អន្តរជាតិ
បង្ហាញមុខជាលើកដំបូងក្នុងពេល៥ឆ្នាំ ប្រមុខក្រុមរដ្ឋឥស្លាមប្រកាសសងសឹកចំពោះបរាជ័យក្រុមខ្លួន មេដឹកនាំក្រុមជ្រុលនិយមរដ្ឋឥស្លាម Abu Bakr al-Baghdadi ។ (រូបភាព AP)
× លោក Abu Bakr al-Baghdadi មេដឹកនាំក្រុមជ្រុលនិយមរដ្ឋឥស្លាម បានបង្ហាញមុខតាមវីដេអូដ៏កម្រមួយដែលចែកចាយដោយបណ្ដាញព័ត៌មានខ្លួននៅថ្ងៃទី២៩ ខែមេសា។ នេះជាលើកដំបូងចាប់តាំងពីឆ្នាំ២០១៤ មកប្រមុខដឹកនាំអង្គការជ្រុលនិយមមួយចេញមុខបែបនេះ ដែលធ្វើឡើងស្របពេលដែលក្រុមរដ្ឋឥស្លាមបាក់ទ័ពខ្ចាត់ខ្ចាយចេញពីទឹកដីដែលធ្លាប់ត្រួតត្រាដោយសារយុទ្ធនាការរបស់សម្ព័ន្ធភាពចម្រុះ។ ចេញមុខជាថ្មីលើកនេះ លោក al-Baghdadi បានប្រកាសសងសឹកវិញ។
តាមរយៈវីដេអូផ្សាយដោយ Al-Furqan ដែលខ្សែបណ្ដាញផ្នែកសារព័ត៌មានរបស់ក្រុមរដ្ឋឥស្លាម ប្រមុខដឹកនាំក្រុមរដ្ឋឥស្លាម លោក Abu Bakr al-Baghdadi បានទទួលស្គាល់បរាជ័យការតស៊ូការពារមូលដ្ឋានចុងក្រោយរបស់ក្រុមនេះក្នុងទឹកដីស៊ីរីកាលពីខែមីនាកន្លងទៅ។ លោកអះអាងថា សង្គ្រាមនៅ Baghouz បានចប់ហើយ។ ទោះជាយ៉ាងណា មេដឹកនាំក្រុមរដ្ឋឥស្លាមរូបនេះ ប្រកាសមិនចុះចាញ់ជាដាច់ខាត។
លោក al-Baghdadi ត្រូវបានឃើញជាចុងក្រោយបំផុតកាលពីឆ្នាំ២០១៤ ពេលប្រកាសបង្កើតរដ្ឋឥស្លាមក្នុងទឹកដីដែលក្រុមដ៏សាហាវមួយនេះគ្រប់គ្រងនៅស៊ីរី និងអ៊ីរ៉ាក់។ យ៉ាងណាមិញ ការបង្ហាញខ្លួនជាថ្មីនេះ កើតឡើងបន្ទាប់ពីក្រុមជ្រុលនិយមដែលធ្លាប់គ្រប់គ្រងដ៏ធំល្វឹងល្វើយ ហើយបង្កព្យុះភ្លៀងមិនអាក់ខានមួយនេះ បែរជាបាត់បង់ទឹកដីរកកន្លែងជ្រកសឹងមិនបានទៅវិញ។ ក្នុងន័យនេះ វត្តមានរបស់លោក al-Baghdadi ទំនងជាការដាស់ស្មារតីសមាជិកខ្លួនឲ្យរឹងប៉ឹងឡើងវិញ។
បើតាមការផ្សាយរបស់ទីភ្នាក់ងារព័ត៌មាន AFP មេដឹកនាំជ្រុលនិយមដែលអាមេរិកហ៊ានឲ្យតម្លៃក្បាលដល់ទៅ២៥លានដុល្លារ រៀបរាប់ថា ព្រះបានបញ្ជាឲ្យក្រុមខ្លូនធ្វើសង្គ្រាមជីហាដ មិនមែនបញ្ជាឲ្យឈ្នះឡើយ។ ក្នុងមួយផ្នែកនៃវីដេអូដែលផ្សាយនៅថ្ងៃទី២៩ ខែមេសា លោក al-Baghdadi ក៏និយាយដល់ហេតុការណ៍បំផ្ទុះគ្រាប់បែកនៅស្រីលង្កាដែលសម្លាប់មនុស្សអស់២៥៣នាក់ និងជាង៥០០នាក់ទៀតរងរបួស ដោយលោកចាត់ទុកជាការសងសឹកឲ្យក្រុមរដ្ឋឥស្លាមនៅទីក្រុង Baghouz ។
បុរសក្នុងវីដេអូដដែលនេះ បញ្ជាក់ថា សង្គ្រាមប្រឆាំងលោកខាងលិច ជាផ្នែកមួយនៃសមរភូមិវែងអន្លាយ ហើយថា ក្រុមរដ្ឋឥស្លាម នឹងបន្តប្រតិបត្តិការសងសឹកឲ្យសមាជិករបស់ខ្លួនដែលបាត់បង់ជីវិតដោយយុទ្ធនាការរបស់លោកខាងលិច។
សហរដ្ឋអាមេរិកឯណោះវិញ កំពុងពិនិត្យវីដេអូនេះដើម្បីជាបញ្ជាក់ថា ជាវីដេអូពិតរបស់លោក al-Baghdadi មែន។ នេះបើតាមការប្រកាសរបស់ក្រសួងការបរទេសអាមេរិកដែលលើកឡើងដែរថា អាមេរិកនឹងធានាពីបរាជ័យរបស់ក្រុមរដ្ឋឥស្លាម និងស្វែងរកមេដឹកនាំដែលនៅសេសសល់ឲ្យប្រឈមមុខនឹងយុត្តិធម៌។ លើសពីនោះទៅទៀត ការចេញមុខរបស់មេដឹកនាំក្រុមនេះ ក៏មិនអាចស្រោចស្រង់បរាជ័យនៅលើសមរភូមិបានដែរ។
ទោះជាយ៉ាងណា ការបង្ហាញមុខពេលនេះ ក៏ជាការបញ្ចប់ពាក្យចចាមអារ៉ាមដែលថា លោក al-Baghdadi បានស្លាប់ ឬរងរបួស។ បុរសរូបនេះ បានលាក់ខ្លួនយ៉ាងអាថ៌កំបាំងបំផុតក្នុងពេលប៉ុន្មានឆ្នាំមកនេះ ហើយពេលដែលក្រុមរដ្ឋឥស្លាមកំពុងខ្លាំងពេញបន្ទុកនោះ ក៏គេមិនឃើញវត្តមានលោកដែរ។ ដោយសាររឿងនេះ លោក al-Baghdadi ត្រូវបានចាត់ទុកជាខ្មោចទៀតផង ព្រោះគ្មាននរណាអាចដានពីសកម្មភាព ឬកន្លែងលាក់ខ្លួនបានឡើយ៕
Tag:
ក្រុមរដ្ឋឥស្លាម
Abu Bakr al-Baghdadi
ស៊ីរី
អ៊ីរ៉ាក់
© រក្សាសិទ្ធិដោយ thmeythmey.com