អន្តរជាតិ
មុនស្លាប់ ឧត្តមសេនីយ៍ ព្រេម មានបំណងបរិច្ចាគទ្រព្យទាំងអស់ជួយអ្នកក្រីក្រ
នាយករដ្ឋមន្ត្រីថៃ លោក ប្រាយុទ្ធ ចន្ទអូចា សំពះទទួលពរពីអតីតរដ្ឋបុរសថៃ លោក ព្រេម ទីនស៊ូឡានុនដា នៅលំនៅឋាន លោកព្រេម ក្នុងឱកាសថ្ងៃសង្គ្រាន្ត កាលពីឆ្នាំ២០១៧ (ប្រភព៖ The Nation ថៃ)
×![]()
មុនពេលទទួលអនិច្ចកម្ម អតីតរដ្ឋបុរសថៃ លោកឧត្តមសេនីយ៍ Prem Tinsulanonda បានបង្ហាញគោលជំហរថា ចង់បរិច្ចាគទ្រព្យសម្បត្តិ និងលុយរបស់លោកទាំងអស់ជូនទៅដល់ប្រជាជនក្រីក្រ។ នេះបើតាមការបញ្ជាក់របស់លោក Pissanu Phutthawong ទីប្រឹក្សាផ្ទាល់របស់លោក ព្រេម។
នៅថ្ងៃទី២៧ ខែឧសភា លោក Pissanu គូសបញ្ជាក់ថា អតីតរដ្ឋបុរស ព្រេម ទីនស៊ូឡានុនដា បានប្រាប់លោកអំពីគម្រោងធ្វើវិភាគទានទ្រព្យសម្បត្តិ និងលុយសន្សំពីប្រាក់បៀវត្សរ៍ ដែលលោកទទួលបាន ចាប់តាំងពីក្លាយជាប្រធានក្រុមប្រឹក្សារាជបល្ល័ង្កមក។ លោក ព្រេម មានបំណងបរិច្ចាគទ្រព្យសម្បត្តិ និងលុយទាំងអស់នេះ ទៅកាន់គម្រោងនានា ដែលជួយដល់ប្រជាជនក្រីក្រ។
តាមការចុះផ្សាយរបស់កាសែតបាងកកប៉ុស្តិ៍ លោកឧត្តមសេនីយ៍ Pissanu ពុំបានបង្ហើបចំនួនលុយ និងទ្រព្យសម្បត្តិជាក់លាក់ឲ្យគ្រប់គ្នាដឹងឡើយ។ យ៉ាងណាមិញ លោកគ្រាន់តែបានប្រាប់ថា តួលេខសរុបស្មើនឹងខ្ទង់រយលានបាត។
ជាមួយគ្នានេះដែរ ភ្លាមៗក្រោយមរណភាពរបស់លោកឧត្តមសេនីយ៍ ព្រេម លោក Pissanu បានប្រញាប់ប្រញាល់ទៅជួបឧបនាយករដ្ឋមន្ត្រីថៃ Wissanu Krea-ngam ។ ជំនួបនេះដែរ គឺដើម្បីជូនដំណឹងលោក Wissanu ពីគោលបំណងរបស់លោក ព្រេម ព្រមទាំងស្នើសុំការជ្រៀមជ្រែងពីលោក ដើម្បីបំពេញបំណងចុងក្រោយរបស់អតីតរដ្ឋបុរស។
សូមបញ្ជាក់ថា អតីតរដ្ឋបុរសថៃ ឧត្តមសេនីយ៍ ព្រេម បានទទួលមរណភាព ដោយសារគាំងបេះដូង កាលពីព្រឹកថ្ងៃអាទិត្យ ទី២៦ ខែឧសភា ឆ្នាំ២០១៩ នៅមន្ទីរពេទ្យ Phramongkutklao ក្នុងរាជធានីបាងកក។ សពលោក ត្រូវបានគេបញ្ជូនទៅកាន់វត្ត Benchamaborpit កាលពីថ្ងៃទី២៧ ខែឧសភា ដើម្បីទទួលការប្រោះព្រំពីសែស្រឡាញរាជវង្សថៃ៕
Tag:
ថៃ
Prem Tinsulanonda
© រក្សាសិទ្ធិដោយ thmeythmey.com
