អន្តរជាតិ
លោក ស៊ី ជិនភីង ចាត់ទុកការអភិវឌ្ឍបែបសម្លាប់មាន់យកពង នឹងនាំគ្រោះថ្នាក់
× ប្រធានាធិបតីចិន ស៊ី ជិនភីង នៅថ្ងៃទី២៨ ខែមេសា បានដាក់ចេញសំណើ៥ចំណុចដើម្បីជំរុញការអភិវឌ្ឍបៃតង ខណៈបញ្ហាបរិស្ថានកំពុងក្លាយជាប្រធានបទក្ដៅសម្រាប់ពិភពលោក។ ថ្លែងក្នុងពិធីបើកពិព័រណ៍សាកវប្បកម្មអន្តរជាតិក្នុងទីក្រុងប៉េកាំង លោក ស៊ី សង្ឃឹមថា គោលគំនិតបៃតងនៃពិព័រណ៍នេះ នឹងសាយភាយពេញពិភពលោកមិនខាន។ លើបញ្ហាអភិវឌ្ឍន៍បៃតងនេះ ប្រមុខរដ្ឋចិនរូបនេះក៏ព្រមានពីគ្រោះថ្នាក់នៃការអភិវឌ្ឍដែលមិនបានគិតគូរបញ្ហាបរិស្ថានផងដែរ។
មហាយក្សចិន បានបើកសម្ពោធពិព័រណ៍សាកវប្បកម្មអន្តរជាតិដ៏ធំនៅថ្ងៃទី២៨ ខែមេសា។ ប្រធានាធិបតីចិន ស៊ី ជិនភីង ឆ្លៀតពេលនេះ អំពាវនាវឲ្យមានការគិតគូរកាន់តែខ្លាំងពីបញ្ហាបរិស្ថាន ដែលជាបញ្ហាប្រឈមមុខដ៏ធំចម្បងរបស់ពិភពលោកក្នុងយុគសម័យឧស្សាហកម្មនៃសតវត្សរ៍ទី២១ នេះ។ លោក ស៊ី បានលើកឡើងពីគុណសម្បត្តិរបស់ឧស្សាហកម្មដែលជំរុញរបៀបរស់នៅរបស់មនុស្ស តែព្រមគ្នានេះក៏បង្កបញ្ហាដល់ផែនដីវិញដែរ។
ចំពោះមេដឹកនាំអន្តរជាតិដែលចូលរួមក្នុងពិព័រណ៍អន្តរជាតិនេះ ប្រធានាធិបតីចិនរូបនេះនិយាយថា ឧស្សាហូបនីយកម្ម បានបង្កើតជាទ្រព្យសម្បត្តិច្រើនសម្បើមមិនធ្លាប់មានពីមុនមក ប៉ុន្តែវាក៏បានបង្កជាការបំផ្លិចបំផ្លាញដល់ប្រព័ន្ធអេកូឡូស៊ីផងដែរ។ បើតាមទីភ្នាក់ងារព័ត៌មានរដ្ឋចិន Xinhua លោក ស៊ី បានប្រដូចការអភិវឌ្ឍដែលមិនបានពិចារណាពីផលវិបាកលើបរិស្ថានទៅនឹងការសម្លាប់មាន់ដើម្បីយកពង ឬការបូមទឹកបឹងដើម្បីចាប់ត្រី ដែលចុងក្រោយ គឺគ្មានសល់អ្វីឡើយ។
មេដឹកនាំកំពូលចិនរូបនេះ បានស្នើឲ្យប្រទេសទាំងអស់រក្សាតុល្យភាពប្រព័ន្ធអេកូឡូស៊ីរបស់ផែនដី ដើម្បីឲ្យមនុស្សជំនាន់ក្រោយរីករាយនឹងបរិស្ថានល្អ មិនមែនមានតែសម្បត្តិហូរហៀរឡើយ។ សម្រាប់លោក ស៊ី ផែនដីជាផ្ទះតែមួយគត់របស់មនុស្ស ហើយមនុស្សលោកគួរការពារបរិស្ថានឲ្យការពារភ្នែករបស់ខ្លួន ហើយចាត់ទុកបរិស្ថានដូចនឹងជីវិតរបស់ខ្លួនផងដែរ ព្រោះបរិស្ថានល្អនាំទៅរកសក្ដានុពលផ្នែកសេដ្ឋកិច្ច និងជំរុញឲ្យស្ថិរភាពសេដ្ឋកិច្ច និងសង្គមផង។
សំណើចំនួនប្រាំចំណុច ត្រូវបានលោក ស៊ី ជិនភីង លើកឡើងដើម្បីដោះស្រាយបញ្ហាបរិស្ថាន និងជំរុញការអភិវឌ្ឍបៃតង។ ទីមួយ លោកប្រធានាធិបតីចិនរូបនេះបានស្នើឲ្យមានការរស់នៅដោយសុខដុមរមនារវាងមនុស្ស និងធម្មជាតិ ហើយទីពីរ គឺវិបុលភាពដោយអាស្រ័យលើការអភិវឌ្ឍបៃតង។ ចំណែកទីបី លោក ស៊ី អំពាវនាវឲ្យមនុស្សទាំងអស់រស់នៅដោយការស្រឡាញ់ធម្មជាតិ ទីបួន គឺការប្រើប្រាស់វិទ្យាសាស្ត្រក្នុងអភិបាលកិច្ចអេកូឡូស៊ី និងចុងក្រោយ គឺរួមគ្នាដោះស្រាយបញ្ហាបរិស្ថាន។
សូមបញ្ជាក់ថា ពិព័រណ៍សាកវប្បកម្មអន្តរជាតិដែលជាផ្នែកមួយនៃការអបអរខួបទី៧០ ថ្ងៃកំណើតសាធារណរដ្ឋប្រជាមានិតចិនក្នុងឆ្នាំ២០១៩ នេះ រំពឹងទទួលបានភ្ញៀវទេសចរចំនួន១៦លាននាក់សម្រាប់រយៈពេល១៦២ថ្ងៃ។ ប្រទេស និងអង្គការចំនួន១១០ បានតាំងបង្ហាញជាពិសេសរុក្ខជាតិ និងផ្កាជាច្រើនប្រភេទ ព្រមទាំងការបង្ហាញគោលនយោបាយសម្រាប់ការអភិវឌ្ឍបៃតងទៀតផង៕
© រក្សាសិទ្ធិដោយ thmeythmey.com