នាយករដ្ឋមន្ត្រីអង់គ្លេស លាលែងពីតំណែងនៅខែក្រោយ ព្រោះមិនអាចអូសអង់គ្លេសចេញពីអឺរ៉ុបបាន

អន្តរជាតិ

នាយករដ្ឋមន្ត្រីអង់គ្លេស លាលែងពីតំណែងនៅខែក្រោយ ព្រោះមិនអាចអូសអង់គ្លេសចេញពីអឺរ៉ុបបាន

24, May 2019 , 4:30 pm

រូបភាព

រូបភាពពី AFP

ដោយ: តន ចាន់រិទ្ធារ៉ា

នាយករដ្ឋមន្ត្រីចក្រភពអង់គ្លេស ថេរ៉េសា ម៉េយ៍ នៅថ្ងៃទី២៤ ខែឧសភា បានប្រកាសលាលែងពីតំណែងហើយ បន្ទាប់ពីលោកស្រីរងសម្ពាធខ្លាំងទាក់ទងការអូសដៃអង់គ្លេសចញពីសហភាពអឺរ៉ុប។ ការលាលែងពីតំណែងរបស់លោកស្រី ទំនងជាការបំបែកភាពទ័លច្រកនៅក្នុងសភាជុំវិញការចាកចេញពីអឺរ៉ុប ដែលមកទល់ពេលនេះ មិនទាន់កិច្ចព្រមព្រៀងនៅឡើយ។

ខ្ញុំសូមប្រកាសលាលែងពីតំណែងប្រធានបក្សអភិរក្សនៅថ្ងៃសុក្រ ទី៧ ខែមិថុនា។ នេះជាការប្រកាសរបស់លោកស្រី ថេរ៉េសា ម៉េយ៍ នៅថ្ងៃទី២៤ ខែឧសភានៅឯនិវេសនដ្ឋាន 10 Downing Street ក្នុងទីក្រុងឡុងដ៍។ ការលាលែងពីតំណែងប្រធានបក្សកាន់អំណាចនេះ ក៏ជាការលាលែងពីតំណែងនាយករដ្ឋមន្ត្រីដែរ។

ក្នុងសន្និសីទសារព័ត៌មានប្រកាសព័ត៌មានលាលែងនេះ លោកស្រី ម៉េយ៍ បង្ហាញការសោកស្ដាយដែលមិនអាចនាំអង់គ្លេសចេញពីអឺរ៉ុបតាមបំណងប្រជាជនបាន។ ជាមួយនឹងការសម្រក់ទឹកភ្នែកផងនោះ លោកស្រីនិយាយថា វាជាប្រយោជន៍សម្រាប់ប្រទេសជាតិដែលត្រូវការនាយករដ្ឋមន្ត្រីដឹកនាំការចាកចេញនេះ។

តាមរយៈប្រជាមតិខែមិថុនា ឆ្នាំ២០១៦ ប្រជាជនអង់គ្លេសសម្រេចចិត្តចាកចេញពីសហភាពអឺរ៉ុប ដែលនោះលោក ដេវីដ កាមេរ៉ូន ជានាយករដ្ឋមន្ត្រីនៅឡើយ។ ប៉ុន្តែជិតបីឆ្នាំមកនេះ អង់គ្លេស នៅតែមិនអាចចាកចេញពីសហភាពអឺរ៉ុបដដែល ដ្បិតកិច្ចព្រមព្រៀងជាមួយអឺរ៉ុប ត្រូវបានសភាអង់គ្លេសបោះឆ្នោតប្រឆាំងដល់ទៅបីដង។ លោកស្រី ម៉េយ៍ បានប្រឹងប្រែងយ៉ាងខ្លាំងក្នុងការចរចាជាមួយដៃគូអឺរ៉ុប ប៉ុន្តែមិនអាចបញ្ចុះបញ្ចូលសមាជិកសភាខ្លួនឯងទៅវិញ។

មុនប្រកាសចុះចេញនេះ លោកស្រី ម៉េយ៍ បានជួបជាមួយគណៈកម្មាធិការបក្សដើម្បីជជែកពីការជ្រើសរើសនាយករដ្ឋមន្ត្រីថ្មី។ ការលាលែងនេះ ក៏មានន័យស្មើការចាប់ផ្ដើមការប្រជែងសម្រាប់តំណែងប្រធានបក្សថ្មីជំនួសលោកស្រី ម៉េយ៍ ។ ឥស្សរជនដែលក្លាយជាប្រធានបក្ស នឹងក្លាយជានាយករដ្ឋមន្ត្រីថ្មីដោយស្វ័យប្រវត្តិតែម្ដង។ ការងារសំខាន់របស់មេដឹកនាំថ្មី គឺបន្តការប្រឹងប្រែងរបស់លោកស្រី ម៉េយ៍ ដើម្បីអូសអង់គ្លេសចេញពីអឺរ៉ុប។

នីតិវិធីជ្រើសរើសមេដឹកនាំថ្មី អាចចំណាយពេលចំណាយរាប់សិបសប្ដាហ៍ ខណៈអំឡុងពេលនោះ លោកស្រី ម៉េយ៍ នឹងធ្វើជានាយករដ្ឋមន្ត្រីចាំផ្ទះសិន៕