះ-ឈ្នះរបស់ប្រទេសសមាជិក៕
Tag:
ចិន
ស៊ី ជិនភីង
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 4 ថ្ងៃ
