បស្ចិមលោក រំឭកខួបប្រតិបត្តិការ Normandy តែរុស្ស៊ីថា បើគ្មានសូវៀត ក៏មិនអាចឈ្នះដែរ

អន្តរជាតិ

បស្ចិមលោក រំឭកខួបប្រតិបត្តិការ Normandy តែរុស្ស៊ីថា បើគ្មានសូវៀត ក៏មិនអាចឈ្នះដែរ

06, Jun 2019 , 10:47 am

រូបភាព

មេដឹកនាំប្រទេសសម្ព័ន្ធមិត្តនាពិធីនៅអង់គ្លេស។ រូបភាព AFP

ដោយ: តន ចាន់រិទ្ធារ៉ា

មេដឹកនាំប្រទេសនៃក្រុមសម្ព័ន្ធមិត្តលោកខាងលិច បានជួបជុំគ្នានៅទឹកដីអង់គ្លេសដើម្បីធ្វើពិធីរំឭកដល់ថ្ងៃបើកយុទ្ធនាការយោធាដ៏ធំបំផុតក្នុងប្រវត្តិសាស្ត្រ។ ពីទឹកដីអង់គ្លេស ទ័ពសម្ព័ន្ធមិត្តបានឆ្លងសមុទ្រ Channel ហើយឡើងគោកនៅ Normandy ទឹកដីបារាំងដើម្បីកម្ចាត់យោធាណាស៊ី ហើយក៏ឈានដល់ការបញ្ចប់សង្គ្រាមលោកលើកទីពីរដែរ។ ប៉ុន្តែរុស្ស៊ីនិយាយថា ប្រតិបត្តិការកាលពី៧៥ឆ្នាំមុន មិនមែនជាកត្តាកំណត់ជ័យជម្នះសង្គ្រាមលោកឡើយ។

មហាក្សត្រីយានីអង់គ្លេស Elizabeth ទីពីរ ប្រធានាធិបតីអាមេរិក ដូណាល់ ត្រាំ ប្រធានាធិបតីបារាំង អេម៉ានុយអែល ម៉ាក្រុង នាយករដ្ឋមន្ត្រីកាណាដា ចាស្ទីន ទ្រូដូ អធិការបតីអាល្លឺម៉ង់ អែនជែឡា មឺហ្គែល បានជួបជុំគ្នានៅទីក្រុង Portmouth នៅថ្ងៃទី៥ ខែមិថុនា ដើម្បីចូលរួមខួបទី៧៥ នៃប្រតិបត្តិការរំដោះអឺរ៉ុបពីក្រញាំដៃទ័ពណាស៊ី។ Porthmouth ជាទីចេញដំណើរដ៏សំខាន់មួយរបស់កងទ័ពសម្ព័ន្ធមិត្តនៅថ្ងៃទី៥ ខែមិថុនា មុននឹងទៅដល់ទឹកដីបារាំង។

ប្រតិបត្តិការនៅ Normandy ដែលចាប់ផ្ដើមពេលទ័ពសម្ព័ន្ធមិត្តឡើងគោកនៅថ្ងៃទី៦ ខែមិថុនា ជាសមរភូមិបង្ហូរឈាមដ៏ធំមួយក្នុងសង្គ្រាមលោកលើកទីពីរ។ ក្រោយទទួលជោគជ័យទាំងលំបាក កម្លាំងសម្ព័ន្ធមិត្តបានរំដោះទឹកដីដែលស្ថិតក្រោមការគ្រប់គ្រងរបស់អាល្លឺម៉ង់ រួចបន្តរំដោះអឺរ៉ុប ហើយវានាំរកជ័យជម្នះនៅរណសិរ្សខាងលិចតែម្ដងនៅមួយឆ្នាំបន្ទាប់។ លោកខាងលិចចាត់ទុកប្រតិបត្តិការនៅ Normandy ជាព្រឹត្តការណ៍សំខាន់បំផុតក្នុងប្រវត្តិសាស្ត្រខ្លួន។

យ៉ាងណាមិញ រុស្ស៊ី មិនសូវសប្បាយចិត្តនឹងយកគុណសម្បត្តិម្នាក់ឯងរបស់សម្ព័ន្ធមិត្ត ហើយការប្រឹងប្រែងរបស់ខ្លួនត្រូវបានគេបំភ្លេចឡើយ ឯការឡើងគោកនៅ Normandy ក៏មិនបានកំណត់ជោគជ័យសង្គ្រាមលោកលើកទីពីរដែរ។ អ្នកនាំពាក្យក្រសួងការបរទេសរុស្ស៊ី Maria Zakharova និយាយដោយយោងសម្តីអ្នកប្រវត្តិសាស្ត្រថា ប្រតិបត្តិការឈ្លានពាននៅទឹកដីបារាំង មិនបានជះឥទ្ធិពលអ្វីខ្លាំងក្លាដល់លទ្ធផលសង្គ្រាមដែលបញ្ចប់នៅឆ្នាំ ១៩៤៥ ទេ។

ទោះទទួលស្គាល់ថា សម្ព័ន្ធមិត្តរួមចំណែកច្រើនក្នុងជ័យជម្នះលើណាស៊ីក្ដី លោកស្រី Zakharova និយាយទៀតថា បើគ្មានការរួមចំណែកដ៏ធំធេងរបស់សហភាពសូវៀតទេនោះ ជ័យជម្នះក៏មិនអាចកើតមានដែរ។ បើតាមទីភ្នាក់ងារព័ត៌មាន AFP មន្ត្រីក្រសួងការបរទេសរុស្ស៊ីរូបនេះ អះអាងថា ជោគជ័យត្រូវបានកំណត់ជាស្រេច ដោយសារកងទ័ពក្រហមដែលរុញច្រានទ័ពណាស៊ីពីរណសិរ្សខាងកើត បានទទួលជ័យជម្នះជាបន្តបន្ទាប់ដែរ។

ជាញឹកញយ រុស្ស៊ីតែងចោទលោកខាងលិចថា មិនសូវឲ្យតម្លៃ ឬយល់ពីការលះបង់របស់ខ្លួនក្នុងការបញ្ចប់សង្គ្រាមលោកលើកទីពីរ ខណៈរុស្ស៊ីបានបាត់បង់ជីវិតមនុស្សប្រមាណ២៧លាននាក់ឯណោះ។ សង្គ្រាមនៅលេនីនក្រាដ ជាសមរភូមិបង្ហូរឈាមដែលកងទ័ពក្រហមលះបង់ជីវិតច្រើនសន្ធឹកសន្ធាប់។ ប៉ុន្តែជនជាតិរុស្ស៊ីខ្លះ ក៏មិនសូវបានដឹងដូចគ្នាពីការជួយរបស់សម្ព័ន្ធមិត្តវិញដែរ៕