អន្តរជាតិ
ចិន ចាប់ផ្ដើមសមយុទ្ធជើងទឹកជាមួយរដ្ឋអាស៊ាន៦ប្រទេស នាវាចម្បាំងសិង្ហបុរី RSS Stalwart នៅដែនទឹកចិន។ រូបភាព Xinhua
× ប្រទេសចិន នៅថ្ងៃទី២៦ ខែមេសា បានប្រកាសពីការចាប់ផ្ដើមសមយុទ្ធជើងទឹកជាមួយប្រទេសអាស៊ានចំនួន៦ប្រទេសនៅឆ្នេរភាគខាងកើត។ សមយុទ្ធនេះ ត្រូវបានគេមើលឃើញថា ជាការព្យាយាមរបស់ក្រុងប៉េកាំងក្នុងការពង្រីកឥទ្ធិពលក្នុងតំបន់ដែលអាមេរិកឈរជើងមិនដាច់ដែរនោះ។ ម្យ៉ាងទៀត វាក៏ជាសញ្ញាបង្ហាញពីទំនាក់ទំនងល្អរវាងប៉េកាំង និងប្រទេសសមាជិកអាស៊ានដែលខ្លះកំពុងទាស់ទែងជាមួយចិនរឿងសមុទ្រចិនខាងត្បូង។
នាវាចម្បាំង១៣គ្រឿង និងឧទ្ធម្ភាគចក្រ៤គ្រឿង នឹងចូលរួមក្នុងសមយុទ្ធជើងទឹករវាងចិន និងរដ្ឋសមាជិកអាស៊ានចំនួន៦ មានសិង្ហបុរី វៀតណាម ថៃ និងហ្វីលីពីន។ នេះបើតាមការប្រកាសរបស់ឧត្តមនាវីឯក ស៊ិន ជីនឡុង (Shen Jinlong) មេបញ្ជាការកងទ័ពជើងទឹកចិននៅថ្ងៃទី២៦ ខែមេសា។ មេទ័ពចិនរូបនេះមិនបញ្ជាក់ឈ្មោះប្រទេសពីរទៀតដែលចូលរួមក្នុងសមយុទ្ធដែលធ្វើនៅដែនសមុទ្រនៃទីក្រុងឈីងតៅឡើយ។
សមយុទ្ធរវាងចិន និងប្រទេសអាស៊ានចំនួន៦នេះ ធ្វើឡើងបន្ទាប់ពីព្រឹត្តការណ៍រំឭកខួបទី៧០ ថ្ងៃកំណើតកងទ័ពជើងទឹកចិន ដែលមានពិធីដង្ហែក្បួននាវាចម្បាំងរាប់សិនគ្រឿងផង។ ឧត្តមនាវីចិនរូបនេះនិយាយក្នុងសេចក្ដីប្រកាសព័ត៌មាន ថា សមយុទ្ធរួមគ្នានេះបង្កើតឡើងដើម្បីបង្ហាញភាពស្មោះត្រង់ និងឆន្ទៈរបស់ចិនក្នុងការធ្វើការជាមួយអ្នកជិតខាង ក៏ដូចជាបំណងរបស់កងទ័ពជើងទឹកចិនដើម្បីសាងសង់សហគមន៍វាសនាតែមួយតាមរយៈការជំរុញកិច្ចសហប្រតិបត្តិការសន្តិសុខជាមួយដៃគូអាស៊ាន។
សមយុទ្ធនេះ នឹងផ្ដោតលើការរៀបចំក្បួន និងការចល័តកប៉ាល់ ប្រតិបត្តិការរុករក និងជួយសង្គ្រោះ ការត្រួតពិនិត្យ និងនីតិវិធីវេជ្ជសាស្ត្រសមុទ្រផងដែរ។ នេះបើតាមសេចក្ដីប្រកាសព័ត៌មានដដែល មុនបន្ថែមថា សមាជិកអាស៊ានពីរទៀតមានឥណ្ឌូណេស៊ី និងឡាវ នឹងបញ្ជូនមន្ត្រីរបស់ខ្លួនឲ្យចូលអង្កេតការណ៍សមយុទ្ធនេះ។ យ៉ាងណាមិញ កងទ័ពជើងទឹកចិន មិនបានបញ្ជាក់ឲ្យច្បាស់ពីរយៈពេលនៃសមយុទ្ធនេះឡើយ។
អ្វីគួរឲ្យចាប់អារម្មណ៍ជុំវិញសមយុទ្ធចិន និងអាស៊ាន គឺវត្តមានទ័ពជើងទឹកហ្វីលីពីន និងវៀតណាម ដែលជាគូជម្លោះជាមួយចិនក្នុងការទាមទារដែនទឹកសមុទ្រចិនខាងត្បូង។ លោក Antony Wong Dong អ្នកជំនាញផ្នែកយោធា និយាយថា ចិនកំពុងធ្វើតាមអាមេរិកក្នុងការទាក់ទាញសណ្ដានចិត្តរបស់ប្រទេសក្នុងតំបន់ ហើយវាក៏ជាឱកាសសម្រាប់ចិនដើម្បីបណ្ដេញឥទ្ធិពលអាមេរិកចេញពីប្រទេសសមាជិកអាស៊ានផងដែរ។
អាមេរិកដែលគ្មានពាក់ព័ន្ធអ្វីនឹងបញ្ហាទឹកដីសមុទ្រចិនខាងត្បូងបន្តិចសោះនោះ បានយកលេសសេរីភាពនាវាចរណ៍ក្រោមច្បាប់អន្តរជាតិដើម្បីបញ្ជូននាវារបស់ខ្លួនចូលដែនទឹកដ៏មមាញឹកមួយនេះ។ វត្តមានអាមេរិក ក្លាយជាទីពំនាក់អាស្រ័យសម្រាប់ប្រទេសដែលឈ្លោះជាមួយចិន ដែលរឿងនេះធ្វើឲ្យខឹងសម្បារយ៉ាងខ្លាំង។ ទោះជាយ៉ាងណា ចិនមិនអើពើអ្វីឡើយ ប៉ុន្តែរឹតតែបង្កើនសកម្មភាពផ្នែកយោធាក្នុងតំបន់ដូចជាការសាងសង់មូលដ្ឋានយោធាដើម្បីត្រួតត្រាដែនទឹកទាំងមូល៕
© រក្សាសិទ្ធិដោយ thmeythmey.com