ជាតិ
សហភាពអឺរ៉ុប ផ្ដល់ឲ្យជាង៩៨លានដុល្លារ លើវិស័យជលផលនៅកម្ពុជា រូបភាពពីក្រសួងកសិកម្ម លោក George Edgar
× រដ្ឋមន្ត្រីក្រសួងកសិកម្ម លោក វេង សាខុន និង ឯកអគ្គរដ្ឋទូតសហភាពអឺរ៉ុបប្រចាំកម្ពុជា លោក George Edgar ជួបពិភាក្សាគ្នា ដើម្បីពិនិត្យតាមដានវឌ្ឍនភាពនៃគម្រោងអភិវឌ្ឍន៍វិស័យជលផល (CAPFISH-Capture) ដែលជាមានជំនួយឥតសំណង៨៧លានអឺរ៉ូ (ជាង៩៨លានដុល្លារ) ពីសហភាពអឺរ៉ុប។ ការផ្ដល់ជំនួយនេះ គឺសម្រាប់អនុវត្តគម្រោងពីឆ្នាំ២០១៩ ដល់ ឆ្នាំ២០២៣ ដែលសហការអនុវត្តដោយអង្គការ FAO UNESCO និង UNIDO ហើយរដ្ឋបាលជលផលជាស្ថាប័នទទួលខុសត្រូវ។
បើតាមការចេញផ្សាយលើទំព័រហ្វេសប៊ុករបស់ក្រសួងកសិកម្ម នៅថ្ងៃទី៣ ខែកក្កដា ឆ្នាំ២០១៩នេះ លោក វេង សាខុន លើកឡើងក្នុងកិច្ចប្រជុំថា គម្រោង CAPFISH - Capture សម្រាប់អភិវឌ្ឍវិស័យជលផលកម្ពុជា។ លោក សង្ឃឹមថា លទ្ធផលទទួលបានពីគម្រោងនេះ នឹងចូលរួមអភិវឌ្ឍវិស័យជលផល និងសេដ្ឋកិច្ចជាតិនាពេលអនាគត។ លោក បានណែនាំឲ្យរដ្ឋបាលជលផលបន្តកិច្ចសហការជាមួយគ្រប់ភាគីពាក់ព័ន្ធ ជាពិសេសម្ចាស់ជំនួយ ដើម្បីអនុវត្តគម្រោងឲ្យបានជោគជ័យ។
របាយការណ៍ពីក្រសួងកសិកម្ម បានឲ្យដឹងថា ការអនុវត្តគម្រោងខាងលើ មានការពង្រឹងការអនុវត្តច្បាប់ បច្ចេកទេស ការគ្រប់គ្រងការនេសាទ ការកែច្នៃ ការការពារដែននេសាទ ការបង្កើតជម្រកត្រីពូជ ការបណ្តុះបណ្តាលសហគមន៍ និងផ្សព្វផ្សាយ ការផ្តល់សេវាកម្ម។ ក្រៅពីនេះ មាន ការគ្រប់គ្រងមូលនិធិ ការកាត់បន្ថយការបាត់បង់ក្រោយពេលប្រមូលផល ការបង្កើនបរិមាណផលនេសាទក្នុងទីផ្សារ ធានាស្តង់ដារគុណភាព សុវត្ថិភាពទីផ្សារជាតិ-អន្តរជាតិ ការកសាងសមត្ថភាពមន្ត្រីជំនាញអំពីការត្រួតពិនិត្យគុណភាព និងអនាម័យ។ ទន្ទឹមនឹងនេះ បានផ្តល់ការគាំទ្រដល់វិស័យឯកជនក្នុងការវិនិយោគវារីវប្បកម្ម និងផ្តល់ហិរញ្ញវត្ថុដល់សហគ្រាសខ្នាតតូច និងមធ្យម ដើម្បីលើកកម្ពស់សង្វាក់ផលិតកម្ម។
គម្រោងខាងលើនេះ នឹងជួយគាំទ្រដល់សេវាទឹកស្អាត អនាម័យ និងការគ្រប់គ្រងកាកសំណល់ថាមពល និងការអប់រំនៅតំបន់ដីសើម និងតំបន់ឆ្នេរ គាំទ្រដល់ការអភិវឌ្ឍអេកូទេសចរណ៍។ ជាមួយគ្នានេះដែរ ទាំងគោលបំណង និងលទ្ធផលដែលរំពឹងទុកនៃគម្រោងទាំងមូល នឹងរួមចំណែកយ៉ាងសំខាន់ក្នុងការអនុវត្តច្បាប់ស្តីពី វិធានការរដ្ឋម្ចាស់កំពង់ផែដើម្បីបង្ការទប់ស្កាត់ និងលុបបំបាត់ការនេសាទខុសច្បាប់ គ្មានរបាយការណ៍ និងគ្មានការអនុញ្ញាត។ សម្រាប់សេចក្តីព្រាងច្បាប់នេះ ទើបតែត្រូវបានរដ្ឋសភាអនុម័តកាលពីថ្ងៃទី១ ខែកក្កដានេះ។
គម្រោងជំនួយឧបត្ថម្ភហិរញ្ញប្បទានឥតសំណងពីសហភាពអឺរ៉ុបនេះ មានគោលបំណងគាំទ្រលើឆន្ទៈរបស់រាជដ្ឋាភិបាលដែលមានគម្រោងអភិវឌ្ឍវស័យជលផលឲ្យមាននិរន្តរភាពតាមការប្រែប្រួលអាកាសធាតុ៕
Tag:
ជលផល
CAPFISH-Capture
© រក្សាសិទ្ធិដោយ thmeythmey.com