ជាតិ
លុយកខ្វក់៖ សម្ដេច ស ខេង«អ្នកឃុបឃិតក្នុងរឿងនេះបានផលប្រយោជន៍ តែងាប់ប្រទេសជាតិ»
× ភ្នំពេញ៖ ខណៈកម្ពុជាស្ថិតក្នុងបញ្ជីប្រផេះជុំវិញការលាងលុយកខ្វក់ រដ្ឋមន្ត្រីក្រសួងមហាផ្ទៃ សម្ដេច ស ខេង បានបង្ហាញក្ដីបារម្ភខ្លាចកម្ពុជាធ្លាក់ចូលក្នុងបញ្ជីខ្មៅ ដែលធ្វើឲ្យអាប់ឱនដល់កិត្តិយសជាតិ។ សម្ដេចថែមទាំងលើកឡើងដូច្នេះថា៖«ខ្ញុំយល់ថាអ្នកឃុបឃិតរកស៊ីក្នុងរឿងនេះបានផលប្រយោជន៍ តែបានតែមនុស្សមួយក្រុមនោះទេ យកមកទិញដីធ្លី ឬទីផ្សារដីអាចឡើងថ្លៃជាដើម តែវាងាប់ប្រទេសជាតិ ងាប់ត្រង់ថាបើថ្ងៃណាមួយដល់កម្រិតមួយគេថាកម្ពុជាជាប្រទេសខ្មៅជាប្រទេសលាងលុយកខ្វក់ គឺចប់»។
សូមស្ដាប់ប្រសាសន៍សម្ដេច ស ខេង ៖
«គេថាកម្ពុជាស្ថិតក្នុងចំណាត់ថ្នាក់ប្រផេះ អ៊ីចឹងគេឃ្លាំងមើលហើយ មួយជំហានទៀតវាទៅខ្មៅ បើសិនយើងមិនបានយកចិត្តទុកដាក់បង្ក្រាប»។ សម្ដេចបានថ្លែងបែបនេះក្នុងពិធីប្រកាសចូលកាន់តំណែងក្រុមប្រឹករាជធានីភ្នំពេញ នៅថ្ងៃទី១២ខែមិថុនានេះ។ សម្ដេច ស ខេង បានជំរុញឲ្យអ្នកមានសមត្ថកិច្ចពាក់ព័ន្ធ ការពារកុំឲ្យកម្ពុជាធ្លាក់ក្នុងបញ្ជីខ្មៅអំពីការលាងលុយកខ្វក់។
ជាមួយគ្នានេះ សម្ដេច ស ខេង បានភ្ជាប់បញ្ហាលាងលុយកខ្វក់ទៅនឹងករណីចរាចរលុយ ៣លានដុល្លារកន្លះ និង ៨០ម៉ឺនដុល្លារ ដែលត្រូវចាប់បាននៅព្រលានយន្តហោះភ្នំពេញ កាលពីពេលថ្មីៗកន្លងទៅនេះ។ សម្ដេចប្រាប់ថាសមត្ថកិច្ចនៅខ្វះខាតការស្រាវជ្រាវពីប្រភពលុយចំពោះករណីទាំងពីរនេះ។ សម្ដេចថែមទាំងបង្ហើបថាមានអ្នកចង់រត់ការឲ្យម្ចាស់លុយអាចយកលុយនោះវិញ ដោយចែកភាគរយជាមួយម្ចាស់លុយ។ សម្ដេចឧបនាយករដ្ឋមន្ត្រីថ្លែងដូច្នេះថា៖«ខ្ញុំទទួលព័ត៌មានថាចាប់លុយបាន៣លានកន្លះ សមត្ថកិច្ចដែលចាប់បានក៏ប្រគល់លុយឲ្យសមត្ថកិច្ចមួយទៀត តែអត់បានពិនិត្យមើលថាលុយនោះមានប្រភពមកពីណា? ឥឡូវបើមានករណីអ៊ីចឹងទៀតត្រូវរាយការណ៍មកខ្ញុំភ្លាម»។ សម្ដេចបន្តដូច្នេះទៀតថា៖«ត្រូវសិក្សាស្រាវជ្រាវថាលុយចេញពីណាមក ព្រោះសាម៉ីខ្លួនថាលុយច្រើនបានពីលេងល្បែងឈ្នះ តែអត់ក្រដាសស្នាម មិនតែប៉ុណ្ណោះបើសិនលុយនោះត្រឹមត្រូវ អត់ចែកគ្នារត់ការនោះទេ»។
សម្ដេច ស ខេង បានណែនាំឲ្យអ្នកមានសមត្ថកិច្ចពាក់ព័ន្ធការទប់ស្កាត់ និងបង្ក្រាបការលាងលុយកខ្វក់ ត្រូវប្រឹងប្រែងដើម្បីការពារកិត្តិយសជាតិ។ សម្ដេចមានប្រសាសន៍ដូចនេះថា៖«ខ្ញុំគិតថាយើងធ្វើដើម្បីការពារមុខមាត់ជាតិយើង។ រឿងនេះស្មុគស្មាញមិនខុសអ្វីនឹងគ្រឿងញៀនទេ។ ខ្ញុំសង្ឃឹមថាយើងនឹងបន្តធ្វើរឿងនេះ ហើយឲ្យមានការគាំទ្រសំខាន់បញ្ហាគ្រឿងញៀន បញ្ហាលាងលុយកខ្វក់ ជាសមត្ថកិច្ចពាក់ព័ន្ធនគរបាល គយប្រចាំនៅច្រក ឬក៏សមត្ថកិច្ចដ៏ទៃទៀត ព្រោះជួនកាលអ្នករកស៊ីបែបនោះមានល្បិចខ្ពស់»៕
Tag:
ស ខេង
លាងលុយកខ្វក់
© រក្សាសិទ្ធិដោយ thmeythmey.com