បារាំង គ្រោងផ្តល់កម្ចី៤០លានដុល្លារដល់មីយ៉ាន់ម៉ា អភិវឌ្ឍទំនប់វារីអគ្គិសនី

អន្តរជាតិ

បារាំង គ្រោងផ្តល់កម្ចី៤០លានដុល្លារដល់មីយ៉ាន់ម៉ា អភិវឌ្ឍទំនប់វារីអគ្គិសនី

02, May 2019 , 9:59 pm

រូបភាព

ប្រភពរូប៖ វេបសាយ frontiermyanmar.net

ដោយ:

មីយ៉ាន់ម៉ា នឹងទទួលបានកម្ចី៣៥,៧លានអឺរ៉ូ ឬស្មើនឹង៤០លានដុល្លារ ពីភ្នាក់ងារអភិវឌ្ឍន៍បារាំង (AFD) ដើម្បីអភិវឌ្ឍទំនប់វារីអគ្គិសនីចំនួនប្រាំ។ នេះជាការបញ្ជាក់ឲ្យដឹងរបស់ប្រធានាធិបតីមីយ៉ាន់ម៉ា លោក U Win Myint ក្នុងកិច្ចប្រជុំសភា។

តាមការបញ្ជាក់របស់អនុរដ្ឋមន្ត្រីក្រសួងផែនការមីយ៉ាន់ម៉ា លោក U Maung Maung Win លក្ខខណ្ឌនៃកម្ចីនេះ គឺសម្រាប់រយៈពេល១៣ឆ្នាំ ដោយមានអត្រាការប្រាក់ ០,៦៨ភាគរយ និងត្រូវបង់ប្រាក់ក្នុងរយៈពេល៧ឆ្នាំម្តង។ បើតាមសារព័ត៌មាន Myanmar Times ចុះផ្សាយនៅថ្ងៃទី១ ឧសភា ហិរញ្ញប្បទាននេះ ត្រូវរំពឹងថា នឹងយកទៅប្រើប្រាស់ចាប់ពីឆ្នាំ២០១៩នេះទៅដល់ឆ្នាំ២០២៤ សម្រាប់ការជួសជុល និងដំឡើងទំនប់វារីអគ្គិសនីចំនួន៥។

ក្រោយដំឡើងរួចរាល់ ទំនប់វារីអគ្គិសនីទាំងនេះ រំពឹងថា អាចប្រតិបត្តិការទាញចរន្តអគ្គិសនីពេញលេញ ដែលបង្កើនការទាញយកថាមពលអគ្គិសនីពី ៥៦៥លានគីឡូវ៉ាត់ម៉ោង ទៅដល់ ៦៤៦គីឡូវ៉ាត់ម៉ោង។ តាមប្រភពព័ត៌មានដដែល អនុរដ្ឋមន្ត្រីក្រសួងថាមពល និងអគ្គិសនីមីយ៉ាន់ម៉ា លោក U Tun Naing លើកឡើងថា ដោយសារបញ្ហាកង្វះការថែទាំ និងជួសជុលនាពេលកន្លងមក ទំនប់វារីអគ្គិសនី ទទួលរងការខូចខាតនៅផ្នែកខ្លះ រួមមាន តួប៊ីន ម៉ាស៊ីនភ្លើង និងមជ្ឈមណ្ឌលគ្រប់គ្រងជាដើម។

សូមបញ្ជាក់ថា បរិមាណបំណុលបរទេសដែលក្រសួងថាមពល និងអគ្គិសនីមីយ៉ាន់ម៉ាបានខ្ចី គិតមកដល់ចុងខែធ្នូ ឆ្នាំ២០១៨កន្លងទៅ មានចំនួនសរុប ៦,២ពាន់លានដុល្លារ ដោយជាង៣ពាន់លានដុល្លារនៅពុំទាន់ដោះស្រាយរួចរាល់។ ដោយឡែក ក្រុមហ៊ុនផ្គត់ផ្គង់ចរន្តអគ្គិសនី Yangon របស់មីយ៉ាន់ម៉ា បានស្នើសុំការយល់ព្រមពីរដ្ឋាភិបាលក្នុងការទទួលកម្ចីជាង ៤៥លានដុល្លារពីភ្នាក់ងារកិច្ចសហប្រតិបត្តិការអភិវឌ្ឍន៍សេដ្ឋកិច្ចប្រទេសជិតខាង៕